فوتو: ريا «نوۆوستي»
تۇركيا پرەزيدەنتى رەدجەپ تايپ ەردوعان رەسەيدىڭ سۋ-24 بومبارديروۆششيگى اتىپ تۇسىرىلۋىنە بايلانىستى رەسەي پرەزيدەنتى ۆلاديمير پۋتينننەن كەشىرىم سۇرادى. ras.kz حابارىندا تۇرىك ليدەرىنىڭ مۇنى ارنايى جولداعان مالىمدەمەسى ارقىلى جاساعانىن جازادى. «ەردوعان اتىپ تۇسىرىلگەن رەسەي ۇشاعى ءۇشىن رەسەي پرەزيدەنتىنىڭ الدىندا كەشىرىم ءوتىندى», دەپ باياندايدى كرەمل ءباسپاسوز قىزمەتى. تۇركيا باسشىسى رف پرەزيدەنتىنەن كەشىرىم وتىنۋدەن بولەك, سۋ-24 ۇشاعىنىڭ اتىپ تۇسىرىلۋىنە بايلانىستى جاعدايدى رەتتەۋگە مۇددەلىلىك بىلدىرگەن. «بىزدە رەسەي فەدەراتسياسىنا قارايتىن ۇشاقتى اتىپ ءتۇسىرۋ جونىندە ەشقاشان الدىن الا ءبىر نيەت بولعان جوق ...بارلىق تاۋەكەلدى موينىمىزعا الىپ, كوپ جۇمساي وتىرىپ, ءبىز قازا تاپقان رەسەيلىك پيلوتتىڭ دەنەسىن سيريالىق وپپوزيتسيونەرلەردەن الىپ, ونى تۇركياعا اكەلدىك. جەرلەۋ الدىنداعى پروتسەدۋرالار ءدىني جانە اسكەري ۇردىستەرگە سايكەس جۇرگىزىلدى. مۇنداعى بارلىق جۇمىستاردى ءبىز تۇرىك-ورىس قارىم-قاتىناسىنا لايىقتى جوعارى دەڭگەيدە اتقاردىق. مەن ەندى قازا تاپقان رەسەيلىك ۇشقىشتىڭ وتباسىنا ءوزىمنىڭ سەزىمىمدى جانە كوڭىل ايتۋىمدى بىلدىرە وتىرىپ, «كەشىرىڭىزدەر» دەگىم كەلەدى. سىزدەردىڭ قايعىلارىڭىزعا ورتاقپىن. رەسەي پيلوتى ۇشقىشىنىڭ وتباسىن تۇرىك اۋلەتىن سەكىلدى قابىلدايمىز. جان جاراسىن جەڭىلدەتۋ مەن كەلتىرىلگەن زارداپتاردى جەڭىلدەتۋ ءۇشىن ءبىز كەز كەلگەن باستاماعا ءازىرمىز», دەلىنگەن رەدجەپ تايپ ەردوعان مالىمدەمەسىندە. مالىمدەمەدە تۇركيا ءۇشىن رەسەيدىڭ دوس جانە ستراتەگيالىق ارىپتەس بولىپ تابىلاتىنى ايتىلعان. تۇرىك بيلىگى سول قارىم-قاتىناستى بۇزعىسى كەلمەيدى. ەردوعان سونداي-اق رەسەي پيلوتىنىڭ ولىمىمەن بايلانىستىرا ايتىلىپ جۇرگەن تۇركيا ازاماتىنا قاتىستى سوت تەكسەرىسى باستالىپ, ءجۇرىپ جاتقانىن جازادى. ول بولعان جايعا ءوزىنىڭ قاتتى وكىنىش بىلدىرەتىنىن ايتا كەلىپ, تۇركيا مەن رەسەي اراسىنداعى بۇرىنعى ءداستۇرلى دوستىق قارىم-قاتىناستى قالپىنا كەلتىرۋ, سونداي-اق ايماقتاعى داعدارىستى وقيعالارعا بىرلەسكەن قيمىل جاساۋ, تەرروريزممەن كۇرەسۋ ءۇشىن قولدان كەلگەننىڭ ءبارىن جاسايتىنىن جەتكىزەدى. ەسكە سالا كەتەيىك, وتكەن اپتادا تۇركيا پرەزيدەنتىنىڭ ءباسپاسوز حاتشىسى يبراگيم كالىن تۇركيا بيلىگى رەسەيدىڭ سۋ-24 بومبارديوۆششيگى اتىپ تۇسىرىلگەنى ءۇشىن كەشىرىم سۇراپ, ونىڭ وتەۋىن قايتارۋ جايىندا جوسپارلاپ وتىرماعانىن ايتقان ەدى. رەسەي مەن تۇركيا قارىم-قاتىناسىنداعى داعدارىس 2015 جىلعى قاراشا ايىندا بۇل ەلدىڭ سيريامەن شەكارالاس اسپانىندا رەسەيدىڭ سۋ-24 ۇشاعى اتىپ تۇسىرىلگەننەن كەيىن بۇزىلعان بولاتىن. انكارانىڭ مالىمدەمەسى بويىنشا, رەسەيدىڭ سۋ-24 بومبارديروۆششيگى ەلدىڭ اۋە كەڭىستىگى ءتارتىبىن بۇزعان. رەسەي قورعانىس مينيسترلىگى ۇشاقتىڭ سيريا جەرىنىڭ ۇستىنەن ۇشىپ بارا جاتقانىن مالىمدەدى. تالعات رايىمبەك.
