ورال وڭىرىندەگى ىرگەلى ءوندىرىس وشاقتارىنىڭ ءبىرى – شىنى وڭدەۋگە جانە جوعارى ساپالى اينەك پاكەتتەرىن وندىرۋگە ماماندانعان «ستەكلو-سەرۆيس» جشس. بۇگىندە كومپانيا ۇدەمەلى يندۋستريالىق-يننوۆاتسيالىق باعدارلاما شەڭبەرىندە «تەرمومىقتىلىعى كۇشەيتىلگەن اينەك ءوندىرىسى» جوباسىن ىسكە اسىرۋ ۇستىندە. ونىڭ باس يەلەرى اعايىندى ءارى اكەلى-بالالى – رۋبتسوۆتار بيزنەس جولىنا بىردەن تۇسپەپتى. العاشىندا قۇرقىلتايدىڭ ۇياسىنداي شاعىن عانا شەبەرحانا اشىپ, تۇرعىندارعا شىنى كەسۋ قىزمەتىن كورسەتۋدى قولعا الىپتى. باستاپقىدا اينەكتى ارنايى قۇرال ارقىلى وزدەرى كەسكەن ەكەن. ءسويتىپ, تۇتىنۋشىلار سەنىمىنە يە بولا باستاعاننان كەيىن شاعىن كاسىپكەرلىك قۇرىپ, ءوز دۇكەندەرىن اشادى.
ۋاقىت وتكەن سايىن شەبەرحانا جۇمىسى جاندانا تۇسەدى. كەيىننەن مۇندا شىنى وڭدەۋ جۇمىستارى جەتىلدىرىلگەن سوڭ زاڭدى تۇردە سەرىكتەستىك قۇرىلدى. وسى كەزدەن باستاپ شاھارداعى عيماراتتاردىڭ قاسبەتىن اينەكتەۋ جۇمىستارى جولعا قويىلدى. وسىلايشا اليۋمينيمەن ارلەنگەن, مەتالل مەن شىنى ۇيلەسىم تاپقان اينەكتەۋ ءۇلگىسى قالا كەلبەتىنە كورىك قوسا باستادى.
2011 جىلدان بەرى كومپانيا «بيزنەستىڭ جول كارتاسى-2020» باعدارلاماسى اياسىندا قارجىلاي كومەك تۇرىندەگى نەسيە الىپ تاپسىرىس بەرۋشىلەردىڭ تالاپتارى بويىنشا تەرەزەلەر مەن ءۇي جيھازدارى شىنىلارى مەن ىستىق پەن سۋىقتى وتكىزبەيتىن اينەكتەردى دايىنداۋمەن اينالىسىپ كەلەدى. رەسەيدەن اكەلىنگەن شيكىزات كوزىن وڭدەيتىن ستانوكتار مەن قۇرىلعىلار شىنىلاردى شارشى, پيراميدا پىشىندە قيىپ, قاجەتتىلىككە ساي زاماناۋي تەحنولوگيامەن وڭدەيدى. نەگىزىنەن ونەركاسىپتىڭ كەڭ قانات جايعان كەزى 2007 جىلدان باستالىپتى.
مەملەكەتىمىزدە بەلگىلەنگەن ونەركاسىپتى دامىتۋ جونىندەگى باعدارلامالار ارقاسىندا كاسىپورىننىڭ ءورىسى كەڭەيە ءتۇستى. 2011 جىلى بانكپەن كەلىسىمشارت جاسالعان. سوعان سايكەس قاراجاتتىڭ 15 پايىزى سەرىكتەستىك جەتەكشىلەرىنىڭ ءوزدەرىنەن شىقسا, قالعانى سۋبسيديالاۋ بويىنشا «بيزنەستىڭ جول كارتاسى-2020» باعدارلاماسىنان الىنعان.
قازىرگى تاڭدا شىنى پاكەتتەرىن دايىنداۋمەن اينالىساتىن «ستەكلو-سەرۆيس» جشس تەرمووتىمدىلىگى نىعايتىلعان شىنى, كوپ قاباتتى شىنى بۇيىمدارىن ءوندىرۋ جوباسىن تولىقتاي ءىسكە اسىردى. ءوندىرىس بەس جىلدان بەرى الەمدىك برەندكە اينالعان اۆستريالىق «Lisec» كومپانياسىنىڭ جابدىعىمەن جۇمىس ىستەۋدە. سونداي-اق, شىنىنىڭ مىقتىلىعىن نىعايتۋ فينليانديالىق «TamGlass» كومپانياسىنىڭ جەلىسىمەن جۇرگىزىلۋدە. ءبىلىكتى باسشى, «ستەكلو-سەرۆيس» جشس-ءنىڭ باس ديرەكتورى اركادي رۋبتسوۆتىڭ ايتۋىنشا, مۇنداعى شىنى ءونىمدەرى قاراپايىم ءاينەكتەردەن جەتى ەسە مىقتى. سوندىقتان, جەرگىلىكتى ونەركاسىپ ونىمىنە كورشىلەس رەسەيدىڭ سامارا, ساراتوۆ, ورىنبور, ۆولگوگراد, ەكاتەرينبۋرگ قالالارىنان دا سۇرانىستار تۇسە باستاپتى.
