جۇيرىكتەر انىقتالاتىن ءسات جاقىن

فرانتسيادا ءوتىپ جاتقان فۋتبولدان ەۋروپا چەمپيوناتىندا بۇرناعى كۇنى سوڭعى ەكى ويىننىڭ وينالۋىمەن 1/8 فينالدىق كەزەڭ مارەسىنە جەتتى. ەندى 30 ماۋسىم – 3 شىلدە ارالىعىندا شيرەك فينالدىق ويىندارعا كەزەك بەرىلەدى. بۇدان ايبىنى اسىپ, ايدىنى وزىپ شىعاتىن ءتورت كوماندانىڭ ۇشەۋى كۇنى ەرتەڭ كىل سىڭعىرلاعان مەدالدارعا قول جەتكىزەدى. مۇنىڭ ءوزى ۋاقىتتىڭ جۇلدەلى جۇيرىكتەر انىقتالاتىن تۇسقا تىم جاقىنداپ قالعانىن كورسەتەدى. قازىر وسى سەگىزدىكتى الداعى كۇن­دەردە ءبىر-بىرلەرىمەن كەزدەسەتىن پولشا – پورتۋگاليا, ۋەلس – بەل­گيا, گەرمانيا – يتاليا جانە فران­تسيا – يسلانديا جۇپتارى قۇراپ وتىر. ادەتتە, مۇنداي جان الىپ, جان بەرىسەتىن, بەزبەن باسىنا ءبىر ەلدىڭ ارى مەن نامىسى تۇسەتىن الماعايىپ سپورتتىق جارىستاردا الدىن الا بولجام ايتىپ, ساۋەگەيلىك كورسەتۋ ادامعا ونشالىقتى ابىروي اپەرە بەرمەيدى. سوندايلاردىڭ ءبىرازى بۇرناعى انگليا – يسلانديا ماتچ­ىندا اعىلشىنداردىڭ ءشۇباسىز كۇشتى ەكەنىنە ءباس تىگىسىپ, قاتتى قاتەلەستى. الدىمەن الاڭعا يتاليا مەن يسپانيا بەتتەدى. «سكۋادرا ادزۋررا» ءار تايمدا سوققان ءبىر گولىنىڭ ناتيجەسىندە 2:0 ەسەبىمەن جەڭىسكە جەتتى. ليون ستاديونى بۇل كۇنى ءبىر­نەشە تاريحي شەشىمگە قول قوي­دى. سونىڭ ءبىرىنشىسى – يسپاندار سەگىز جىلدان بەرى ارقالاپ كەلە جاتقان قۇرلىق چەمپيونى دەگەن اتاقتارىنىڭ ۋاكىلدىگىن بەرىپ شىقتى. ەكىنشىسى – «فۋريا روحا» بۇعان دەيىن قاتارىنان ەكى ساپار العان چەمپيوندىعىن ءۇشىنشى مارتەلىككە ۇلاستىرۋ ماقساتىمەن ءبىرجولا قوشتاستى. ءۇشىنشىسى – اپپەنين تۇبەگىنىڭ جىگىتتەرى قارسىلاستارىنان 2012 جىلعى ەۋروپا چەمپيوناتىنىڭ كيەۆتە 1 شىلدە كۇنى وينالعان فينالىندا 0:4 بولىپ ۇتىلۋىنىڭ ەسەسىن قايتاردى. مۇنى بىرقاتار سپورت شولۋشىلارى «يتاليانشا ۆەندەتتا» دەپ اتاپ تا ۇلگەردى. ءتورتىنشىسى – ەكى قۇرامانىڭ وسى كەزگە دەيىنگى ءوزارا كەزدەسۋلەرىنىڭ قورىتىندىسىندا تەڭ بولىپ تۇرعان تارازى باسى وسى جولعى ۇتىسپەن يتالياندارعا قاراي اۋىپ كەتتى. ال بۇل قۇرامالار بۇعان شەكتى ءبىر-بىرىمەن 34 رەت ۇشىراسىپ, ارقايسىسى 