جايدارى جاز كۇندەرى لاگەردە بولىپ, جاڭا دوستار تاۋىپ, سۋعا ءتۇسىپ, كۇنگە قىزدىرىنعان قانداي عانيبەت. اسىرەسە, جورىققا شىعىپ, كەشكى ديسكوتەكالاردا كوڭىل كوتەرۋ كوپ ۋاقىت بويى ەستەن كەتپەسى انىق. «ەمبىمۇنايگاز» كومپانياسىنىڭ شاراپاتتى ءىسىنىڭ ارقاسىندا, اتىراۋ وبلىسىنداعى الەۋمەتتىك-ءالسىز توپقا جاتاتىن حالىقتىڭ 300 بالاسى وڭتۇستىك قازاقستان وڭىرىندەگى «ماشات-اراسان» ساۋىقتىرۋ لاگەرىندە ماساتى ماۋسىمدى ويداعىداي وتكىزىپ دەم الدى.
اتىراۋ وبلىسىنىڭ ءتۇرلى اۋداندارىنان كەلگەن بالالار ون ەكى كۇن ىشىندە «ەمبىمۇنايگاز» اق-تىڭ دەمەۋشىلىك جانە قايىرىمدىلىق باعدارلاماسى بويىنشا بولىنگەن قاراجات ەسەبىنەن دەنساۋلىقتارىن تۇزەدى. ولار نەگىزىنەن كورىكتى تاۋ قويناۋىنداعى «ماشات-اراسان» لاگەرىندە بولدى.سىلدىراپ اققان تاۋ وزەندەرى مەن كوكمايساعا ورانعان بەل-بەلەستەر, سامال جەل. ءبارى-ءبارى جەتكىنشەكتەردىڭ كوڭىلىن كوتەرىپ, راحاتقا بولەدى. كەشكى استان كەيىن جالپىلاگەرلىك شارالارعا قاتىسىپ, كوماندالار اراسىنداعى ءارتۇرلى كونكۋرستارعا قاتىستى. لاگەر ديرەكتورىنىڭ تاربيە جۇمىسى جونىندەگى ورىنباسارى نۇرعازى الباەۆ اتىراۋلىق بالالاردىڭ بوس ۋاقىتتارىن بارىنشا كوڭىلدى وتكىزۋلەرىنە ۇيىتقى بولدى. ولاردىڭ سۇيىكتى ىستەرىمەن اينالىسۋىنا جان-جاقتى جاعداي جاساپ, تىكەلەي ءوزى قاداعالاپ وتىردى.
– لاگەردەگى بارلىق وقىتۋشىلار مەن تاربيەشىلەر نەگىزىنەن تۇلكىباس اۋدانىنداعى مەكتەپ-گيمنازيالاردىڭ جانە مەكتەپتەردىڭ جوعارى ساناتتى مۇعالىمدەرىنەن جاساقتالدى. العاشقى كۇندەرى الىستان كەلگەن بالالار ۇيلەرىن ساعىنىپ كوڭىلسىز جۇرگەندەرى دە راس. كەيىننەن ولار لاگەر تارتىبىنە بەيىمدەلىپ كەتتى. دەنساۋلىعى ناشار كەيبىر بالالار دا سپورتتىق شارالارعا قاتىسۋعا ىنتا تانىتتى, – دەيدى نۇرعازى الباەۆ.
ساۋىقتىرۋ لاگەرىندە بالعىنداردىڭ بوس ۋاقىتتارىن مازمۇندى وتكىزۋىنە ورايلاستىرىلىپ باعدارلامالار جاسالدى. سونىڭ ناتيجەسىندە بەلسەندىلىك كورسەتكەن بالالاردىڭ قاتارى ارتتى.
– مەديتسينالىق تالداۋ كورسەتكەنىندەي, اتىراۋلىق بالالاردىڭ كوپشىلىگى قالقانشا بەزى, انەميا, يممۋنيتەتى تومەن, ىشەك-قارىن جولىنىڭ السىزدىگى سياقتى سىرقاتتارمەن اۋىرادى ەكەن. سوندىقتان مۇندا كۇن سايىن بالالار شيپالى شوپتەر قايناتپاسى مەن وتتەگى كوكتەيلىن ءىشىپ دەنساۋلىقتارىن ءبىرشاما تۇزەتتى. اسىرەسە, ارتىق سالماعى بار بالالارعا شيپاسىن تيگىزدى, – دەيدى لاگەردىڭ دارىگەر-پەدياترى ءنابيرا اۋباكىروۆا.
– مەن كەلەسى جىلى وسى لاگەرگە تاعى دا كەلۋدى ۇيعارىپ وتىرمىن. ماعان شىمكەنت قالاسىنا جاساعان ەكسكۋرسيا وتە ۇنادى. ءبىز ساياباقتار مەن حايۋاناتتار باعىن تاماشالادىق. ال بىزدەن جاسى ۇلكەن بالالار تۇركىستان قالاسىنا ساپار شەگىپ, قىزىقتاپ قايتتى, – دەپ ءوز اسەرىن ءبولىستى اتىراۋ وبلىسىنىڭ قۇلسارى قالاسىنداعى №21 مەكتەپتىڭ وقۋشىسى, ون ەكى جاستاعى البينا تاجىكوۆا.
– ءبىز لاگەردەگى العاشقى كۇندەرى ءۇيىمىزدى قاتتى ساعىنىپ, قايتقىمىز كەلدى. سودان كەيىن بوي ۇيرەتىپ, سپورتپەن جانە باسقا دا شىعارماشىلىقپەن اينالىسىپ, بوس ۋاقىتىمىزدى كوڭىلدى وتكىزدىك. كونكۋرستارعا قاتىسىپ, باعىمىزدى سىنادىق, – دەيدى البينانىڭ قۇربىلارى اتىراۋلىق ءاليا سابىروۆا مەن گۇلناز جولداسوۆا.
– «ەمبىمۇنايگاز» اق ەلىمىزدىڭ مۇناي ونەركاسىبىنىڭ باستاۋىندا تۇرعان كاسىپورىن بولىپ سانالادى. مەكەمە اركەز بالالارعا ەرەكشە نازار اۋدارادى. كومپانيا باس ديرەكتورىنىڭ ءبىرىنشى ورىنباسارى قۇرمانعازى ەسقازيەۆتىڭ جانە باسقارما مۇشەلەرىنىڭ ءتىكەلەي باستاماشىلىعىمەن بالالاردى شىمكەنتتەگى لاگەرگە ءجىبەرۋ ءبىراۋىزدان قولداۋ تاپتى. وسىلايشا جەتكىنشەكتەر وڭتۇستىك وڭىردە كوڭىلدى دەمالىپ, كۇش-قۋات جينادى. بۇدان ارتىق قانداي قۋانىش بولسىن. الداعى كەزدە دە كاسىپورىن يگىلىكتى ءىسىن جالعاستىرا بەرمەك, – دەدى كومپانيانىڭ الەۋمەتتىك ساياسات دەپارتامەنتىنىڭ ديرەكتورى قۋاندىق قاليدۋللين.
مارات اققۇل,
«ەگەمەن قازاقستان»
