تەلەجۋرناليستيكانى تاڭداۋشىلار نەگە كوپ؟

ادەتتە, بۇقارالىق اقپارات قۇرالدارىندا ەڭبەك ەتەمىن دەگەن جاستىڭ كوبى مەكتەپتە, كەيىن جوعارى وقۋ ورنىندا وقىپ جۇرگەنىندە-اق تەلەجۋرناليستيكاعا تاڭداۋ جاسايدى. نەگە؟ وسى ساۋال توڭىرەگىندە ارىپتەستەرىمىزبەن از-كەم پىكىرلەسكەن ەدىك. وڭىردەگى باق ماماندارىن دايارلايتىن بىردەن-ءبىر وقۋ ورنى  –  س.امانجولوۆ اتىنداعى شىعىس قازاقستان مەم­لەكەتتىك ۋنيۆەرسيتەتىنىڭ جۋرناليس­تيكا جانە الەۋمەتتىك گۋمانيتارلىق عىلىمدار كافەدراسىنىڭ مەڭگەرۋشىسى ەرمەك سەيتەمبەكوۆتىڭ ايتۋىنشا, بيىل 27 ستۋدەنت جۋرناليستيكا ما­ماندىعى بويىنشا ديپلوم الدى. ولاردىڭ 70 پايىزى جۇمىسقا ورنالاسىپ ۇلگەرگەن ەكەن. ارينە, باسىم بولىگى تەلەجۋرناليستيكانىڭ اۋىلىنا اتباسىن بۇرعان. – جۋرناليستيكا – جاستارىمىزدىڭ وقۋشى كۇنىنەن باستاپ ارمانداعان ماماندىعى عوي. ونىڭ سەبەبىن ما­ماندىققا دەگەن قۇشتارلىقتان ىزدەگەن ءجون شىعار. مەرزىمدى ءباسپاسوز – جوعارى وقۋ ورنىن بىتىرگەن جاس ءۇشىن بىردەن بىتە قايناسىپ كەتە المايتىن جاۋاپكەرشىلىگى مول شىعارماشىلىق ورتا. ارينە, تەلەارنالاردىڭ جۇگى جەڭىل دەي المايمىن. دەگەنمەن, تەلەجۋرناليستيكادا ءجۋرناليستىڭ ءسوزى مەن ويى جەتكىزە الماعاندى ۆيدەو, ياعني بەينەماتەريال, جاقسى مونتاجدالعان ۇجىمدىق ەڭبەك جەتكىزەدى. سوندىقتان دا جاستار تەلەجۋرناليستيكاعا بەت بۇرىپ جاتادى, – دەيدى كافەدرا مەڭ­گەرۋشىسى ەرمەك جاكەن ۇلى. ال «قازاقستان-وسكەمەن» تەلە­ارناسى ديرەكتورىنىڭ ورىنباسارى ايدا جاباعيەۆا «جۋرناليس­تيكا ماماندىعىنىڭ تۇلەكتەرى تەلە­­جۋرناليستيكاعا جۇگىرەدى» دەگەن ءپى­كىرمەن كەلىسپەيدى. سالا مامانى جۋرناليستيكادان ازدى-كوپتى حاباردار جاننىڭ ءبəرى تەلەۆيزيانىڭ قيىن­دىعىنان دا حاباردار ەكەنىن ايتادى. – مىسالى, گازەتتە ماتەريالدىڭ ساۋاتتىلىعى تىكەلەي اۆتورعا, قالام تارتۋ شەبەرلىگىنە, ءسوز ساپتاۋىنا بايلانىستى. ساۋاتتى جۋرناليستەن ساۋاتتى ماقالا شىعادى. ال, تەلەجۋرناليستيكادا ساۋاتتى جازا ءبىلۋ از. ياعني, مۇندا ءتىلشىنىڭ ساۋاتتىلىعىمەن قاتار, شىعارماشىلىق ورتادا جۇمىس ىستەي ءبىلۋى, ادامدارمەن ءتىل تابىسۋ قابىلەتى جانە ومىردەگى بولمىسى وتە ماڭىزدى. ءتىلشى تاقىرىپ تاپتى دەلىك. دەگەن­مەن, əرىپتەستەرىمەن بايلانىستا جۇمىس ىستەمەسە, رەجيسسەرگە, وپەراتورعا, بەي­نەمونتاجداۋشىعا سيۋجەتىنىڭ باعىت-باعدارى مەن ونى جۇزەگە اسىرۋ بارىسىنداعى كوزدەگەنىن تۇسىندىرە الماسا, تەلەتۋىندىنىڭ دا ساپاسى ءتو­مەن بولادى. ياعني, تەلەجۋرناليستيكا – كوماندالىق, شىندىعىنا كەلگەندە ۇلكەن جاۋاپكەرشىلىك جۇكتەيتىن جۇمىس. ونىڭ ەرەكشەلىگى – ەموتسيانى جەتكىزۋ جانە ونى كورەرمەنىمەن ءبولىسۋ مۇمكىندىگى. جالپى, جۋرناليستيكانىڭ قاي سالاسىندا بولماسىن, تەك شىنايى جان-تəنىمەن بەرىلگەندەر عانا جۇمىس ىستەي الادى, – دەدى ايدا تىلەۋبايقىزى. وسى ورايدا كەلەشەگىن باسپاسوزبەن بايلانىستىرعان جاستاردىڭ ويىن دا بىلدىك. – مەنىڭشە, قازىرگى كەزدە جاس جۋر­ناليستەردىڭ تەلەارنالارعا بەت بۇرۋى تۋعان-تۋىس, دوس-جاراننىڭ ىقپالىنان بولىپ تۇر. ويتكەنى, جۋرناليستيكا ماماندىعىندا وقيتىنىڭدى ەستىگەن كەز كەلگەن جاننىڭ العاشقى ايتارى: «سەنى تەلەديداردان كورىپ وتىرايىق», دەگەن باتا-تىلەك. سەبەبى, كوك جاشىك كورەرمەندەرىنىڭ سانى گازەت وقىرماندارىنان الدەقايدا ارتىق. سوندىقتان جاستار تاسادا قالىپ بارا جاتقان كاسىپ يەسى ەمەس, تانىمال تەلەجۇرگىزۋشى بولۋعا قۇشتار,  – دەيدى س.امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتى تاريح, حالىقارالىق قاتىناستار جانە فيلولوگيا فاكۋلتەتىندە جۋرناليس­تيكا ماماندىعى بويىنشا 2-كۋرستى تامامداعان بايان مۇراتقىزى. دۋمان اناش, «ەگەمەن قازاقستان» وسكەمەن