10 رەتتەن جەڭىسكە جەتىپ, 14 كەزەك تەڭ ويناعان بولاتىن. «يتاليا – جاي عانا كاتەناچچو دەڭگەيىنەن اناعۇرلىم بي­ىك», – دەدى ويىننان كەيىنگى باس­پاسوز ءماسليحاتىندا «سكۋاد­را ادزۋر­رانىڭ» باس جاتتىق­تىرۋشىسى انتونيو كونتە. ەڭ باس­تىسى, يتاليان فۋتبولشىلارى مۇنى الاڭ ۇستىندە وتە-موتە دالدىكپەن دالەلدەپ بەردى. ولار يسپانداردىڭ ءاربىر ارتىق ءجۇرى­سىنىڭ الدىن وراپ كەتىپ, قاۋىپ-قاتەردى تۇساۋلاپ تاس­تاپ وتىردى. سونىمەن بىرگە, بۇل ماتچ يتاليان كومانداسىنىڭ شابۋىل شەبىندە ءبىراز سالماقتى پروبلەمانىڭ بار ەكەنىن دە بايقاتىپ قويدى. سو­عان قاراماستان, بۇل ولاردىڭ ءىس باسىنداعى چەمپيوندى تىزە بۇك­تىرىپ, جارىس جولىنان شىعارىپ تاس­تاۋلارىنا كەدەرگى كەلتىرە المادى. جەكپە-جەكتى انتونيو كون­تەنىڭ شاكىرتتەرى بەلسەندى باستادى. وسى تۇستا ەدەر مەن پەللە ءبىرشاما كوزگە ءتۇستى. 11-مينۋتتا ەمانۋەلە دجاككەرينيدىڭ شالقايا بەرىپ تەپكەن دوبى باعاننان قايت­تى. البەتتە, يسپاندار دا ءوز قاقپاسى الدىندا جەر باۋىرلاپ جاتىپ العان جوق. ارا-تۇرا ولار دا العا ۇمتىلىپ تۇردى. ءبىرىنشى تايم, تۇتاستاي العاندا, يتاليا قۇراماسىنىڭ باسىمدىعىمەن ءوتتى. سونىڭ اراسىندا, 33-مينۋتتا دجوردجيو كەلليني گول سوعىپ كەتتى. ول ەدەردىڭ سوققىسىنان كەيىن دوپتى ءدال الدىنا ءتۇسىرىپ العان داۆيد دە حەا قاتەلىگىن ادەمى پايدالانا ءبىلدى. ال ەكىنشى گولدى يتالياندار كەزدەسۋدىڭ ەڭ سوڭعى سەكۋندتارى ءجۇرىپ جاتقان 90+1 مينۋتتا سوقتى. بۇل جولى ولار ۆيسەنتە دەل بوسكەنىڭ ويىنشىلارىن قارسى شابۋىل كەزىندە «قاقپانعا» ءتۇسىردى. گولدى ماتتەو دارمياننان پاس العان گراتسيانو پەللە سالدى. يسلانديانىڭ انگليانى ىعىس­تىرىپ, جولدان شىعارىپ تاس­تاۋىنىڭ سەنساتسيا ەكەنىن مويىن­دامايتىن مامان جوق. بىراق نيتستسادا وتكەن كەزدەسۋدىڭ باسى جاعدايدىڭ بۇلايشا داميتىنى جونىندە ەشقانداي سىبىس بىلدىرگەن جوق. كەرىسىنشە, روي حودجسون فۋتبولشىلارىنىڭ ونى ءساتتى باستاعانىن كورسەتتى. اعىلشىندار 4-مينۋتتا-اق ەسەپ اشتى. راس, گول ۋەين ءرۋنيدىڭ ۇرۋىمەن پەنالتيدەن كىردى. ايىپ دوبى دانيەل ستارريجدەن دوپ العان راحيم ستەرلينگ قاقپا الاڭىنا