مەرەكە قارساڭىنداعى ماراپات

كەشە جوعارعى سوت توراعاسى قايرات ءمامي باق باسشىلارى مەن قىزمەتكەرلەرىن, سوتتاردىڭ ءباسپاسوز قىزمەتىنىڭ وكىلدەرىن كەلە جاتقان كاسىبي مەرەكە – بايلانىس جانە اقپارات قىزمەتكەرلەرى كۇنىمەن قۇتتىقتادى. كەزدەسۋدە ق.ءمامي: «زاماناۋي دە­مو­كراتيالىق جانە قۇقىقتىق مەملەكەت ءۇشىن قوعامنىڭ بارلىق وكىلدەرىن ساياسي ءومىر­گە بەلسەندى ارالاستىرۋ ماڭىزدى. ال بۇل ماسس-مەديانىڭ قاتىسۋىنسىز مۇمكىن ەمەس. وسى رەتتە باق حالىق پەن بيلىك ارا­­­سىنداعى التىن كوپىر ىسپەتتى. ءبىر جا­عىنان ولار ادامداردى تولعاندىراتىن ءما­­سە­لە­لەردى ايتسا, ەكىنشى جاعىنان ولار­دى شەشۋدىڭ جولدارىن حابارلايدى», دەدى. سوتتاردىڭ باق-پەن ءوزارا ءىس-قي­مىلىنىڭ ماڭىزدىلىعىن ايتا كەلە, ول سوتتار قولدانىستاعى زاڭناما نەگى­زىندە باق-پەن جۇمىس ىستەۋگە دايىن ەكەندىگىن اتاپ ءوتتى. بۇل ءۇشىن بارلىق قاجەتتى جاعداي جاسالعان. سوتتاردىڭ باق-پەن ءوزارا ءىس-قيمىلىنىڭ جاڭا تۇجىرىمداماسى قابىلداندى, وڭىرلەردە ۇيلەستىرۋشى-سۋديالار مەن ءباسپاسوز قىزمەتتەرى بەلسەندى جۇمىس ىستەۋدە. 2015 جىلدىڭ قورىتىندىسى بويىنشا باق-تا 53 مىڭنان استام ماتەريال جارىق كوردى. كەزدەسۋ بارىسىندا جوعارعى سوت توراعاسى «100 ناقتى قادام» ۇلت جوس­پارىنىڭ زاڭ ۇستەمدىگىن قامتاماسىز ەتۋ بولىگىن ىسكە اسىرۋ بارىسى تۋرالى ايتىپ ءوتتى. اتاپ ايتقاندا, سوت جۇيەسىنە جۇكتەلگەن 11 قادامنىڭ بارلىعى ورىندالدى. وسى جۇمىستىڭ ناتيجەسىندە وتاندىق سوت جۇيەسى جاڭعىرتىلدى. ماسەلەن, 2016 جىلعى 1 قاڭتاردا سوتتار ءۇش ساتىلى سوت تورەلىگى جۇيەسىنە كوشتى, جوعارعى سوت جانىنان سوت تورەلىگى اكادەمياسى, حالىقارالىق كەڭەس پەن مامانداندىرىلعان سوت القاسى قۇرىلدى. پروكۋرورلاردىڭ ازاماتتىق ىستەر بويىنشا سوتقا قاتىسۋى زاڭنامالىق تۇرعىدا قىسقارتىلدى. تەرگەۋ سۋديالارىنىڭ قۇزىرەتى كەڭەيتىلدى. سۋديالاردىڭ جاڭا ادەپ كودەكسىنىڭ جوباسى ازىرلەندى. جوبا جوعارعى سوت جانىنداعى حالىقارالىق كەڭەستىڭ وتىرىسىندا ماقۇلداندى. بۇل قۇجات بويىنشا ەۋروپالىق كەڭەستىڭ ۆەنەتسيا كوميسسياسى ساراپشىلارىنىڭ قورىتىندىسى الىندى. كودەكس اعىمداعى جىلدىڭ كۇزىندە وتەتىن سۋديالاردىڭ سەزىندە قابىلدانادى دەپ كۇتىلۋدە. كەزدەسۋ شەڭبەرىندە جوعارى سوت ورگانىنىڭ باق-پەن ءوزارا ءىس-قيمىلىن ۇيلەستىرەتىن سۋديا باعلان ماقۇلبەكوۆ ءسوز سويلەدى. باق وكىلدەرىن كاسىبي مە­رەكەلەرىمەن قۇتتىقتاي كەلىپ, ول: «سوت جۇيەسىنىڭ اقپاراتتىق اشىقتىعى مەن ايقىندىعى – سۋديالاردىڭ VI سەزىندە مەملەكەت باسشىسى ايقىنداعان جۇ­مىستىڭ باسىم باعىتتارى. مۇنداعى ماڭىزدى مىندەت – سوتقا قۇجاتتار كەلىپ تۇسكەننەن باستاپ, شەشىم قابىلدانعانعا دەيىنگى كەزەڭدەگى سوت جۇمىسىن قوعامعا دۇرىس ءتۇسىندىرۋ», دەدى. بۇعان قوسا, ول جيىن­عا قاتىسۋشىلاردى سوتتاردىڭ قىز­مەتىن اقپاراتتىق سۇيەمەلدەۋ بويىنشا اعىم­داعى جۇمىستىڭ بارىسىمەن تانىس­تىردى. بارلىق وبلىستىق جانە وعان تەڭەس­تىرىل­گەن سوتتاردا وڭىردەگى سوت كور­پۋسىنىڭ باستى سپيكەرلەرى رەتىندە باق-پەن ءوزارا ءىس-قيمىلعا جاۋاپتى ءۇي­لەستىرۋشى-سۋديالار قىزمەتى ەنگىزىلدى. ولار بارلىق وڭىرلىك جانە رەسپۋبليكالىق باق ءۇشىن بارىنشا اشىق ءارى ءوزارا بايلانىستى قامتاماسىز ەتۋى ءتيىس. اتالعان سۋديالار باق-تا جاريالانعان بارلىق سىني ماتەريالدار, تۇيتكىلدى ماسەلەلەر ءجو­نىندە ۇنەمى ءبىلىپ قانا قويماي, ولار بو­يىن­شا دەن قويۋ شارالارىن ازىرلەۋى قاجەت. كەزدەسۋدە سوت جۇيەسىنىڭ اقپاراتتىق جۇمىس بولىگىندەگى كەيبىر جەتىستىكتەرى اشىپ ايتىلدى. اتاپ ايتقاندا, ين­تەرنەتتە جۇيەلى جۇمىس العا قويىلدى. جوعارعى سوت پەن جەرگىلىكتى سوتتاردىڭ رەسمي ۆەب-سايتتارىنىڭ جۇمىسى جاڭعىرتىلدى. 2014 جانە 2015 جىل­دارداعى «قازكونتەنت» اق-تىڭ رەيتينگىسىنىڭ قورىتىندىسى بويىنشا جوعارعى سوتتىڭ رەسمي ينتەرنەت-رەسۋرسى بارلىق ورتالىق مەملەكەتتىك ورگانداردىڭ ۆەب-سايتتارى اراسىندا قاتارىنان ەكى مارتە ءبىرىنشى ورىندى يەلەندى. جوعارعى سوتتىڭ ءباسپاسوز قىزمەتى سوتتار جۇمىسىنىڭ وزەكتى تاقىرىپتارى بويىنشا بەينەبلوگ جۇرگىزىپ كەلەدى. وسى رەتتە 15 بەينەبلوگ ازىرلەندى. ولاردى كورۋدىڭ جالپى سانى شامامەن 400 مىڭدى قۇرادى. سالتاناتتى شارادا جينالعان باق وكىلدەرى اتىنان «ەگەمەن قازاقستان» رەسپۋبليكالىق گازەتى» اكتسيونەرلىك قوعامىنىڭ باسقارما توراعاسى ەركىن قىدىر ءسوز سويلەدى. ول سوزىندە بۇگىندە جوعارعى سوت ەلباسىنىڭ تاپسىرمالارى نەگىزىندە قۇقىقتىق جانە سوت رەفورمالارىن تىڭعىلىقتى جۇرگىزىپ كەلە جاتقانىن, مۇنىڭ ءبارى زاڭ ۇستەمدىگىنىڭ ارتىپ, ادىلدىكتىڭ سالتانات قۇرۋىنا جەتەلەپ وتىرعانىن اتاپ ءوتتى. «وسى ارقىلى حالىقتىڭ سوتقا سەنىمى ارتادى, وسى سەنىم ارقىلى مەملەكەت بەدەلى وسەدى», دەدى ول. ءىس-شارادا قايرات ءمامي باق وكىل­دەرىنە قۇرمەت گراموتالارى مەن ەستەلىك سىيلىقتار تاپسىردى. ولاردىڭ اراسىندا مۇنداي قۇرمەتكە «ەگەمەن قازاقستاننىڭ» شولۋشىسى الەكساندر تاسبولاتوۆ تا يە بولدى. نۇرلىبەك دوسىباي, «ەگەمەن قازاقستان»