نەمەسە ىزگىلىك ىسىنە ميلليونداپ قارجى بولسە دە قازانى ورتايماعان ساڭلاقتار
بۇرىن سپورتقا ءبىرىنشى كەزەكتە سايىس, جارىس جولىنداعى تارتىس, شىن مىقتىنى انىقتايتىن ايقاس, ءوزىڭنىڭ, سونداي-اق ەلىڭنىڭ اتىن شىعاراتىن باسەكە دەپ قارايتىن ەدىك. بۇگىندە بۇل انىقتامالاردىڭ الدىنا اقشا, بايلىق دەگەن دۇنيەلەر شىقتى. سوندىقتان, قازىر بۇكىل الەم سپورتتى الدىمەن تابىس كوزى رەتىندە تانيدى. باسقاشا بولۋى دا مۇمكىن ەمەستەي.
سەبەبى, قازىرگى تاڭداعى فۋتبولشىلاردىڭ جالاقىسىن ساناساق, ەسەپتەن جاڭىلامىز. كورتقا شىققان سايىن كوك اقشاعا قارىق بولاتىن تەننيسشىلەردىڭ دە جايى سونداي. جۇمىرتقاداي دوپتى بەلگىلەنگەن شۇڭقىرعا ءدوپ تۇسىرسەڭىز, قالتاڭىز قامپايىپ شىعا كەلەتىن گولف دەگەن سپورت ءتۇرى تاعى بار. وزگەلەردەن جۇلدەسى كوپ بولعاندىقتان شىعار, وعان اقسۇيەكتەر ويىنى دەپ ايدار تاعىپ, اسپەتتەپ جاتادى.
تابىسى مول تارتىس تۇرلەرىنىڭ قاتارىنا باسكەتبول مەن حوككەيدى دە قوسساڭىز بولادى. ونى اقش-قا بارىپ ويناساڭىز, باسىڭىزعا باق قوندى دەي بەرىڭىز. ويتكەنى, ول جاقتاعى باسكەتبولشىلار مەن حوككەيشىلەردى بۇگىندە الەم بايلارىنىڭ تىزىمىنەن تاباسىز.
ءيا, جەر بەتىندە بايلىققا بەلشەسىنەن باتقانداردى جازىپ جۇرەتىن «فوربس» جۋرنالىنىڭ نازارىنا ىلىنگەندەردىڭ قاتارىندا سپورتشىلار جەتىپ-ارتىلادى. مىسالى, رودجەر فەدەرەر, نوۆاك دجوكوۆيچ, كريشتيانۋ رونالدۋ, كوبە برايانت, تايگەر ۆۋدز, ليونەل مەسسي, ماريا شاراپوۆا, سەرەنا ۋيليامس... الگى جۋرنالعا اتى جازىلعان سپورتشىلاردىڭ ءتىزىمى وسىلاي جالعاسا بەرەدى. ءبارى اتاقتى, ءبارى باي. جىلدىق تابىستارى 15-20 ميلليوننان باستالىپ, 70-80 ميلليون اقش دوللارىنا دەيىن جەتەدى. دەگەنمەن, ءبىزدىڭ بۇگىنگى ايتپاعىمىز مۇلدەم باسقا. كوزدەگەنىمىز, سپورتشىلاردىڭ تابىسىن ەمەس, ولاردىڭ قايىرىمدىلىققا جۇمساعان قارجىسىن ساناۋ. سول ارقىلى, ۇلتى بولەك بولسا دا ۇلگىسى ورتاق جانداردىڭ يگى ىستەرىنەن ونەگە الۋ جانە قاسيەتتى رامازان ايىندا جۇرەككە جىلۋ سىيلايتىن ىزگى امالداردى ناسيحاتتاۋ.
