كوركەم گيمناستيكانىڭ پريماسى

ءاليا ەسىمدى قىز­داردىڭ دەنى باتىر تەكتى بولادى-اۋ. قازاق كوركەم گيمناستيكاسى تاريحىندا الەمدە ۇزدىك بەستىككە كىرگەن داڭقتى قىزىمىز تۋرالى دۇنيەجۇزىندەگى ەڭ مىقتى باپكەرلەردىڭ ءبىرى سانالاتىن يرينا ۆينەر بەيجىڭ وليمپياداسىنىڭ الدىندا «مەندە وليمپيادا ويىندارىندا توپ جارۋعا لايىق ءتورت گيمناسشى بار. سونىڭ ءبىرى – ءاليا يۋسۋپوۆا», دەگەن بولاتىن. ءاليا يۋسۋپوۆا ۇلكەن سپورت­­­­پەن قوشتاسقاننان كە­يىن يرينا ۆينەردىڭ وزىنە جۇمىسقا شاقىرعانىن ەس­تىگەنبىز. ءاليادان سونىڭ جايىن سۇ­را­دىق. – نەگە مەن رەسەيگە بارۋىم كەرەك؟! راس, يرينا ۆي­نەر – الەمدەگى ەڭ ۇزدىك باپكەرلەردىڭ ءبىرى. ءوز قو­لىمدا وسكەن قىزسىڭ, ءبىر­گە جۇمىس جاسايىق دەپ شا­قىرعانى راس. بىراق, مەن «رەسەيدە باپكەرلەر كوپ قوي, قازاقستانعا كەرەگىرەكپىن», دەدىم. مەن ءوز ەلىمنىڭ پاتريو­تىمىن. بىزگە ءوز وليمپياداشىلارىمىزدى دايىنداۋ كەرەك. سوندىقتان, تۇلعاڭدى التىننان قۇيامىن دەسە دە قازاقستاننان كەتپەيمىن. وسىنى ايتقاندا ءاليانىڭ تاناداي كوزى جارق ەتە قالعان. ادەتتە, كوركەم گيمناسشىلار سايىسقا شىققاندا جادىراپ شىعادى. ماسە­لەن, وليمپيادا ويىن­دا­رىنىڭ جەڭىمپازى الي­نا كاباەۆانىڭ ەزۋى ءبىر جيىلعانىن كورگەن ەمەسپىز. ەسەسىنە ءبىزدىڭ قىزىمىزدىڭ الەمدىك سىندا جارق ەتىپ ءبىر كۇلگەنىن جانە كورگەن ەمەسپىز. تابيعاتىندا بايسالدى قىز قانشا جەردەن كوركەم گيمناس­تيكا تالاپ ەتسە دە وتىرىك كۇلە المايدى. ونىڭ وليمپيادا ويىندارىنىڭ جۇلدەگەرى بول­ماعاندىعىن كەيبىرەۋلەر وسى مىنەزىنەن دە كورەدى. بىراق, قازاق قىزىنىڭ نا­مىس­­قويلىعىندا شەك جوق. سىرت كوزگە ۇياڭ كورىنەتىن قا­رىنداسىمىز ۇلت نامىسى, مەم­لەكەتتىك ماسەلەگە كەلگەندە جولىنداعىنى قۇراقتاي جاپىرادى. «نەگە مەن رەسەيگە كەتۋىم كەرەك. مەن ءوز ەلىمنىڭ پاتريوتىمىن», دەگەن ءسوزى سونىڭ ءبىر ايعاعى عانا. 2006 جىل. كاتار. دوحادا ازيا ويىندارىنىڭ بايراقتى باسەكەسى قىزىپ جاتىر. اق كويلەگى قى­زىل توبىعىن جا­­ۋىپ ءجۇ­رەتىن, اۋزىنان اللا­سى تۇسپەيتىن ارابتار ەتەگىنە ءسۇرىنىپ جۇرەتىندەي حالدە ەمەس. قازاقتىڭ بو­تا ءتىر­سەك, بوتا كوز ارۋى ءاليا ءجۇ­سىپوۆا-يۋسۋپوۆا كوركەم گيم­ناستيكانىڭ ءتورت تۇرىنەن وتكەن سىنىندا بار التىندى ءبىر ءوزى سىپىرىپ الدى. كوماندالىق ەسەپتە دە قازاقستاندى العا شىعارارلىقتاي ەرلىك جاسادى. ەكى وكپەمىزدى قولىمىزعا الىپ اراسىن جۇقا شاتىر بولگەن كۇرەس زالىنا اسىقتىق. رومان مەلەشين اقتىق سىندا ايقاسىپ جاتقان ەدى. ءبىر كەزدە ايقاي-شۋدى تۇنشىقتىرىپ قازاقستانىڭ ءانۇرانى وينالدى. ءاليانىڭ قۇرمەتىنە. ءاليانىڭ ۇزەڭگىلەس سەرىكتەرىنىڭ قۇرمەتىنە. وسى كەزدە رومان تورتتاعانداپ جاتقان قارسىلاسىن جەردەن قاپ كوتەرگەندەي سالاقتاتىپ ج ۇلىپ العان. شەكە تامىرلارى بىلەۋلەنىپ ءسال تۇردى دا وڭ جاق قاپتالعا ءبىر-اق ۇردى. رومان مەلەشين دە ازيا