«مۇندا اينەك وڭدەۋ ءىسىن ودان ءارى دامىتۋ ماقساتىندا شىنىنى بوياۋ ءوندىرىسى جولعا قويىلعان. ترافارەتتىك باسپا جانە دەستەلەپ بوياۋ جەلىسى دە ورناتىلعان. سونىڭ ناتيجەسىندە مىقتى جانە كوپقاباتتى قاۋىپسىز اينەك ءتۇرلەرىنە اسقان شەبەرلىكپەن بوياۋى كەتپەيتىن سۋرەتتەردى سالۋعا ءمۇمكىندىگى تۋىپ وتىر. ونداي سۋرەتتەر قورشاعان ورتانىڭ اسەرىنە شىدامدى بولىپ كەلەدى», – دەيدى كاسىپورىن باسشىسى.
سونداي-اق, كومپانيا اينەكتى لازەرمەن كەسۋ ءوندىرىسىن دە قوسا يگەرگەن. مۇنداي تەحنولوگيانى الەمدەگى اينەك ءوندىرۋشى ءىرى كومپانيالاردىڭ ءبارى دە قولداناتىنى بەلگىلى. سونىمەن قاتار, بيىلعى جىلى «ستەكلو-سەرۆيس» جشس-ندە اۆتوكولىكتەرگە ارنالعان ءاينەك وندىرەتىن جەلى جوباسى دا پايدالانۋعا بەرىلمەك. قازىرگى ۋاقىتتا ەلىمىزدىڭ تۇكپىر-تۇكپىرىندە كومپانيانىڭ ءوز فيليالدارى جۇمىس ىستەيدى. ويتكەنى, ءوندىرىستىڭ اۋقىمدىلىعى جاعىنان استانا مەن الماتى قالالارىنان باسقا ەلىمىزدىڭ وزگە وڭىرلەرىندە ورالدىق كاسىپورىنعا بالاما بولارلىقتاي ءوندىرىس ورنى جوق دەسە دە بولادى.
ۇدەمەلى يندۋستريالىق-يننوۆاتسيالىق باعدارلاما اياسىندا كاسىپورىننىڭ ءوندىرىستىڭ كوكجيەگى جىلدان-جىلعا كەڭىپ كەلەدى. سونىڭ ارقاسىندا قوسىمشا جاڭا جۇمىس ورىندارى اشىلۋدا. قازىرگى تاڭدا ونەركاسىپتە 100-دەن اسا جۇمىسشى تۇراقتى ءتۇردە قىزمەت اتقارىپ ءجۇر. نەگىزىنەن مۇندا جاس ماماندار ۇلەسى باسىم تۇسەدى. ولاردى ايماقتا ارنايى كاسىبي مامانداندىرۋعا ءمۇمكىندىك بولماعاندىقتان, كاسىپتىڭ قىر-سىرىنا كاسىپورىن باسشىلارىنىڭ وزدەرى باۋلىپ, ۇيرەتەدى.
ءبىز بارعان ساتتە ءوندىرىس تسەحىندا جۇمىس قىزۋ ءجۇرىپ جاتتى. قايناعان جۇمىستىڭ بەل ورتاسىندا جۇرگەن جىگىت ازامات نۇرىموۆ مۇندا ءۇش جىلدان بەرى وپەراتور بولىپ قىزمەت اتقارادى ەكەن. «جۇمىسىم وزىمە ۇنايدى. كۇندەلىكتى تاڭعى ساعات سەگىزدەن باستاپ, كەشكى ساعات التىعا دەيىن جۇمىس ىستەيمىن. جالاقىم 90-100 مىڭ تەڭگە», – دەيدى ول. ال بۇعان دەيىن «ەكى قولعا ءبىر كۇرەك» تاپپاي ءبىراز سەندەلگەن ەكى بالانىڭ اكەسى ەرلان يمانبەكوۆتىڭ مۇندا وپەراتور بولىپ جۇمىسقا ورنالاسقانىنا دا كوپ ۋاقىت وتە قويماپتى. وتباسىنىڭ ناپاقاسىن ءوزىنىڭ ادال ەڭبەگى جانە ماڭداي تەرىمەن تابۋدى ماقسات ەتكەن ازامات قارا تەرگە مالشىنىپ شىنى سالاتىن رامكا جاساپ جاتتى.