راسىمەن, بۇگىندە الەم تانىعان داڭقتى سپورتشىلاردىڭ كوبى جارلى-جاقىبايعا قولۇشىن سوزىپ, قولداۋ ءبىلدىرۋدى وزدەرىنە مىندەت ەتىپ العان. ءتىپتى, ارنايى قور اشىپ, مەشەۋ قالعان ەلدەردەگى ءبىلىم مەن مەديتسينانىڭ ىلگەرىلەۋىنە ۇلەس قوسىپ جۇرگەن سپورتشىلار دا بار. سانانى تۇرمىس بيلەگەن قازىرگى زاماندا مۇنداي قادامعا بارۋ, الدىڭداعى ادال اسىڭدى وزگەمەن ءبولىسۋ – ءبىزدىڭ ۇعىمىمىزشا, اتىمتاي جومارتتىق. قازاق «جاقسىنىڭ جاقسىلىعىن ايت» دەيدى. ەندەشە, شەبەرلىگىمەن عانا ەمەس, اتىمتاي جومارتتىعىمەن دە كوپكە ۇلگى بولىپ جۇرگەن سپورتشىلاردىڭ قايىرىمدى ىستەرىنە نازار اۋدارايىق.
ءبىر مەزەتتە 1,5 ميلليون دوللار بولگەن
ءبىز ءوز ءتىزىمىمىزدى قازىرگى تاڭداعى الەم بويىنشا ەڭ ۇزدىك فۋتبولشىلاردىڭ ءبىرى, پورتۋگاليانىڭ باعىنا تۋعان سپورتشى كريشتيانۋ رونالدۋدان باستاۋدى ءجون كوردىك. بۇگىندە يسپانيانىڭ «رەال» (مادريد) كومانداسىندا وينايتىن رونالدۋ مۇقتاج جاندارعا كومەك كورسەتۋدى ءوزىنىڭ ازاماتتىق بورىشى سانايدى. بۇعان نەگىزگى سەبەپ – 2004 جىلى وڭتۇستىك-شىعىس ازيا ەلدەرىندە بولعان تابيعات اپاتى. سول كەزدە ءۇندى مۇحيتىنان كوتەرىلگەن جويقىن تسۋنامي جاعالاۋدى شايىپ كەتىپ, 250 مىڭداي ادامنىڭ ءومىرىن جالماعان ەدى. ەۋروپالىق اقپارات قۇرالدارىنا بەرگەن سۇحباتتارىنىڭ بىرىندە فۋتبولشى تسۋنامي جايىندا تەلەديدارداعى جاڭالىقتاردان بىلگەنىن ايتىپ: «ول كەزدە اعىلشىننىڭ «مانچەستەر يۋنايتەدىندە» وينايمىن. تەلەديداردان تابيعات اپاتى تۋرالى ايتتى. قاتتى اسەر ەتتى. ءبىز مىنا جاقتا شالقىپ جۇرگەندە, الەمنىڭ ءبىر بۇرىشىندا ادامدار ىشەرگە اس, كيەرگە كيىم تاپپاي قان قاقساپ جاتىر. باسپانا دەگەنىڭىز مۇلدەم جوق. ەڭ سوراقىسى, ادامدار تۋعاندارىنىڭ ءولى-ءتىرىسىن بىلمەيدى. قۇدايدان ءۇمىت ەتۋدەن باسقا امالدارى قالماعان. سول ساتتە تەلەديداردان قيراعان ءۇيىندىنىڭ اراسىندا جىلاپ تۇرعان 10-11 جاسار بالانى كورسەتتى. ۇستىنە ءبىزدىڭ ۇلتتىق قۇرامانىڭ جەيدەسىن كيىپ الىپتى. كوزىمە وتتاي باسىلدى. ول ازداي, جەتىنشى ءنومىرلى جەيدە. كوڭىلىم تولقىپ كەتتى. تەلەديداردىڭ جۇگىرتپە جولىنان ول ەلدىڭ يندونەزيا ەكەنىن ءبىلدىم. ءسويتتىم دە بوس ۋاقىتىمدا سول ەلگە تارتىپ وتىردىم. ماقساتىم – پورتۋگاليا جەيدەسىن كيگەن بالانى تاۋىپ, قولىمنان كەلگەنشە كومەك كورسەتۋ. «ساباقتى ينە ساتىمەن» دەگەندەي, ويلاعانىمنىڭ ءبارى جۇزەگە استى. سودان بەرى جاس بالالارعا ماتەريالدىق جانە رۋحاني قولداۋ كورسەتۋدى پارىزىم رەتىندە موينىما الدىم. اكەم دە جاقسىلىقتى ءجيى جاساۋ كەرەكتىگى جايىندا ايتىپ وتىراتىن», – دەپ اعىنان جارىلعان ەكەن.