ويىندارىنىڭ جەڭىم­پازى. الىپ سارايدى قۋانعاننان موي­نىمىزعا ءىلىپ كەتەردەي حالدە ءجۇرمىز. سوڭىنان رومان ايتتى عوي. قازاقستاننىڭ ءانۇرانىن ەستىگەندە كەۋدەمە الاپات كۇش ءبىتتى دەپ. سولاي. ءاليا ءوزى عانا التىن الىپ قويماي سەرىكتەرىنە جانە شىعىستىڭ بالۋانىنا دا التىن ۇستاتقان. سوندا دەيمىن-اۋ, حالقى تاۋ-تاۋ قۇمنان كوپ قىتاي گيمناسشىلارى قازاق قى­زىنىڭ قۇرمەتىنە باس ءيدى. افينا وليمپياداسىندا وسى ءاليا يۋسۋپوۆانىڭ كەم دەگەندە ۇشتىككە كىرەتىن مۇمكىندىگى بولدى. بار جات­تىعۋدى ءمىن­سىز ورىندادى. لەنتاسىن شۇ­بالتىپ ءتۇ­سىرىپ العان رەسەي قى­زى الدىنا ءتۇسىپ كەتتى. بەي­­­­­جىڭ وليمپياداسىندا دا ۋكراينالىق بەسسونوۆا ەكەۋىنىڭ ۇپايى قايتا-قايتا ەسەپتەلىپ, قازىلار اتاقتى فۋتبولشىنىڭ قىزىنا جاق تارتتى. ادامدار قازىلىق ەتكەن جەردە ءادىل تورەلىك كۇتۋ قيىن. ءسال-ءپال ءمىن تاۋىپ, كۇشتىنىڭ الدىندا شىبىنداعان اتشا بۇرىپ كەتەدى. كوركەم گيمناستيكادا الەمدىك ارەنادا ءبىر تورەشىمىزدىڭ جوق­تىعى ءبىزدىڭ ءاليانىڭ جولىن سان رەت بايلاعان. ەلباسى نۇرسۇلتان ءابىش­ ۇلىنا راحمەت. شىم­كەنتكە كەلگەن ءبىر ساپارىندا ءاليانىڭ قو­لىنان ۇستاپ تۇرىپ, «ءاليا, مەن سەنىڭ جەڭگەنىنە سەندىم», دەدى. وبلىس اكىمىنە «الياعا ارنايى كوركەم گيمناستيكا مەكتەبىن اشىپ بەرىڭدەر», دەپ تاپسىردى. سول مەكتەپ شىمكەنتتەگى جاڭا اكىمشىلىك-ىسكەرلىك ور­تالىعى جوباسىندا پاي­دالانۋعا بەرىلدى. – بۇگىندە وندا ءجۇز ەلۋ, ەكى ءجۇز شاماسىندا شاكىرتتەر جاتتىعادى, – دەيدى ءاليا. –باسىندا ونشاقتى-اق قىز بول­عان. باپكەرلەرىمىز مىق­تى. حالىقارالىق ءدا­رە­جە­دەگى سپورت شەبەرى ءسابينا اشىربەكوۆا ريو-دە-جانەيرودا وتەتىن وليمپيادا ويىندارى­نا جولداما الدى. يرينا ۆينەر باپكەرلەرىم جارىستاردا ءسابينانى كورىپ جوعارى باعا بەرگەن. ونەرىن تالداپ, پايدالى كەڭەستەرىن بەرىپ تۇرادى. ونىڭ سىرتىندا 2002 جىلعى دايانا ابدىربەكوۆا مەن ءالينا رۇستەموۆا دەگەن گيمناسشىلارىمىز جاقسى تابىسقا جەتىپ كەلەدى. 2003 جىلعى روزا ءابيتوۆا دەگەن شاكىرتىمىز 2018 جىلى جاسوسپىرىمدەر اراسىندا وتەتىن وليمپيادا ويىندارىنا جولداما الدى. ءاليا يۋسۋپوۆا بۇگىندە كوركەم گيمناستيكادان قازاق­ستان ۇلتتىق قۇرا­ماسىنىڭ باس باپكەرى, حالىقارالىق سا­ناتتاعى تورەشى, شىمكەنتتەگى №9 كوركەم گيمناستيكادان وليمپيادالىق رەزەرۆتەگى ما­مانداندىرىلعان بالالار مەن جاسوسپىرىمدەر مەكتەبىنىڭ ديرەكتورى. قوشتاساردا ءبىر ساۋال قوي­عانبىز. – ءاليا, اكەڭ, اتاقتى بوكس­شى ماقسۇت اعايدى جاقسى بىلەمىز. بىراق, فاميلياڭا قاراپ تەگى تاتار ەكەن دەپ قا­لاتىندار ءوز ىشىمىزدە دە بار. – ءتۇسىندىم, اعا. اكەم قا­زاق, شەشەم قازاق. اكە­مىزدىڭ تولقۇجاتىندا يۋسۋپوۆ بولىپ جازىلىپ كەتكەندىكتەن وسىلاي بولعان. ال مەن قازاق قىزى ەكەنىمدى ارقاشاندا ماقتان تۇتامىن. باقتيار تايجان, «ەگەمەن قازاقستان» شىمكەنت