ورازا ارىقتاۋدىڭ امالى ەمەس

بۇگىنگى تاڭدا ورازا ۇستاپ, اۋىز بەكىتۋدى «ارىقتاۋدىڭ امالى» دەپ سانايتىنداردىڭ قاتارى ارتىپ كەلە مە, قالاي؟ وسىناۋ قاسيەتتى ايدا مۇسىلمانعا مىندەتتەلگەن بەس پارىزدىڭ ءبىرىن وتەي وتىرىپ, ونى سالماق تاستاۋدىڭ بىردەن-ءبىر جولى رەتىندە قاراستىراتىن جاستاردىڭ وسى تەكتەس ويلارىن ءجيى ەستىپ جاتامىز. ارينە, كوپكە توپىراق شاشۋدان اۋلاقپىز, دەسەك تە ايلاردىڭ سۇلتانى رامازان جاقىنداعاننان-اق ارىقتاۋ باعدارلاماسىن جاساپ الاتىن جانداردىڭ اۋىز بەكىتۋدى ديەتامەن شاتاستىراتىنى قىنجىلتادى. اسا قادىرلى دە قاسيەتتى ايدى ساۋاپ جيناۋعا ەمەس, سالماق تاستاۋعا ارنايتىنداردىڭ مۇسىلماندىق پارىز تۋرالى ءبىلىمىن جەتىلدىرۋ قاجەت سىڭايلى. جىلىنا ءبىر كەلەتىن بەرەكەلى ايدىڭ پەندەگە بەرەر امال-ساۋابى مەن ريزىق-نەسىبەسى مول. بۇل رەتتە, ءتىپتى, اۋىز بەكىتۋدى ارتىق ابىروي ساناپ, الەۋمەتتىك جەلىگە اۋىز اشار اس-تاماعىن سالىپ, ءدۇيىم جۇرتقا جار سالاتىنداردى دا ءجيى كەزدەستىرىپ ءجۇرمىز. انىعىندا, ون ەكى ايدىڭ ۇلىسى – رامازاننىڭ كۇللى مۇسىلمان جۇرتشىلىعىنا تيگىزەر پايداسى, اكەلەر العىسى كوپ. وسى ءبىر ساۋاپتى ايدىڭ سالماعىن شالا نيەتپەن ەمەس, شىن كوڭىلمەن ۇعىنا بىلگەن جاننىڭ ۇستاعان ورازاسى قابىل بولارى حاق. ەڭ الدىمەن, ورازا ۇستاۋ – مۇسىلمان باۋىرعا مىندەتتى بەس پارىزدىڭ ءبىرى. ادام بالاسىنىڭ ءون بويىنداعى سابىرلىق-قاجىرىنىڭ ساراپقا سالىنار تۇسى – اللا جولىندا اۋىز بەكىتۋى ەكەندىگى امبەگە ايان. ايلاردىڭ تورەسى – قاسيەتتى رامازاندا تاڭ شاپاعى كوككە كوتەرىلگەن ساتتەن, كۇن ۇياسىنا باتقان شاققا دەيىن ءنار تاتپاۋى – مۇسىلمان جۇرتشىلىعىنا قويىلاتىن ەڭ ۇلكەن پارىزداردىڭ ءبىرى. اللانىڭ ريزاشىلىعىنا بولەنۋدىڭ داڭعىل جولى جانە داۋلەتى تاسىعان باي مەن قالتاسى جۇقارعان كەدەيدىڭ تەڭەلەر تۇسى دا وسى ايدا. ءبىر ايعا جۋىق ۋاقىتتى قامتيتىن ورازا سارقىلماس ساۋاپ پەن كول-كوسىر سابىردى سىيعا تارتادى. ادام بالاسىنىڭ جامان قاسيەتتەردەن ارىلىپ, ادال جولعا اياق باسۋىنا, رۋحاني كەمەلدەنۋىنە جول اشادى. بۇل اي – تاۋداي تاسىعان تاكاپپار كوڭىلدىڭ مىسىن باسىپ, قاراپايىم قارا جولدىڭ قۇنىن تانىتادى. اۋىز بەكىتىپ, استان تىيىلۋدىڭ ءمانى دە قولدا باردىڭ قادىرى مەن ءشول باسار قارا سۋدىڭ قاسيەتىن بارشاعا ۇعىندىرۋ ەمەس پە؟ الەمدە اشتىقتىڭ اۋىر زاردابى مەن قاسىرەتىن تارتىپ وتىرعان ميلليونداعان حالىقتىڭ اۋىر دا قايعىلى جاي-كۇيىن سەزىنۋ ارقىلى ادامزات تاۋبەسىنە كەلمەي مە؟ ورازا ايى اۋىزدى استان تىيۋ عانا ەمەس, كورەر كوز بەن ەستىر قۇلاقتىڭ حارام دۇنيەلەردەن قاشىقتا بولۋىن, جان سارايىنىڭ جۋىلىپ تازارۋىن ماقسات تۇتادى. بۇل اي – عايبات ءسوزدىڭ تامىرىن كەسىپ, اۋىزدان سالماقتى دا ساليقالى ءسوزدىڭ شىعۋىنا, ءار ءىستىڭ جاقسىلىققا جۇمسالۋىنا جول باس­تايدى. ءار ادام بالاسىنىڭ جۇرەگىنە يمان وتىن ۇرلەيدى, ءوز ءناپسىسىن تىيۋعا ۇندەيدى. ساۋابى مول بۇل اي – جان-جۇرەكتى جۇمسارتىپ, جان مەن ءتاندى بار كۇنادان تازارتادى. اۋرۋدان قۇلان-تازا ايىقتىرىپ, سان ءتۇرلى دەرتكە شيپا سىيلايدى. جاقسىلىققا جول باستاۋشى, ىزگى امالعا وي تاس­تاۋشى – رامازاننىڭ سول ءۇشىن دە قۇنى قىمبات, قاسيەتى جوعارى. ورازا ايى – جاراتۋشىنىڭ پەندەلەرىنە بەرگەن ەڭ باعالى تارتۋى, ەڭ ۇلى سىيى. سوندىقتان دا اپتاپ ىستىقتا اۋىز بەكىتىپ, يمان كەلتىرگەندەر اللانىڭ سانسىز مول ساۋابىنا, ريا­سىز رازىلىعىنا بولەنەدى. ال ساۋاپ­تى ايدىڭ مۇمكىندىگىن سالماقتان ارىلۋ مەن ارزان اتاق-ابىرويعا جۇمسايتىندار بۇل سارقىلماس سىيدان قۇر قالارى اقيقات. ولاي بولسا, قاسيەتتى ايدا ساۋاتسىز ويعا سالىنىپ, اللادان توگىلەر مول شاپاعاتتان قاپىدا قالىپ كەتپەگەنىمىز ابزال. ارايلىم تاستەمىر, ق.ا.ياساۋي اتىنداعى  حالىقارالىق قازاق-تۇرىك ۋنيۆەرسيتەتىنىڭ 2-كۋرس ستۋدەنتى