بۇگىندە فۋتبولشى – «Save the Children» اتتى بالالار قۇقىعىن قورعايتىن قوردىڭ ەرىكتى ەلشىسى. سول سەبەپتى, ول كوبىنە ءبۇلدىرشىندەرگە كومەك قولىن سوزىپ كەلەدى. بالالار اشتىعىمەن كۇرەسەتىن قوردىڭ بىرقاتار يگى باستاماسىنا رونالدۋدىڭ تىكەلەي مۇرىندىق بولعانىن اتاپ وتكەن ءجون.
سونىمەن قاتار, پورتۋگاليالىقتىڭ 2013 جىلى گازا سەكتورىنداعى قاقتىعىستاردان زارداپ شەككەن پالەستينالىق بالالارعا 1,5 ميلليون اقش دوللارى كولەمىندە قارجىلاي كومەك كورسەتكەنىن بۇكىل الەم بىلەدى. حالىقارالىق قىزىل كرەست قايىرىمدىلىق قورىنا 100 مىڭ ەۋرو اۋدارعانىن دا اقپارات قۇرالدارى جارىسا جازدى. مي ديسپلازياسى دەرتىنە شالدىققان 10 ايلىق ەريك ورتيس ەسىمدى سابيگە 60 مىڭ ەۋروعا وپەراتسيا جاساتىپ بەرگەنى دە عالامتور بەتىن جاۋلاپ الدى.
فۋتبولشى تەك قارجىلاي كومەك قانا ەمەس, سونداي-اق, ءوزى تىكەلەي دونور بولىپ تا كوپكە ۇلگى كورسەتىپ كەلەدى. اتاپ ايتقاندا, 2013 جىلى اق قان اۋرۋىنا شالدىققان بالالارعا ءوز جىلىك مايىن ءبولىپ بەرىپ, ناۋقاستاردىڭ ايىعىپ كەتۋىنە سەبەپشى بولعان. ودان بولەك, سايىپقىراننىڭ ءارتۇرلى قايىرىمدىلىق شارالارىنا تۇراقتى قاتىسىپ تۇراتىنىن دا اقپارات قۇرالدارىنان ءجيى ەستىپ, كورىپ ءجۇرمىز.
285 مىڭ بالانى قامقورلىعىنا العان
تەننيس تاريحىنداعى ەڭ اتاقتى سپورتشىلاردىڭ ءبىرى ەمەس-اۋ, بىرەگەيى شۆەيتساريالىق رودجەر فەدەرەر ەكەنى داۋسىز. «ۇلكەن دۋلىعا» تۋرنيرلەرىنىڭ 17 دۇركىن جەڭىمپازى فەدەرەر دە كەدەي-كەپشىك بالالاردى قاناتىنىڭ استىنا العان. «Federer Foundation» اتتى قور قۇرىپ, افريكا قۇرلىعىنداعى بالالاردىڭ ءبىلىم الۋىنا تۇراقتى كومەك كورسەتىپ كەلەدى. بۇل جونىندە داڭقتى تەننيسشى: «ءجاسوسپىرىم كەزىمدە وڭتۇستىك افريكا رەسپۋبليكاسىنا ءجيى بارىپ تۇردىم. ءار بارعان سايىن قارا قۇرلىقتىڭ جاڭا قىرىن بايقايتىنمىن. ول جاقتا كەدەيشىلىك قالىپتى جاعدايعا اينالعان. سوندىقتان بولار, ماعان افريكاداعى كەدەيلەردىڭ بولاشاققا, ەرتەڭگى ومىرىنە دەگەن سەنىمى جوعالىپ بارا جاتقانداي كورىندى. سول كەزدە ىشتەي «مۇمكىندىگىم بولسا, وسى قۇرلىقتىڭ بالالارىنا ءبىلىم الۋعا جاعداي جاساسام» دەپ ارماندايتىنمىن. كەيىن سول ماقساتتا ارنايى قور قۇرىلدى», – دەيدى.
