فۋتبول. امەريكا كۋبوگى. ۋرۋگۆاي تۋرنيردە ءۇش ۇپاي عانا الدى

اقش-تا فۋتبولدان ءوتىپ جاتقان امەريكا كۋبوگى جارىسى بەل ورتاسىنا كەلدى. بۇگىن س توبىنداعى كوماندالاردىڭ توپتىق تۋرنيردەگى ويىندارى مارەگە جەتتى. مەكسيكا مەن ۆەنەسۋەلا اراسىنداعى ماتچ 1:1 ەسەبى اياقتالسا, ۋرۋگۆاي يامايكا قۇراماسىن 3:0 ەسەبىمەن ۇتتى. بۇل كەزدەسۋدە دە اۆتوگول بولدى. يامايكا قۇراماسىنىڭ قورعاۋشىسى دجي-ۆون ۋوتسون 67 مينۋتتا ءوز قاقپاسىنا گول سوقتى. مەكسيكا مەن ۆەنەسۋەلا 7 ۇپايمەن شيرەك فينالعا شىقتى. ال ۋرۋگۆاي 3 ۇپاي عانا الىپ, ءۇشىنشى ورىندى قاناعات تۇتتى. بيىلعى تۋرنير ۋرۋگۆاي مەن برازيليا ءۇشىن ءساتسىز ءوتتى. اتالعان جارىستا ۇنەمى اتى وزىپ جۇرەتىن كوماندالار ءتيىستى ناتيجە كورسەتە الماي, اۋىلدارىنا بارماقتارىن تىستەپ قايتتى. برازيليا العاش رەت 1987 جىلدان بەرى توپتان شىعا المادى. «پەنتاكامپەوندار» جاساعىن ءتۋرنيردىڭ بەل ورتاسىندا اتتان تۇسىرگەن پەرۋ كومانداسى ۆ توبىندا ءبىرىنشى ورىن الىپ, ¼ فينالعا شىقتى. وسى توپتا ەكۆادوردىڭ دا جولى بولىپ كەتتى. ولار دا كەلەسى اينالىمدا ونەر كورسەتەدى. ەرتەڭ D توبىنىڭ سوڭعى ماتچتارى وتەدى. چيلي پانامامەن, ارگەنتينا بوليۆيامەن كەزدەسەدى.  وسى توپتا «البيسەلەستە» كومانداسى ءبىرىنشى ورىندا تۇر. ولار شيرەك فينالدا ۆەنەسۋەلامەن وينايدى. پاناما مەن ءچيليدىڭ اراسىنداعى ويىندا جەڭگەن قۇراما مەكسيكامەن كەزدەسەدى. بۇل ماتچتا ەسەپ تەڭ اياقتالسا, چيلي كەلەسى اينالىمعا شىعادى. ويتكەنى, ولاردىڭ دوپ ايىرماشىلىعى پاناماعا قاراعاندا جاقسى. چيلي قارسىلاستار قاقپاسىنا 3 دوپ سوعىپ, وزدەرىنە 3 دوپ جىبەرگەن. ال پاناما 2 گول سوعىپ, 6 دوپ جىبەرىپ العان. داستان كەنجالين. فوتو: championat.com ۆيدەو: vkontakte الەۋمەتتىك جەلىسى.