قۇرمەتتى وتانداستار!

سىزدەردى قازاقستان حالقى اسسامبلەياسى تاريحي وقيعا – قازاقستان رەسپۋبليكاسىنىڭ العاش رەت بىرىككەن ۇلتتار ۇيىمىنىڭ باستى ورگانى –  قاۋىپسىزدىك كەڭەسىنىڭ تۇراقتى ەمەس مۇشەلىگىنە سايلانۋىمەن قۇتتىقتايدى! ءبىزدىڭ ەلىمىز بۇۇ-نىڭ  قاۋىپسىزدىك كەڭەسىنىڭ قۇرامىنا ورتالىق ازيادان سايلانعان تۇڭعىش مەملەكەت. 2016 جىلعى 28 ماۋسىمدا نيۋ-يوركتە بۇۇ باس اسسامب­لەيا­سى جۇمىسىنا 193 مەملەكەتتىڭ قاتىسۋىمەن وتكەن داۋىس بەرۋ كەزىندە قازاقستانعا 138 مەملەكەت قولداۋ كورسەتتى. 2017 جىلدىڭ 1 قاڭتارىنان باستاپ 2018 جىلدىڭ 31 جەلتوقسانىنا دەيىن  قازاقستان رەسپۋبليكاسى ازيا-تىنىق مۇحيتى ايماعى مەملەكەتتەرى اتىنان بۇۇ ساياسي ورگانىنىڭ اسا ماڭىزدى جۇمىسىنا رەسمي تۇردە قاتىساتىن بولادى, وعان ۇيىمنىڭ جارعىسىمەن جاھاندىق بەيبىتشىلىك پەن قاۋىپسىزدىكتى ساقتاۋ بويىنشا وكىلەتتىكتەر جۇكتەلەدى. بۇل – قازاقستاننىڭ تۇڭعىش پرەزيدەنتى, ەلباسى نۇرسۇلتان ءابىش ۇلى نازارباەۆتىڭ بەيبىتشىلىك سۇيگىش سىندارلى سىرتقى ساياساتىنىڭ جەڭىسى! بۇل بارشا قازاقستاندىقتاردىڭ جەڭىسى! قازاقستاننىڭ بۇۇ قاۋىپسىزدىك كەڭەسىنە مۇشە بولىپ سايلانۋى – قازاقستان رەسپۋبليكاسىنىڭ حالىقارالىق جوعارى بەدەلىنىڭ ايشىقتى ايعاعى, ونىڭ حالىقارالىق قاۋىپسىزدىكتى جانە مەملەكەتارالىق قاتىناستارداعى سەنىم شارالارىن نىعايتۋعا قوسقان ۇلەسىنىڭ باعالانۋى. قارۋسىزدانۋ ساياساتىنىڭ ەتالونى بولعان قازاقستاننىڭ جانە ونىڭ كوشباسشىسىنىڭ سەمەي يادرولىق پوليگونىن  جابۋ, يادرولىق قارۋدان ءوز ەركىمەن باس تارتۋ  باستاماشىل بەيبىتشىل يدەيالارى حالىقارالىق قوعامداستىقتا قولداۋعا يە بولدى. قازاقستاننىڭ ازياداعى ءوزارا ءىس-قيمىل جانە سەنىم شارالارى جونىندەگى كەڭەس شاقىرۋ تۋرالى باستاماسى, ەۋروپاداعى قاۋىپسىزدىك جانە ىنتىماقتاستىق ۇيىمىنا توراعالىق ەتۋى, ورتالىق ازيادا يادرولىق قارۋدان ازات ايماق قۇرۋ, قاۋىپسىز جاڭا الەم مەن ادىلەتتىلىككە باعىتتالعان G-global باستاماسى قازاقستاندى بەيبىتشىل باستامالار مەن بۇكىل الەمدەگى سەنىم اتموسفەراسىن قالىپتاستىرۋشى كوشباسشى رەتىندە تانىتتى. حالىقارالىق قوعامداستىقتى يادروسىز الەم قۇرۋعا, كەز كەلگەن سوعىس ءتۇرىن بولدىرماي, ونىڭ الدىن الۋعا شاقىرعان  اقش-تاعى يادرولىق قاۋىپسىزدىك جونىندەگى سامميتتە جاريا­لانعان قازاقستان رەسپۋبليكاسى پرەزيدەنتىنىڭ «الەم. ءححى عاسىر» مانيفەسى بۇۇ-نىڭ رەسمي قۇجاتىنا اينالدى. قازاقستان حالقى اسسامبلەياسى اسقان ريزاشىلىق سەزىمىن بىلدىرە وتىرىپ, قازاقستان پرەزيدەنتى, ەلباسى نۇرسۇلتان ءابىش ۇلى نازارباەۆتى, بارشا قازاقستان حالقىن قازاق­ستاننىڭ كوپۆەكتورلى حالىقارالىق ساياساتىنداعى تاريحي جەڭىسىمەن  قۇتتىقتايدى! بۇل جەڭىس – ورتالىق ازيانىڭ جانە ەلىمىزدىڭ ءار ازاماتىنىڭ قاۋىپسىزدىگىن نىعايتۋدىڭ كەپىلى! قازاقستان حالقى اسسامبلەياسىنىڭ كەڭەسى,  استانا ق., 2016 جىلعى 29 ماۋسىم