جاڭىلتپاش جارناما

ورالداعى جاڭا مولتەك اۋداندار­دىڭ بىرىندە «مەنىڭ ورال» دەگەن ءار ءارپى جولبارىستىڭ جونىنداي جازۋلار بار. بۇل نە قىلعان جاڭىلتپاش جارناما؟ قايدان شىققان شالدۋار تىركەس؟ ال ەگەر مۇنى «مەنىڭ ورالىم» دەپ «ورال» دەگەن سوزگە «ى» جانە «م» ارىپتەرىن قوسىپ جازسا, مۇمكىن كوپشىلىككە تۇسىنىكتىرەك بولار ما ەدى؟ ەڭ دۇرىسى, ارقالى, داۋىلپاز اقىن قاسىم امانجولوۆ جىرلاعانداي, «ورالىم مەنىڭ» دەپ ويناتا, جايناتا جانە توگىلتە جازسا تىپتەن جاراسىپ كەتپەس پە ەدى؟! الگى جارنامالىق بەلگىدە «مەنىڭ» جانە «ورال» دەگەن ءسوز­سىماق­تىڭ ورتاسىندا جۇرەكتىڭ بەينەسى بەينەلەنىپتى. وسى ارقىلى مۇنداي جارنامانى ورناتۋشىلار «مەنىڭ جۇرەگىم ورال» دەگەندى ايتقىسى, ۇعىندىرعىسى كەلگەن سەكىلدى. بىراق, تۇرعىنداردىڭ دەنى بۇلايشا تۇسىنبەيتىنى, ءارى قابىل­دامايتىنى بايقالادى. بىردە اۆتوبۋس ىشىندە ءىرى جازىلعان وسى ەكى بولەك قويىرتپاققا كوزدەرى تۇسكەن جاس جەتكىنشەكتەر «وسىنداي ءسوز بولا ما؟» دەپ اڭ-تاڭ قالعاندارىنا كۋامىز. ءارى وسى ارقىلى جارناما جوباسى يەلەرى «ورال قالاسىن سۇيەمىن. ونىڭ پاتريوتىمىن. ورال مەنىڭ جۇرەگىمە جاقىن قالا» دە­گەن ماعىنانى مەڭ­زەگەن شىعار. الايدا, بۇل ويلارى جارتىكەش, تۇسىنىكسىز كۇيىندە قالىپ قويعانى وكىنىشتى-اق. بۇل شەتەلدىك جارناما ۇلگىلەرىنە ەلىكتەۋ ەكەنى تالاس تۋعىزبايدى. ويتكەنى, بىرقاتار شەت مەملەكەتتەردە جۇرەك, جۇرەگىم دەگەن ءسوزدى سۋرەتپەن كەسكىندەۋ تاجىريبەسى بار. الايدا, مۇنى كوزسىز كوشىرە سالۋ قازاقى جارناماعا مۇلدەم سايكەسپەيدى. تاعى ءبىر ايتايىن دەگەنىمىز, كورشىلەس رەسەيدە جارناما بە­رۋشىلەر ونى ورناتپاستان بۇ­رىن ءتيىستى وكىلەتتى مەملەكەتتىك مە­كەمەلەردىڭ رۇقساتىن الادى. ولار رۇقسات بەرمەسە نەمەسە جارنامانىڭ ءمانى مەن ماڭىزى تۇسىنىكسىز بۇلدىر بولسا جارناما قاعىلمايدى. ءبىزدىڭ ويىمىزشا, وسىنداي ءتارتىپ پەن ۇلگىدەن تاعىلىم الا بىلگەنىمىز ارتىق ەمەس. ەگەر جارناما ماسەلەسىندە اركىم ءوز ويىنا كەلگەنىن جاساي بەرسە نە بولادى؟ ورال قالا­سىنداعى جارناما وسىنداي كەلەڭسىزدىكتىڭ ءبىر كورىنىسى. ءدال وسىنداي ۇلگىمەن كازتالوۆ اۋدا­نىنىڭ جالپاقتال اۋىلىندا دا «مەنىڭ جالپاقتال» دەگەن ورتاسىندا جۇرەكتىڭ سۋرەتى سالىنعان جارناما ورناتىلىپتى. جارناماعا دا تالعاممەن, جاۋاپ­كەرشىلىكپەن قاراعان ءجون. تەمىر قۇسايىن, «ەگەمەن قازاقستان» ورال