بۇگىنگە دەيىن قوردىڭ ەسەبىنەن 285 مىڭ افريكالىق جانە شۆەيتساريالىق بالا ءبىلىم الىپ, حات تانىعان. فەدەرەر 2018 جىلدىڭ اياعىندا بۇل كورسەتكىشتى 1 ميلليونعا جەتكىزىپ, افريكا حالقىنىڭ جارقىن بولاشاققا جەتۋىنە ۇزىمدەي بولسا دا ءوز ۇلەسىن قوسۋدى كوزدەيدى. بۇل ارەكەتىن ول: «ءبىلىمدى ادام ەڭ قۇرىعاندا كۇندەلىكتى اسىن ادالدان تاۋىپ جەۋگە قاۋقارلى. سول سەبەپتى, اعارتۋ سالاسىنا كوڭىل ءبولۋدى ءجون سانادىم», – دەپ تۇسىندىرەدى.
سونىمەن قاتار, رودجەر فەدەرەردىڭ ءوز اتىنداعى كيىم ۇلگىلەرىن شىعاراتىنى بەلگىلى. اتالعان كاسىپتەن تۇسكەن قارجىنىڭ ءبىر بولىگى قورعا اۋدارىلىپ وتىرادى. ودان بولەك, سپورتشى ارنايى قايىرىمدىلىق ويىندارىن وتكىزىپ, تۇسكەن قارجىنى تۇگەلىمەن قورعا اۋدارادى. ماسەلەن, 2014 جىلدىڭ سوڭىندا شۆەيتسارياداعى – تسيۋريح قالاسىندا وتانداسى ستانيسلاۆ ۆاۆرينكامەن جولداستىق كەزدەسۋ وتكىزدى. بيلەتتەردىڭ ساتىلىمىنان 1,3 ميلليون شۆەيتسار فرانكى تۇسكەن. بۇل – شامامەن 1,35 ميلليون اقش دوللارى. بارلىق قارجىنى مۇرتىن بۇزباستان قوردىڭ ەسەپشوتىنا اۋدارىپ, افريكاداعى بالالاردىڭ ءبىلىم الۋىنا جۇمساعان. «قازىر قوردىڭ جۇمىسى بەلگىلى ءبىر جۇيەگە ءتۇستى. جۇمىس باستاعانىمىزعا 10 جىلدان استى. سپورتتاعى وزگە ارىپتەستەرىم دە بۇل ىسىمە قولداۋ ءبىلدىرىپ كەلەدى. ەكى جىل بۇرىن فرانتسيا اشىق بىرىنشىلىگىندە ۇيىمداستىرۋشىلار چەمپيوناتتىڭ العاشقى اپتاسىندا جاسالعان ءار ەيستى 25 ەۋرومەن باعالاپ, شىققان سومانى ءبىزدىڭ قورعا اۋداردى. بۇل جەردە تەك ەرلەر مەن قىزدار باسەكەسىنىڭ جەكەلەي سىنى نازارعا الىنعانىن ايتا كەتەيىن. ناتيجەسىندە جەتى كۇننىڭ ىشىندە 1803 ەيس جاسالىپ, جالپى سوماسى 45 075 ەۋرو افريكا بالالارىنا كومەككە جۇمسالدى. بۇل ءۇشىن ۇيىمداستىرۋشىلارعا العىسىم شەكسىز», – دەيدى فەدەرەر. ەيس – تەننيسشىنىڭ ويىنعا قوسقان دوبىن قارسىلاسى قابىلداي الماي, سونىڭ ەسەبىنەن ۇپاي جازىلۋى.
قازىرگى تاڭدا «Federer Foundation» قورىنىڭ اياسى كەڭەيىپ, بەلگىلى كومپانيالارمەن ارىپتەستىك ورناتا باستادى. ولاردىڭ قاتارىندا نەمىستىڭ اتاقتى «Mercedes-Benz» اۆتوكونتسەرنى دە بار.
