سۇرانىسقا يە اۋەجاي

پەتروپاۆل حالىقارالىق اۋەجايى توڭىرەگىندە ءارتۇرلى اڭگىمەلەر تىيىلماي تۇر. ونىڭ جۇمىسىنىڭ توقتاتىلۋىن بازبىرەۋلەر جاڭا قوجايىننىڭ ساتىپ الۋىمەن بايلانىستىرسا, ەكىنشى بىرەۋلەر قوردالانىپ قالعان بەرەشەكتىڭ وتەلمەۋىمەن تۇسىندىرەدى. ءبىز ماسەلەنىڭ ءمانىسىن بىلمەك بولىپ پەتروپاۆل حالىقارالىق اۋەجايىنىڭ ديرەكتورى مارات حاسەنوۆپەن حابارلاسقانىمىزدا, ەل ءىشىن كەزگەن الىپقاشپا سوزدەردى تەرىسكە شىعاردى. – بار جايت اۋقىمدى كۇردەلى جوندەۋ جۇمىستارىنا كەلىپ تىرەلەدى. ول جايلى ءبىرازدان بەرى ايتىلىپ كەل­سە دە, قوماقتى قاراجات تابۋ وڭ­اي بولعان جوق. بىلتىر ۇكىمەتتىڭ رەزەرۆىنەن 4 ميلليارد تەڭگە ءبو­لىن­سە, بيىل 3,2 ميلليارد تەڭگە قاراستىرىلىپ وتىر. وسىعان وراي جاز ماۋسىمىن قولايلى پايدالانىپ, قالپىنا كەلتىرۋ ءۇشىن ۋاقىتشا جابىلعانى راس. «ك-دورستروي» اق ۇشۋ-قونۋ جولاقتارىن جاڭعىرتۋ جوباسىن جۇزەگە اسىرۋعا بەلسەنە كىرىسكەن. جوبانىڭ ءبىرىنشى كەزەڭىن اياقتاۋ بارىسىندا استانا مەن ال­ماتى باعىتتارىنا ماۋسىمارالىق ۇشۋ رەتكە كەلتىرىلدى. الدا ۇشۋ-قونۋ جولاقتارىن كەڭەيتۋ, ۇزارتۋ, جولاۋشىلار تەرمينالىن زامان اعىمىنا لايىقتاۋ, جارىق-سيگنال قۇرال-جابدىقتارىن ورناتۋ مىندەتتەرى تۇر, – دەدى بىزگە جان-جاقتى تۇسىنىك بەرگەن مارات جۇماجان ۇلى. وكىنىشتىسى سول, جاڭا اكتسيونەردىڭ ۋادەلەرى دە قاعاز جۇزىندە قالا بەرگەن. كاسىپورىننىڭ بىرنەشە جىل بويى تولەنبەي كەلگەن ەڭبەكاقى قا­رىزدارىنىڭ وتەلۋىنە كولىك پرو­كۋراتۋراسىنىڭ دۇركىن-دۇركىن ارالاسۋىنا تۋرا كەلگەن. 2013 جىلى بەرەشەك 23 ميلليون تەڭگەنى قۇراعان. زاڭدىلىقتى قاداعالاۋشى ورگان نازار اۋدارماسا نەگىزگى اكتسيونەر قاراجات جوق دەپ اۋىزدى قۋ شوپپەن ءسۇرتىپ وتىرا بەرەرى انىق. 19 ميلليون تەڭگە جالاقىنىڭ بەرىلۋىنە قاراعاندا تابىسسىز دەپ ايتۋ قيىن. ازاماتتىق اۆياتسيا كوميتەتى دە كوپتەگەن ولقى­لىقتاردى جىپكە تىزگەندەي ەتىپ جالعاننىڭ جالپاعىنا شىعارعان. سانيتارلىق, ءورت, قۇرىلىس نورمالارى ورەسكەل بۇرمالانعان. سوڭعى كۇردەلى جوندەۋ 1974 جىلى جۇرگىزىلسە, قانداي اۋە قاۋىپسىزدىگى جايلى ءسوز قوزعاۋعا بولادى, دەپ جۇرتشىلىقتىڭ كۇيىنەتىنى دە سوندىقتان. كوبىنە اعىمدىق جوندەۋلەرمەن شەكتەلىپ وتىرعان. تىعىرىقتان شىعۋدىڭ جولى رەتىندە ۇشۋ-قونۋ جولاقتارىنىڭ جارامدى بولىگىن عانا پايدالانۋ ۇسىنىلىپ, «بوينگ», «تۋ-154», «تۋ-157» سەكىلدى الىپ لاينەرلەردىڭ قاتىناۋىنا تىيىم سالىنعان. اكتسيونەرلەر تاراپىنان جول بەرىلگەن وسىنداي قىرسىزدىقتار مەن قۇنتسىزدىقتار بىرنەشە رەت بەتتەرىنە باسىلىپ, ونىڭ سوڭى مامانداندىرىلعان ەكونوميكالىق سوتقا تالاپ-ارىز تۇسىرۋگە جالعاسقان. سولاردىڭ ءبىرى «VIP AVIA» ااق پەن «Altyn Estate» جشس اراسىنداعى اكتسيالاردى ساتۋ-ساتىپ الۋ كەلىسىمىن زاڭسىز دەپ تانۋعا قاتىستى. اقىرى سوت شەشىمىمەن باقىلاۋ پاكەتىنىڭ اكتسيالارى الدىمەن كوممۋنالدىق, سوسىن مەملەكەتتىك مەنشىككە بەرىلدى. ەندى, مىنە, مەنشىك يەسىنە بايلانىستى سوڭعى نۇكتە قويىلعاننان كەيىن مەملەكەت تاراپىنان قوماقتى قارجىلىق قولداۋ كورسەتىلە باس­تاۋى كوڭىلگە قۋانىش ۇيالاتادى. بىرنەشە جىل بۇرىن قىتايدىڭ جۇك لاينەرلەرىن دە قابىلداعان بولاتىن. ەكونوميكالىق قيىندىقتار تۇسىندا اپتاسىنا 56 رەيسكە دەيىن ۇشقان كەزدەر بولعان. بۇگىندە استاناعا اپتاسىنا 2 رەت, الماتىعا 1 رەت قاتىناۋدى جيىلەتۋ مۇمكىندىكتەرىمەن قوسا ماسكەۋگە, گەرمانياعا, قىتايعا, تۇركياعا ۇشۋ كەلىسىمشارتتارى جاسالعان.  ومىر ەسقالي,  «ەگەمەن قازاقستان» سولتۇستىك قازاقستان وبلىسى