شىن جۇيرىك توپ ىشىندە تانىلادى

[caption id="attachment_48022" align="alignleft" width="264"] Rio2016_AO[/caption]

وليمپيادانىڭ باستالۋىنا 43 كۇن قالدى

سوڭعى اپتانىڭ ىشىندە قازاقستان سپورتشىلارىنىڭ ريو وليمپياداسىنا قاتىسۋ ءۇشىن العان ليتسەنزيالارىنىڭ سانى تاعى 3-كە ارتىپ, بارلىعى 102-گە جەتتى. الامانعا ات قوساتىن ساڭلاقتارىمىز قاتارى وسىلايشا بىرتىندەپ كوبەيىپ كەلە جاتىر. سونىڭ ىشىندە جەڭىل اتلەتتەر 22 ۇمىتتىگە دەيىن ءوستى. ودان كەيىنگى ورىندى 11 جولدامانى بايداركا مەن كانوەدا ەسۋشىلەر السا, ءۇشىنشى ساتىنى اربىرىندە 10 ورىن بار بوكسشىلار مەن اۋىر اتلەتتەر الىپ وتىر. بۇلاردىڭ بارلىعىندا سپورتشىلار تيەسىلى جولدامانى وزدەرى جەڭىپ العان بولسا, اۋىر اتلەتتەردە ول كوماندالىق سيپاتتا بەرىلەدى. سوندىقتان سپورتتىڭ وسى تۇرىنەن عانا ازىرگە ريوعا كىمدەردىڭ باراتىندارى بەلگىسىز. مۇنىڭ الدىندا كۇرەستىڭ بارلىق تۇرلەرى بويىنشا قۇراما ساپىنا كىرگەندەر جاريالانعان بولاتىن. بىزدەگى ەڭ ءبىر وزەكتى تاقىرىپ قازىر وسى زىلتەمىرشىلەر توڭىرەگىنەن تۋىنداعان داۋ-دالابا بولىپ وتىر. ازىرگە بۇل ماسەلەگە تولىق نۇكتە قويىلىپ, تياناقتالىپ بىتكەن جوق. وسى رەتتە بۇرناعى كۇنى لوزاننادا وتكەن حالىقارالىق وليمپيالىق كوميتەت ءسامميتىنىڭ بىلتىرعى كۇزدەن بەرى دوپينگ داۋىنا ۇشىراپ جاتقان رەسەي جەڭىل اتلەتتەرىنىڭ وليمپياداعا قاتىسۋىنا قارسىلىق بىلدىرمەيتىن شەشىم قابىلداۋى كوڭىلگە ەپتەپ ءۇمىت ساۋلەسىن ۇيالاتادى. وسىعان قاتىستى قورىتىندى جيىن 30-31 شىلدە كۇندەرى قارالىپ, ەڭ سوڭعى تۇجىرىمى شىعارىلادى. دەگەنمەن, اۋىزدى قۋ شوپپەن سۇرتە بەرەتىن رەتىمىز جوق. سپورتتىڭ باسقا سالالارىنان دا تىم قارا جاياۋ ەمەسپىز. سونىڭ ىشىندە بوكسشىلار مەن جەڭىل اتلەتتەرگە, سونداي-اق بالاۋاندارىمىزعا ارتاتىن ۇمىتتەرىمىز زور. سوندىقتان قازان اۋزىن جوعارى سانايتىن ۋاقىت تا جاقىنداپ كەلە جاتقانىنا سەنۋىمىز كەرەك.

اۋىر اتلەتتەردىڭ احۋالى قانداي؟

قازىرگى تاڭدا قازاقستاندىق سپورتسۇيەر قاۋىمدى ەرەكشە تولعاندىرىپ وتىرعان ماسەلەنىڭ ءبىرى وسى بولسا كەرەك. ال سوڭعى ۋاقىتتارى بىزگە جەتىپ جاتقان اقپارلار ونشالىقتى كوڭىلدى قۋاندىرىپ وتىرعان جوق. اپتانىڭ باسىندا حالىقارالىق اۋىر اتلەتيكا فەدەراتسياسى (IWF) يليا ءيلينىڭ بەيجىڭدەگى سىناماسىنان دا دوپينگ بەلگىسى, دالىرەگى, ستانوزولول تابىلعانىن حابارلادى. بۇعان دەيىن ونىڭ لوندونداعى سىناماسىنان تىيىم سالىنعان دەگيدروحلورومەتيلتەستوستەرون دەگەن پرەپارات شىققانى بەلگىلى بولعان ەدى. ساراپشىلار وسىعان قاراپ, قازىر قازاقستان سپورتىنا ۇلكەن قاۋىپ ءتونىپ تۇرعانىن ايتىپ جاتىر. ولار مۇنىڭ سوڭى ەلىمىزدىڭ اۋىر اتلەتيكا قۇراماسىن تۇگەلدەي ريوعا جىبەرمەۋ جونىندە شەشىم قابىلداۋعا اپارىپ سوقتىرۋى مۇمكىن ەكەنىن دە العا تارتادى. ەگەر حالىقارالىق وليمپيالىق كوميتەت قازاقستان اۋىر اتلەتتەرىن كىنالى دەپ تاپسا, ولار بەيجىڭ مەن لوندوندا جەڭىپ العان مەدالدارىن تۇگەل قايتارىپ بەرۋگە ءماجبۇر بولادى. وسىلايشا 5 بىردەي التىن جۇلدە كەرى قاراي قايتادى. قازاقستان ۇكىمەتى بۇل دوپينگ داۋىنا قاتىستى سوڭعى شەشىمدى حوك قابىلدايتىنىن, ال بيلىك تاراپىنان سپورتشىلارعا قۇقىقتىق قولداۋ جاسالاتىنىن تالاي مارتە مالىمدەدى. 21 ماۋسىمدا قازاقستان پرەمەر-ءمينيسترى كارىم ءماسىموۆ ۇلتتىق وليمپيادا كوميتەتىنىڭ توراعاسى تيمۋر ق ۇلىباەۆقا ريو-دە-جانەيرو ويىندارى الدىندا سپورتشىلاردى تۇگەل تەكسەرۋدى تاپسىردى. «قازىرگى تاڭدا قازاقستان مەن رەسەي سپورتشىلارىنىڭ دوپينگ قولدانۋىنا قاتىستى كوپتەگەن سۇراقتار تۋىنداپ وتىر. مۇمكىندىكتەردى قاراستىرۋىمىز كەرەك. بالكىم, جەكە دەمەۋشىلەردىڭ ەسەبىنەن جاقسى زەرتحانا ساتىپ الۋىمىز قاجەت شىعار. سوندا ءبىزدىڭ سپورتشىلار جارىسقا قاتىسپاس بۇرىن وسى تەستتەن وتە الادى» دەدى پرەمەر-مينيستر. قازاقستان ۇلتتىق وليمپيادا كوميتەتىنىڭ وكىلدەرى «ەندى بۇل داۋ قازاقستاندا شەشىلمەيدى. 27 ماۋسىمدا بولاتىن حوك تارتىپتىك كەڭەسى وتىرىسىنىڭ شەشىمىن كۇتەمىز» دەگەندى ايتتى.  مۇرات ايتقوجا