تۋعان جەرىنە قوس اۋرۋحانا سىيلاعان
ليونەل مەسسي. بۇل فۋتبولشىنى ءبۇگىندە تانىمايتىن ادام كەمدە-كەم. الەمنىڭ قاي بۇرىشىنا بارساڭىز دا مەسسيدىڭ سۋرەتىن كەزدەستىرۋگە بولادى. ون ءبىر جاسىندا ءوسۋ گارمونىنىڭ جەتىسپەۋشىلىگىنە شالدىعىپ, دەنساۋلىعى سىر بەرەدى. سوندىقتان بولار, ارگەنتينالىق فۋتبولشى بۇگىندە ناۋقاس بالالارعا كومەك كورسەتۋگە كوپ كۇش جۇمساۋدا. 2007 جىلى «Leo Messi Foundation» قورىن قۇرعان ول نەگىزىنەن بالالار اۋرۋحاناسىن سالۋمەن جانە جوندەۋمەن اينالىسادى. مىسال رەتىندە, تۋعان قالاسى روساريوداعى بالالار اۋرۋحاناسىن جوندەپ بەرگەنىن ايتساق بولادى. 600 مىڭ ەۋرو جۇمسالعان اۋرۋحانا تەك جوندەۋدەن ءوتىپ قانا قويماي, قور ەسەبىنەن جاڭا قۇرىلعىلارمەن دە تولىققان. سونداي-اق, روساريوداعى بالالارعا ارنالعان ونكولوگيالىق ورتالىققا دا جوندەۋ جۇمىستارىن جۇرگىزىپ, جاڭا مەديتسينالىق قۇرىلعىلارمەن جانە ويىن بولمەسىمەن جابدىقتاعان. ال اۋرۋحانا ماماندارى يسپانيانىڭ بارسەلونا قالاسىندا تاجىريبەدەن ءوتىپ, بىلىكتىلىگىن ارتتىرىپ قايتتى. بۇل شىعىنداردى دا مەسسي قۇرعان قور وتەپ بەرگەن.
ودان بولەك, 2010 جىلى كاتالونيادا «Hospital Universitario Vall d-Hebron» پەدياترلىق گوسپيتالىن سالىپ, ارنايى دەمالىس ايماعىن قۇردى. ورتالىقتىڭ العاشقى كىرپىشىن مەسسي ءوز قولىمەن قالاعانىن ايتا كەتەيىك. داڭقتى فۋتبولشى مەديتسينالىق باعىتتاعى جۇمىستارىنان ءبولەك, سپورت مەكتەپتەرى مەن ءبىلىم بەرۋ ورتالىقتارىن سالۋعا دا قارجى ءبولىپ كەلەدى.
مەسسيدىڭ كوپكە ۇلگى بولاتىن تاعى ءبىر يگى ءىسى – ءوسۋ گارمونىنىڭ جەتىسپەۋشىلىگىنە ۇشىراعان ماروككولىق كاشاشا ۆاليد ەسىمدى بالانىڭ ەم-دومىن تولىعىمەن ءوز موينىنا الۋى. بۇل جايىندا تىلشىلەرگە بەرگەن سۇحباتىندا مەسسي: «مەن دە بالا كۇنىمدە ءدال وسىنداي دەرتكە شالدىققان ەدىم. ول كەزدە مەنىڭ ەمدەلۋىمە «بارسەلونا» فۋتبول كومانداسى كومەكتەستى. قۇدايعا شۇكىر, قازىر ارمانداعان دۇنيەمە قول جەتكىزدىم. ەندى – مەنىڭ كەزەگىم. كاشاشانىڭ دا ارمانى فۋتبولشى بولۋ ەكەن. سوعان ءوز ۇلەسىمدى قوسسام دەيمىن», – دەيدى. بۇگىندە ول 12 جاسار ماروككولىقتىڭ ەمدەلۋىنە اي سايىن 3120 ەۋرو كولەمىندە قارجى اۋدارىپ تۇرادى. 2012 جىلدان باستالعان بۇل قامقورلىق 2018 جىلعا دەيىن جالعاسپاق.
سونىمەن قاتار, مەسسيدىڭ يۋنيسەف حالىقارالىق قورىنا مەكسيكاداعى مۇقتاج بالالارعا كومەك رەتىندە 100 مىڭ ەۋرو جانە روساريو قالاسىنداعى سپورت كەشەنىن جوندەۋگە 150 مىڭ ەۋرو قارجى بولگەنىن ايتا كەتەيىك.
