وتىز التى جىل وتكەن سوڭ...

قۇداي قوسقان قوساعى اياق استى­نان دۇنيە سالعان كەزدە بيعايشا 24 جاسقا ەندى عانا يەك ارتا باستاعان قول-اياعى بالعاداي كەلىستى كەلىنشەك ەدى. بۇل تاعدىردىڭ سالعان ىسىنە نە شارا؟! اقبوپە, ەلدوس جانە اقمارال اتتى ۇيەلمەلى-سۇيەل­مەلى ءۇش پەرزەنتىمەن بىرگە ول ازا­­ماتىنىڭ ارتىندا بوتاداي بوز­­داپ قالا بەردى. ءوزى جاس, ءوزى كور­­كەم كەلىنشەككە ەل ىشىندە وتباسىن قۇرايىق دەپ ءسوز سالۋشى­لار از بولعان جوق. «ماعان باي تابىلار-اۋ. الايدا, اكەسىنىڭ ارتىندا قالعان ءۇش قارعاشىما قا­را­عاش­تاي پانا, بايتەرەكتەي سايا بولارلىقتاي اسىل ازامات تابىلا قويار ما ەكەن؟». ەڭ الدىمەن ونى وسى ماسەلە كوبىرەك تولعاندىرىپ ەدى. وسى ساۋال جەتەگىندە قابىرعاسىمەن كوپ كەڭەستى. الايدا, تۇبەگەيلى دە تياناقتى شەشىمگە كەلە المادى. ايتسە دە تەكتى اۋلەتتەن شىققان رەسەيلىك قازاق ازامات ورنىقتى دا كەسىمدى ءسوزىن ايتقاندا بيعايشا ءوزىنىڭ كەلەشەكتەگى تاعدىرىن ونى­­مەن بايلانىستىرعاندى ءجون كوردى. ءسويتىپ, ءبىزدىڭ بۇگىنگى كەيىپ­كەرىمىز سوناۋ سەكسەنىنشى جىلدىڭ جازىندا ءوز جۇرەگىنىڭ قالاۋىن بىلدىرگەن رەسەيلىك قازاق ازاماتىنا تۇرمىسقا شىعادى. ءارى سول جاققا سول جازدا قونىس اۋدارادى. وسى ارادا ونىڭ ىشكى جان ءدۇ­نيەسىن قيناعان ءبىر ماسەلە بار ەدى. ءۇش پەرزەنتىنىڭ ءبىرى اقمارال­دى ناعاشى اپاسى دۇنيەگە كەلگەن­نەن-اق وزىنە جاقىن تارتىپ: «اقمارال ماعان قىز بولادى», دەپ وزىنشە ەنشىلەپ ءجۇرۋشى ەدى. كەتەرىندە ول كىسى بيعايشاعا: «اقمارال­دى ماعان قالدىرىپ كەت. ءوزىم ءوسى­رىپ ءوزىم تاربيەلەيمىن ەشكىمنەن كەم قىلمايمىن», دەگەن ءوتىنىشىن ايتادى. بيعايشا بۇل تىلەكتى قاي­تارا المادى. بۇل وسىدان وتىز جىل بۇرىن بولعان جاعداي ەدى. جاس وسپەي مە, جارلى بايىماي ما دەگەندەي ارادا ءبىراز جىل وتكەن كەزدە اقمارال دا بويجەتتى. وڭى مەن سولىن تانىدى. وسى كەزدەن باستاپ ونى اناسىن ىزدەپ تابۋ كەرەكتىگى جونىندەگى وي ءجيى-ءجيى مازالاي بەردى. وسى ويمەن كازتالوۆ اۋدا­نى, تالدىاپان اۋىلىنىڭ تۇرعى­نى اقمارال وماروۆا 2000 جىل­دىڭ باس كەزىنەن اناسىنا ىزدەۋ سالا باستادى. رەسپۋبليكالىق «بار­مى­سىڭ باۋىرىم؟» باعدارلا­ماسى­نا بىرنەشە رەت باس سۇعادى. الاي­دا اناسىن ىزدەگەن قىزدىڭ ءىس-ارەكەت­تەرى­نىڭ ءبارى ەشقانداي ناتيجە بەر­مەي­دى. دەگەنمەن, جىرتىق ءۇيدىڭ دە قۇدايى بار دەگەندەي وتكەن جى­لى اناسىنىڭ ءبىر دەرەگى اشىل­عان­­­داي بولادى. بۇل قۋانىشتى حابار­­دى جەتكىزۋگە تۇرتكى ءارى سە­بەپ­­كەر بول­عان مۇرا­عات­تانۋشى-جۋر­­ناليست, ءجانى­­بەك اۋداندىق «شۇعىلا» گازەتى­ن­ىڭ باس رەداكتورى اح­مەديار باتىر­حانوۆ بولىپ شى­عا­دى. سوندا قالاي بولعانى؟ بۇل اراد­ا ءبىرىن­شىدەن ايتايىن دەگەنىمىز, ءارىپ­­تەسى­مىز احمەديار باتىرحانوۆ بۇعان دەيىن دە ءبىر ءبىرىن جوعالتىپ ال­عان باۋىر­لاردى تابىستىرۋعا دانە­­كەر بولا بىلگەن قۇلاعى تۇرىك ءىز­دەنىم­­پاز جان ەكەندىگى. حابار كاز­تالوۆ اۋدانىنىڭ تالدىاپان اۋى­­لىن­دا تۇراتىن اقمارال وماروۆا­­نىڭ قۇلا­عىنا جەتەدى. ءسوي­تىپ, ول تەلە­­فون شالىپ وعان حابار­لا­سادى. قۇلا­عى قاشان دا تۇرىك جۇرە­تىن ازا­­مات قوي. احمەديار اقمارال­دىڭ انا­سىنا قاتىستى انىقتامانى كەزدەي­سوق كەزدەسكەن تانىستاردان ەستى­گە­نىن مالىمدەيدى. قۇداي ءساتىن سال­عان­دا بۇل انىقتاما شىندىققا اينالادى. ءسويتىپ, اۋدانداعى ارىپتەسىمىز اقمارالدىڭ اناسىنىڭ قازىرگى تۇراتىن مەكەنجايىن كوزبەن كورىپ قولمەن ۇستاعانداي دالمە-ءدال انىقتاپ ىزدەۋشىگە حابار بەرەدى. بۇل بۇگىندە جاسى الپىستىڭ ۇستىنە شىققان بيعايشا ەسىمدى جاسى ۇلعايعان جان بولىپ شىعادى. ول رەسەيدىڭ ۆولگوگراد وبلىسىنا قاراس­تى بىكوۆ اۋدانىنىڭ تۇرعى­نى ەكەن. ءتىپتى, ا.باتىرحانوۆ اق­ما­رال­­دىڭ اناسىنىڭ وسى اۋدان­داعى كاتريچەۆ اۋىلىندا تۇراتى­نىن دا ءدال انىقتاپ بەرىپتى. مىنە, ناعىز ازامات ناعىز زەردەلى, سۇڭعى­لا جان دەپ وسى احمەدياردى ايتىڭىز. ۇزىن ءسوزدىڭ قىسقاسى تاياۋدا اناسى مەن قىزى قايتا تابىستى. رەسەيگە اقمارالدىڭ ءسۇيىپ قوسىل­عان جۇبايى قاۋىس مارتتىك تانى­تىپ ءوزى باستاپ الىپ بارىپتى. ءسويتىپ, قىز ارادا 36 جىل وتكەن سوڭ اناسىنىڭ ايداي ديدارىن كوردى. وتتاي ىستىق ومىراۋىنا كومىلدى. اناسى مەن قىزىنىڭ قۇشاقتارى ايقاسىپ جانارلارى جاسقا تولدى. ەكەۋى ءبىرىن ءبىرى ايمالاپ, ءوبىپ, بىرىنە ءبىرى ەلجىرەي ۇزاق قاراپ تۇرىپتى. وبلىستىق «ورال ءوڭىرى» گازەتىنەن وسى قاۋىشۋ جونىندە دانيار وسپاننىڭ ماتەريالىمەن تانىسقان كەزدە وقيعا ىزىمەن تاعى ءبىر مارتە العا اتتاي وتىرىپ تولعاۋى توقسان تىرشىلىكتىڭ وسىن­داي ءبىر يىرىمدەرى جونىندە اڭگىمە قوز­عاعاندى ءجون كوردىك.  تەمىر قۇسايىن, «ەگەمەن قازاقستان» باتىس قازاقستان وبلىسى