ءبىرىنشى بەلەستىڭ بەدەرلى بەلگىلەرى

بۇرناعى كۇنى سوڭعى  F توبىنداعى ەكى ويىننىڭ وينالۋىمەن فرانتسيادا ءوتىپ جاتقان فۋتبولدان ەۋروپا چەمپيوناتىنىڭ  ءبىرىنشى تۋرى اياقتالدى. بۇل كەزدەسۋلەردە ۆەنگريا اۆستريانى 2:0 ەتىپ ۇتسا, پورتۋگاليا مەن يرلانديا 1:1 ەسەبىمەن تەڭ ءتۇستى. ءسويتىپ, دوپ دوداسى كەلەسى كەزەڭگە قادام باستى. ەندى كەزدەسۋلەردە توپتان شىعاتىن كوماندالاردىڭ سۇلباسى بىرتىندەپ ايقىندالا باستايدى.   سونىمەن, ءبىرىنشى تۋردىڭ قورى­تىن­دىلارى قانداي؟ وندا وينالعان 12 ويىن­عا قاراپ, قانداي ءتۇيىن تۇيۋگە بولادى؟ ەڭ الدىمەن كوزگە ۇراتىنى, جاسىل الاڭعا شىققان كوماندالاردىڭ قاي-قايسىسى دا ساقتىققا كوبىرەك كوڭىل ءبولىپ, ءوز قاقپالارىنىڭ امان ساقتالۋىنا ايرىقشا الاڭداۋشىلىق تانىتتى. بۇعان چەمپيونات رەگلامەنتى تىكەلەي اسەر ەتكەن سياقتى. ولاي دەيتىنىمىز, وسى جولى قۇرلىق دوداسىنا 24 كوماندانىڭ ات قوسۋى سالدارىنان پلەي-وفف ويىندارى بۇرىنعىداي شيرەك فينالدان ەمەس, 1/8 فينالدان باستالۋى وعان شىعاتىن قۇرامالار سانىن دا ەرەكشە ارتتىرىپ جىبەردى. سونىڭ سالدارىنان 6 توپتىڭ الدىڭعى ەكى ۇزدىگىنەن بولەك, ءۇشىنشى ورىن العاندار اراسىنداعى كورسەتكىشتەرى ءتاۋىر 4-ءۋى جەكپە-جەك ويىندارعا شىعاتىندار قاتارىنا قوسىلىپ, بارلىعى 16 جاساق كەلەسى كەزەڭگە وتكەلى تۇر. بۇل توپتاعى ماتچتارىندا بارلىق قارسىلاستارىنان پىرداي بولىپ جەڭىلىپ شىقپاعان كەز كەلگەن كوماندانىڭ ءۇشىنشى ورىننىڭ الدىڭعى تورتتىگى ىشىنەن تابىلۋىنا دەگەن ۇمىتتەرىن ۇزدىرە قويمايدى. مۇنىڭ ءوزى ولارعا «ەكى شوقىپ, ءبىر قاراۋ» تاكتيكاسىن ەرىكسىز تاڭىپ بەرەدى. مىنە, نەگىزىنەن وسىنداي پرينتسيپ ۇستانعان قۇرامالار ءبىرىنشى تۋردا ءبىر-ءبىرىن تاپتاپ جەڭىپ تاستاۋعا دا اسا كوپ ۇمتىلا قويعان جوق. ولارعا بۇدان گورى كەلەسى كەزدەسۋلەرگە كۇش ساقتاپ قالۋ الدەقايدا ماڭىزدىراق بولىپ سانالدى. ءتىپتى, وسىنداعى 2:0 ەسەبىمەن اياقتالعان ءۇش ماتچتىڭ وزىندە جەڭۋشى جاق ەكىنشى گولدارىن ەڭ سوڭعى مينۋتتاردا عانا سالا الدى. ەگەر ولارعا سول ساتتەردە ءسال عانا ساتتىلىك سەرىك بولا كەتپەگەندە, ەسەپتەردىڭ تەك ءبىر دوپ ايىرىمىمەن عانا بىتەتىنى انىق ەدى. دەمەك, بۇلاردىڭ وزىندە دە ولار اناۋ ايتقانداي باسىمدىق كورسەتە العان جوق. ەندى سوڭعى ماتچتار جونىندە. اۋەلى اۆستريا مەن ۆەنگريا اراسىنداعى كەزدەسۋگە كەلەيىك. شىنىن ايتقاندا, ىرىكتەۋ ءتۋرنيرىن وتە جوعارى قارقىندا وتكىزىپ, 10 ويىننىڭ 9-ىندا ۇتقان, 1 ۇشىراسۋدى تەڭ اياقتاپ, بىردە-ءبىر رەت جەڭىلىستىڭ اششى ءدامىن تاتىپ كورمەگەن اۆستريالىقتاردان ءدال وسىنداعىداي قورعانسىز قيمىلدى كۇتكەن جوق ەدىك. ماديارلار سالعاننان ولارعا قاراعاندا, شىمىر كورىندى. سوندىقتان ويىن باستالعاننان تارتىس­تى ارنادا ءوربىدى. ءبىر كەزدەرى اۆسترو-ۆەنگريا اتتى ءبىر مەملەكەت اياسىندا