اتاعى اسپانداعانىمەن, ادامگەرشىلىگى كەمىمەگەن
بۇگىندە رونالدۋ, فەدەرەر, مەسسي سىندى ونەگەلى ىسىمەن ۇلگى بولىپ جۇرگەن الەمگە ايگىلى ساڭلاقتار جەتەرلىك. ماقالامىزدىڭ سوڭعى بولىگىنە سولاردىڭ بىرنەشەۋىن بىرگە توپتاستىرىپ, قىسقاشا توقتالۋدى ءجون سانادىق.
كوبە برايانت ەسىمدى باسكەتبولشىنىڭ اتاعى التى قىردان اسادى. ۇلتتىق باسكەتبول قاۋىمداستىعىنداعى مانسابىن بيىل ءساۋىر ايىندا عانا اياقتادى. ايگىلى «لوس-اندجەلەس لەيكەرس» كومانداسىندا ويناعان. برايانتقا دا قايىرىمدىلىق شارالارى جات ەمەس. 2009 جىلى قىتايدا بولعان جويقىن جەر سىلكىنىسىنەن زارداپ شەككەن جاندارعا 750 مىڭ اقش دوللارى كولەمىندە قارجى بولگەن. «Kobe & Vanessa Bryant family Foundation» قورىن قۇرعان سپورتشى وتكەن جىلى كەزەكتى ويىنىندا پايدالانعان بۇيىمىن ءباس ساۋدا ارقىلى ساتىپ, تۇسكەن 67 مىڭ اقش دوللارىن ءۇي-كۇيسىز جۇرگەن جاندارعا تاراتىپ بەرگەن.
ديدە دروگبانى دا بىلمەيتىن سپورتسۇيەر جوقتىڭ قاسى. كوت-د-يۆۋار مەملەكەتىنىڭ وكىلى ءوزى تۋعان ەلى ءۇشىن كەز كەلگەن ىسكە بارۋعا دايىن. ءوز ەلىنىڭ عانا ەمەس, تۇتاس افريكاداعى قيىن جاعدايعا الاڭدايتىن دروگبا 2007 جىلى بۇۇ-نىڭ دامۋ باعدارلاماسى بويىنشا ۇيىمنىڭ ەرىكتى ەلشىسى اتاندى. سول جىلى ءوزىنىڭ تىكەلەي باستاماسىمەن «Didier Drogba Foundation» قورى قۇرىلدى. ونىڭ نەگىزگى جۇمىسى – ءبىلىم بەرۋ جانە دەنساۋلىق ساقتاۋ سالالارى بويىنشا افريكا حالىقتارىنا قارجىلاي قولداۋ كورسەتۋ. قور ارقىلى فۋتبولشى ءوزى تۋىپ-وسكەن ابيدجان قالاسىندا مەديتسينالىق ورتالىق سالۋعا 3 ميلليون فۋنت ستەرلينگ بولگەن. بۇل – بۇگىنگى ەسەپپەن كەم دەگەندە 4,35 ميلليون اقش دوللارى. وسىنداي ۇلگى الارلىق ىستەرى ءۇشىن دروگبا بۇۇ-نىڭ «سپورتتان تىس ىزگىلىكتەرى ءۇشىن» اتتى سىيلىعىمەن ماراپاتتالدى. ودان بولەك, سپورتشىنىڭ افريكاداعى كەدەيلەرگە قارجى جيناۋ ماقساتىندا ۇيىمداستىرىلاتىن قايىرىمدىلىق شارالارىنا تۇراقتى قاتىسىپ تۇراتىنىن نازارلارىڭىزعا سالا كەتەيىك.
