قازاقستان رەسپۋبليكاسى قارۋلى كۇشتەرى ۇلتتىق اسكەري-پاتريوتتىق ورتالىعىنىڭ اسكەري-تاريحي مۋزەيىندە ۇلى وتان سوعىسى باستالۋىنىڭ 75 جىلدىعىنا ارنالعان كورمە اشىلدى. ونى اتالعان مۋزەيدىڭ كومەگىمەن «مەموريالدى ايماق» ىزدەۋ جاساعىنىڭ كومانديرى مايدان قۇسايىنوۆ ۇيىمداستىردى.
بۇل اسكەري ءىس-قيمىلدار بارىسىندا قازا تاپقان جاۋىنگەرلەر مەن كومانديرلەردىڭ جەكە زاتتارىنان جيناقتالعان تمد ەلدەرىندەگى وسىنداي العاشقى كورمە بولىپ تابىلادى. ياعني, كورمەنىڭ شەڭبەرى ۇلى وتان سوعىسىنىڭ كەزەڭىن قامتۋمەن شەكتەلەدى. ونىڭ بىرەگەيلىگى دە سول, ەكسپوزيتسيالاردا ۇسىنىلعان زاتتار ۇرىس دالاسىنان تابىلعان. ال قۇرامى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ ستۋدەنتتەرىنەن جاساقتالعان, مايدان كومەك ۇلى جەتەكشىلىك ەتەتىن «مەموريالدى ايماق» ىزدەۋ جاساعى ەرلىكپەن قازا تاپقان جاۋىنگەرلەر مەن كومانديرلەردى ىزدەپ تاۋىپ, ولاردىڭ اتتارىن قالپىنا كەلتىرۋمەن اينالىسادى.
كۇنى بۇگىنگە دەيىن تمد ەلدەرىنىڭ ىزدەۋ جاساقتارى ۇرىس دالالارىنان تاپقان مەدالونداردىڭ ناتيجەسىندە ۇلى وتان سوعىسىنىڭ 20 مىڭنان استام جاۋىنگەرى مەن كومانديرىنىڭ اتى-جوندەرى بەلگىلى بولىپ وتىر. ءوز كەزەگىندە, «مەموريالدى ايماق» جاساعى ۇرىس دالاسىنان 10 ادامنىڭ اتى-ءجونىن, ال ارحيۆتىك ىزدەۋ بارىسىندا 2607 ادامنىڭ اتى-ءجونىن انىقتادى. كەيبىر ەسىمدەردى ناگرادالارىنىڭ نومىرلەرى بويىنشا انىقتاۋ مۇمكىن بولعان.
انىقتالعان ەسىمدەردىڭ تەك 10 پايىزى عانا ولاردىڭ تۋعان-تۋىسقاندارىنا بەلگىلى بولىپ وتىر ەكەن. مىنە, ءدال سوندىقتان دا جاساققا جۇرتشىلىقتىڭ نازارى مەن كومەگى اۋاداي قاجەت كورىنەدى. بۇل ارادا, اسىرەسە, جاساق پەن تۋىسقاندار اراسىن جالعايتىن بۇقارالىق اقپارات قۇرالدارىنىڭ ءرولى اسا جوعارى بولماق.
«مايدان دالاسىنان جەتكەن ەسىمدەر» ەكسپوزيتسياسىنا قازۋ ورىندارىنان تابىلعان بىرەگەي فوتوسۋرەتتەر, سناريادتاردىڭ جارىقشاقتارى, سولداتتاردىڭ مەدالوندارى, قىزىل اسكەر كىتاپشالارى, جاۋىنگەردىڭ جارالانعانى تۋرالى انىقتامالار, وق-دارىلەر, وقتان ساقتايتىن بويتۇمار رەتىندە قولدانىلعان «كويلەكتى» پاتروندار, ت.ب. قويىلعان.
كورمە بارىسىندا, سونداي-اق, تمد ەلدەرى ىزدەۋ جاساقتارىنىڭ بىرلەسكەن جۇمىستارىنىڭ قورىتىندىلارى تۋرالى اقپارات بار بىرقاتار كىتاپتىڭ تۇساۋكەسەرلەرى وتكىزىلەدى دەپ جوسپارلانىپ وتىر.
«ەگەمەن-اقپارات»
سۋرەتتەردە: كورمەدەگى ەكسپوناتتار; «مەموريالدى ايماق» ىزدەۋ جاساعىنىڭ كومانديرى م.قۇسايىنوۆ
سۋرەتتەردى تۇسىرگەن
ەرلان وماروۆ