تسەحتىڭ ءبىر بۇرىشىندا ءاينەكتەردى ارنايى قوراپتارعا قاپتاۋمەن اينالىساتىن ولەگ ششەگولەۆتىڭ مۇندا كەلگەنىنە ەكى جىلدان اسىپتى. جالاقىسىن كۇندەلىكتى ىستەگەن جۇمىسىنىڭ اۋقىمىنا قاراي ايىنا 100-130 مىڭ تەڭگەنى قۇرايتىن كورىنەدى. ىسكەر مامان كومپانيانىڭ جۇمىس بەرۋشىگە تالابى قانداي بولسا, جۇمىس ءىستەۋگە دە سونشالىقتى قاجەتتى جاعداي تۋعىزىلىپ وتىرعانىن ايتىپ بەردى.
«نەگىزگى ماماندىعىم دانەكەرلەۋشى. بىراق, قازىرگى جۇمىسىما دا كوڭىلىم تولادى. ءوندىرىستىك عيمارات قىستا جىلى, جازدا سالقىن. تۇسكى جانە كەشكى تاماقتار كومپانيا ەسەبىنەن تولەنەدى. ايلىعىمىز ءوز ۋاقىتىندا بەرىلەدى. باسشىمىز اركادي رۋبتسوۆتىڭ ادىلدىگى مەن ادامگەرشىلىگىن جوعارى باعالايمىن», – دەيدى و.ششەگولوۆ. ءاڭگىمەلەسۋ بارىسىندا دا جۇمىسىنان ءبىر ءسات اجىراماعان جاستىڭ ەڭبەكسۇيگىشتىگى مەن جاۋاپكەرشىلىگى ءبىزدى دە ءتانتى ەتتى.
جۋرناليستىك كەزدەسۋلەر كەزىندە ەلىمىزدەگى تابىستى تۇلعانىڭ ءبىرى, ورال قالاسىنداعى «ستەكلو-سەرۆيس» جشس-ءنىڭ باس ديرەكتورى اركادي رۋبتسوۆ جونىندە مۇندا تىكەلەي قىزمەت جاساپ جۇرگەندەر ءوز وي-پىكىرلەرىن بىزگە بىلايشا جەتكىزدى. اتاپ ايتقاندا, ونىڭ ورىنباسارى ارمان وتەشقاليەۆ تومەندەگىشە تىلەك ءبىلدىردى.
«ستەكلو-سەرۆيستە» ون التى جىلدان بەرى قىزمەت اتقارىپ كەلەمىن. ەڭ العاش ورتاق ءىسىمىزدى باستاعان كەزىمىزدە شاعىن عانا «رۋبتسوۆ» جەكە كاسىپكەرلىگى دەگەن دۇكەن بولدى. اركاديمەن ورال قالاسىنداعى №25 مەكتەپتە بىرگە وقىدىم. كەيىننەن قۇرىلىستا ەڭبەك ەتتىم. ۋنيۆەرسيتەت بىتىرگەن سوڭ تۇراقتى جۇمىس تاپپاي جۇرگەنىمدە رۋبتسوۆتى جولىقتىردىم. ول ماعان دۇكەنىندە جۇك تيەۋشىگە عانا جۇمىس بارىن ايتتى. كەلىسە كەتتىم. ءبىر جىلدان سوڭ جۇرگىزۋشى بولدىم. سودان سوڭ ءبىرتىندەپ سەنىمدى كومەكشىسىنە اينالدىم. 2007 جىلدان باستاپ ورىنباسارى بولىپ تاعايىندالدىم. وسى جىلدار ىشىندە سول شاعىن دۇكەننىڭ بىرتىندەپ وركەندەپ, ۇلكەن ءوندىرىس وشاعىنا اينالعانىنا كۋا بولدىم. وسىلايشا ويلاعان ارماندارىمىزعا قول جەتكىزدىك. مەنىڭ قازىرگى مىندەتىم – ەلىمىزدىڭ بارلىق وڭىرلەرىنە جانە رەسەي وبلىستارىنا ۆاگونمەن شىنى ونىمدەرىن ساۋدا-ساتتىققا شىعارۋ. اركادي اناتولەۆيچ – جاڭاشىلدىقتى جانى سۇيەتىن ىسكەر باسشى. ماقساتىمىز ورتاق. بۇل – باسەكەلەستىككە توتەپ بەرۋ ارقىلى حالىق سۇرانىسىنا يە بولۋ».
بۇگىنگى ماتەريالىمىزدى تابىستى تۇلعا – اركادي رۋبتسوۆ جونىندە ارىپتەستەرى جەتكىزگەن وسى وي-پىكىرلەرمەن تۇيىندەگەندى ءجون كورەمىز.
كاۋسار بايعاليەۆا,
جۋرناليست,
تەمىر قۇسايىن,
«ەگەمەن قازاقستان»
ورال