سونداي-اق, بۇل قاتارعا گەرمانيا ۇلتتىق قۇراماسىندا وينايتىن تەگى تۇرىك فۋتبولشى مەسۋت ءوزيلدى دە قوسۋعا بولادى. سوڭعى الەم چەمپيوناتىنداعى جەڭىسىنەن كەيىن ءوزيل وزىنە تيەسىلى سىياقىنى سول كۇيىندە برازيليالىق ناۋقاس بالالاردىڭ وپەراتسيا جاساتۋىنا اۋدارعان. «العاشىندا 11 بالانىڭ وپەراتسياسىنا كومەكتەسەمىن دەپ وزىمە شارت قويعان ەدىم. كەيىن چەمپيوناتتى تەك 11 فۋتبولشى ەمەس, تۇتاس كوماندا جەڭىپ الاتىنىن ەسكەرىپ, 23 بالاعا قارجى ءبولۋدى ۇيعاردىم», – دەگەن ول برازيليا تاراپىنان جوعارى قۇرمەتكە يە بولدى.
جارىس الاڭىنداعى شەبەرلىگىمەن قاتار, وسىنداي قايىرىمدى ىستەرىمەن بەلگىلى بولعان سپورتشىلاردىڭ قاتارىندا وتانداسىمىز, لوندون وليمپياداسىنىڭ چەمپيونى, داڭقتى ۆەلوشاباندوزىمىز الەكساندر ۆينوكۋروۆتىڭ دا بار ەكەنى كوڭىلگە قۋانىش ۇيالاتادى. ساشا وليمپيادادان كەيىن سول ءدۇبىرلى دودادا جارىسقان ۆەلوسيپەدىن ءباس ساۋداعا شىعارىپ, 243 مىڭ اقش دوللارىنا ساتتى. بارلىق قارجىنى اۋىر دەرتكە شالدىققان قازاقستاندىق بەس بالانىڭ ەم-دومىنا جۇمساعان چەمپيونىمىز ەلدىڭ العىسىنا بولەندى.
بۇل قاتارعا زينەدين زيدان, لۋيس نازاريو رونالدو, ەممانۋەل ادەبايور, دەۆيد بەكحەم, سەر الەكس فەرگيۋسسون, سەرەنا ۋيليامس جانە تاعى باسقا سپورتتا ءىزى سايراپ جاتقان سايىپقىرانداردى قوسساق, ارتىق ەمەس. ويتكەنى, بارلىعى دا قايىرىمدىلىقتى كادىمگى مىندەتى دەپ سانايدى.
مىنەكي, بۇگىنگى ءبىزدىڭ ايتپاعىمىز وسى ەدى. سپورتشىلاردىڭ يگى باستامالارىن ۇلگى ەتۋ ارقىلى ساۋابى مول ءىستى ناسيحاتتاۋدى ماقسات تۇتتىق. بۇل ىستەن ۇتپاساق, ۇتىلمايتىنىمىز انىق. سەبەبى, قايىرىمدىلىقتان قازانى ورتايىپ, قازىناسى كەمىپ قالعان ەشكىم جوق. ال ەگەر «سپورتشىلاردا اقشا كوپ, سوندىقتان قايىرىمدىلىق جاساۋعا ولاردىڭ مۇمكىندىكتەرى مول» دەپ ويلاساق, قاتەلەسەمىز. «نەگە؟» دەسەڭىز, ايتايىق. ءبىر كەزدەرى الەمدەگى ەڭ باي ادامداردىڭ قاتارىندا بولىپ, كەيىن قولىنداعى بارىن ۇقساتا الماي, تاقىر كەدەيگە اينالعان سپورتشىلار جەتىپ-ارتىلادى. بۇل – بولەك ءبىر ماقالانىڭ تاقىرىبى.
ەلامان قوڭىر,
جۋرناليست
- S. جوعارىداعى قايىرىمدى ىستەر ەسىمدەرى اتالعان سپورتشىلاردىڭ ۇيىتقى بولۋىمەن جۇزەگە اسقان ىزگى امالداردىڭ ءبىر پاراسى عانا. جاقسىلىقتارىن جاريا ەتۋدى قۇپ كورمەيتىن ولار كوبىنە بەرگەن كومەكتەرىن جاسىرىن قالدىرۋدى ءجون سانايدى. ال جوعارىدا ايتىلعان يگىلىكتەردىڭ كوپشىلىگى جومارت سپورتشىلاردىڭ شاراپاتىن كورگەن تاراپتىڭ اقپارات قۇرالدارىنا جاريا ەتۋىمەن بەلگىلى بولعان.