ءومىر سۇرگەن ەكى جاقتىڭ تەكەتىرەسى كىمنىڭ كۇشتى ەكەنىن كورسەتۋدى كوكسەيتىن بىتىسپەس كۇرەستىڭ كەلەسىنە كوشىپ جۇرە بەردى. بىراق العاشقى ادۋىن شابۋىلدى وزدەرىنىڭ باستى جۇلدىزى داۆيد الابانىڭ الاشاپقىن بولىپ جۇگىرۋىمەن باستاپ كەتكەن اۆستريالىقتار قارسى قاقپاعا ءبىرىنشى بولىپ دوپ باعىتتادى. ارادا ءبىرشاما ۋاقىت وتكەننەن كەيىن ۆەنگريا قۇراماسىنىڭ شولعىنشىلارى العا قاراي قايتا-قايتا جورىق جاساۋدى جيىلەتە ءتۇستى. ويىننىڭ ەكىنشى تايمىن دا اۆستريا بەلسەندى قيمىلدارمەن باستادى. ال ولاردىڭ قارسىلاستارى كوپ ويلانىپ جاتپاستان, وقتىن-وقتىن قاۋىپتى قارسى شابۋىلدار جاساۋعا كوشتى. سونىڭ بىرىندە گولكيپەر روبەرت المەر ماديار بالاش دجۋدجاكتىڭ اياعىنان زىمىراپ ۇشقان دوپتى ارەڭ قايتارىپ ۇلگەردى. مۇنداي شاپقىنشىلىقتار 62-مينۋتتا ۆەنگەرلەرگە ەسەپ اشۋدىڭ ورايىن كەلتىرىپ بەردى. بۇل جولى لاسلو كلياينحايسلەرمەن دوپ قاقپاقىلداسىپ العا ۇمتىلعان ادام سولوي قاقپادان بىرنەشە مەتر جەردە ورىندالعان ەندشپيلدە قاقپاشىدان ايلاسىن اسىرىپ كەتتى. قارسى شابۋىلدىڭ قارىمىن جاقسى پايدالانا بىلگەن ماديارلار ماتچتىڭ نەگىزگى ۋاقىتى بىتۋگە 3 مينۋت قالعاندا, تاعى ءبىر گول سالدى. ونى وڭ قاپتالدان العا قاراي زىمىراعان زولتان شتيبەر قاقپاشىنىڭ ۇستىنەن دوپ اسىرا تاستاۋ ارقىلى جاسادى. ال پورتۋگاليا مەن يسلانديا كەز­دەسۋى بۇلاردىڭ الدىڭعىلارىنىڭ ويىن تاعدىرى ءبىر فۋتبولشىعا باعىنىپ قالعانىن تاعى كورسەتتى. كورەرمەندەر ولار ءۇشىن كريشتيانۋ رونالدۋدىڭ قانشالىقتى ماڭىزدى تۇلعا ەكەنىنە جانە ءبىر رەت كوز جەتكىزدى. سوندىقتان بۇل ويىندا «قولى شىقپاعان» فورۆاردتىڭ دارمەنسىزدىگى بۇكىل كومانداعا تىكەلەي اسەر ەتتى. ويىن بارىسىندا ءنانيدىڭ ونىڭ ورنىن باسۋعا قانشاما ارەكەت جاساپ باققانىمەن, ول جاسىنداي جارقىراپ ويناعان كەزىندەگى كريشتيانۋدىڭ كەلىستى كەيپىنە كەلە المادى. ونىڭ 31-مينۋتتا ەسەپ اشۋىنىڭ ءوزى بىزگە مۇنى ايتقىزا المايدى. مۇنىڭ ورنىنا كەزدەسۋدە يسلاند­تاردىڭ بارىنشا باتىل ويناۋلارى ەستە قالدى. ولار ەكىنشى تايم باستالعاسىن كوپ ۇزاماي, 50-مينۋتتا قاقپا الدىندا تۋا قالعان قولايلى ءساتتى بيركير بيارناسوننىڭ تۋرا سوققىسى ارقىلى وتە جاقسى پايدالاندى. البەتتە, وسىدان كەيىن پورتۋگالدار تايلى-تاياعى قالماي اتقا قوندى. وسى تۇستا قاقپاشى حاننەس حاللدوۋرسونن تامشىلاتىپ ءبىراز تەر توكتى. سولاردىڭ اراسىندا رونالدۋدىڭ 3 مەتر جەردە تۇرىپ ۇرعان دوبىن قايتارۋ دا بار. وسىلايشا قورعانىستا مۇلتىكسىز ويناعان ارال-مەملەكەت كومانداسى وزدەرى ءۇشىن قولايلى تەڭ ەسەپتى ساقتاپ قالدى. كەشە تۇندە ەكىنشى تۋردىڭ ويىندارى باستالدى. رەسەي سلوۆاكيادان 1:2 ەسەبىمەن ۇتىلىپ قالدى. ال رۋمىنيا – شۆەيتساريا, فرانتسيا – البانيا ويىندارى ادەتتەگىدەي كەشىرەك وينالدى. سەرىك ءپىرنازار, «ەگەمەن قازاقستان»