قۇيعىتىپ كەلگەن كەزدە قاقپاشى حاننەس حاللدوۋرسسوننىڭ ونى توبىقتان قاعىپ قۇلا­تۋىنا بايلانىستى بەلگىلەندى. الايدا, ارادا بار-جوعى ەكى مينۋت وتكەننەن كەيىن فاۆوريت-كوماندا ويىنشىلارىنىڭ كوڭىل كۇيلەرى نىلدەي بۇزىلىپ سالا بەردى. بۇعان كاري ارناسوننىڭ قاپتالدان قول­مەن لاقتىرىپ بەرگەن دوبىن راگنار سيگۋردسسوننىڭ قاعىپ الىپ, جاقىن جەردەن قاقىراتا ۇرىپ, جاۋاپ گول سوعۋى سەبەپ بولدى. وسىدان كەيىن بىرتىندەپ ءوز-وزىنە كەلگەن انگليا جويقىن جورىق­­تارمەن قارسىلاسىن باسىپ تاستاماققا ۇمتىلدى. سول ۋاقىت­­تارى ون مينۋتتاي ۋاقىت «ءۇش ارىستاننىڭ» ەنتىگىن باسىپ, ەك­پىنىن قايتارۋعا كۇش سالعان لارس لاگەربەكتىڭ ۇلاندارى قايتا قارسى شابۋىلعا كوتەرىلدى. 18-مينۋتتا وتە جاقسى وينالعان كومبيناتسيا­دان كەيىن كولبەين سيگتورسسون ايىپ الاڭى سىزىعى ماڭىندا سوققى جاسادى. قاقپاشى دجو حارت دوپقا قولى تيگەنىمەن, ونى ءبىرجولا قايتارىپ تاستاي المادى. وسىلايشا يسلاندتار العا شىعىپ كەتتى. البەتتە, كوپ ۇزاماي اعىلشىندار ەسەپتى تەڭەستىرۋ ءۇشىن جانتالاسا شاپقىلادى. وسى ماقساتتا باپكەر ەكىنشى تايمدا ويىنعا قوسقان فۋتبولشىلار سەنىمدى اقتاي العان جوق. ماسەلەن, دجەك ۋيلشەردىڭ جارتىلاي قورعانىستىڭ ورتا شەبىندە ۋەين رۋنيمەن ءتىل تابىسىپ ويناۋى وڭايعا تۇسپەدى. ال دجەيمي ۆار­ديدىڭ ءتىپتى الاڭدا بار-جوعى بەل­گىسىز بولىپ قالدى. انگليا قۇرا­ماسى وسىلايشا وزدەرىنەن كۇتىل­گەندەي ويىن ورنەگىن كورسەتە قوي­مادى. مۇنىڭ سوڭى جەڭىلىسپەن اياقتالدى. ويىن بىتكەننەن كەيىن روي حودجسوننىڭ ايتقان ءبىرىنشى ءسوزى ءوزىنىڭ وتستاۆكاعا كەتۋى تۋراسىندا بولدى. «ماعان جولدى وسىلاي اياقتاۋ وتە وكىنىشتى. بىراق مۇنداي جاعداي بولا بەرەدى», – دەدى ول. ءسويتىپ, ول ءتورت جىلعا سوزىلعان جۇمىسىن اياقتاعالى وتىر. وسى ۋاقىت ارالىعىندا جاتتىقتىرۋشى قۇرامانى ەۋروپانىڭ ەكى, الەمنىڭ ءبىر چەمپيوناتىنا باستاپ باردى. بۇلاردىڭ ىشىندەگى ەڭ ءىرى تابىسى 2012 جىلى قۇرلىق چەمپيوناتىندا شيرەك فينال شەبىنە دەيىن جەتۋى بولدى. بۇل جولى وعان دا جەتە المادى. ەندى كوماندالار ەكى كۇندىك ءۇزىلىس الادى. سەرىك ءپىرنازار, «ەگەمەن قازاقستان»