وڭتايلى شەشىمدەر – ۋاقىت پەن قارجى ۇنەمدەۋدىڭ ءتيىمدى تەتىگى

كەشە «قازمەديا ورتالىعى» عيماراتىندا ادىلەت ءمينيسترى بەرىك يماشەۆ بەينەكونفەرەنتسيا بايلانىسى رەجىمىندە حالىق الدىندا ەسەپ بەردى. مينيسترمەن بولعان ەسەپتىك كەزدەسۋگە, ادىلەت ورگاندارىنىڭ ارداگەرلەرى, قالا تۇرعىندارى مەن كاسىپكەرلەر وكىلدەرى كەلىپ قاتىسىپ, ۆەدومستۆونىڭ بۇعان دەيىنگى اتقارعان جۇمىستارى مەن الداعى جوسپارلارى تۋرالى جان-جاقتى ماعلۇماتتار الا الدى. بەينەكونفەرەنتسيا ونلاين رەجى­مىندە ەلىمىزدىڭ ون بەس وڭىرىمەن قوسىل­عاندىعىن ايتا كەتكەن ءجون. ءتىپتى, ءبىرازدان بەرى مينيسترلىك سايتىن­دا ارنايى ايدار اشىلىپ, تۇرعىن­دار سۇراقتارى جيناقتالعان-دى. ال ەسەپتىك كەزدەسۋدى الدىمەن ازامات­تىق بايقاۋشى ينستيتۋت اتىنان ادىلەت ورگاندارى قىزمەتى ماسەلەلەرى ءجونىن­دەگى قوعامدىق كەڭەس توراعاسى و.جۇ­ما­بەكوۆ قىسقاشا ءسوز سويلەپ اشتى. مەملەكەت باسشىسىنىڭ باستا­ما­سىمەن قۇرىلعان قوعامدىق كەڭەس ينستيتۋتى ازاماتتىق سەكتور­دىڭ مۇددەلەرىن قورعاۋدا ماڭىز­دى ءرول اتقارادى. سونىمەن قاتار, مەم­لە­كەتتىك باسقارۋدا جانە قازاقستان­دىق­تاردىڭ ءومىر ءسۇرۋ ساپاسىن جاق­سار­تۋدا وزىندىك ورىن الادى. قوعامدىق كەڭەس جانىنان كوميسسيالار قۇرىلدى. ولاردىڭ وتىرىستارىندا مينيسترلىك جۇمىسىنىڭ نەگىزگى باعىتتارى بو­يىنشا ماسەلەلەر قارالاتىن بولادى, دەدى وڭالسىن يسلام ۇلى. ادىلەت ءمينيسترى بەرىك يماشەۆكە  بايانداما جاساماس بۇرىن ەسەپتىك كەزدەسۋگە قاتىسۋشىلاردى اقتوبەدە ەرلىكپەن قازا تاپقانداردىڭ رۋحىنا تاعزىم ەتۋگە شاقىرىپ, ءبىر مينۋتتىق ۇنسىزدىك شاراسىن وتكىزۋدى سۇرادى. ءبىر مينۋتتىق ۇنسىزدىكتەن كەيىن ءسوز وربىتكەن مينيستر ءوز ۆەدومستۆوسىنىڭ مەملەكەتتىك ورتالىق ورگاندار تاراپىنان ازىرلەنەتىن نورماتيۆتىك-قۇقىقتىق اكتىلەرگە, سونداي-اق, حالىقارالىق كەلىسىمدەر مەن حالىق­ارا­لىق ۇيىمدار اكتىلەرىنە زاڭدىق ساراپتاما جۇرگىزەتىندىگىن ايتتى. بۇل رەتتە, مينيسترلىك مەملەكەتتىك ورتا­لىق ورگانداردىڭ, جەرگىلىكتى اتقارۋشى جانە وكىلەتتى ورگانداردىڭ نور­ماتيۆتىك-قۇقىقتىق اكتىلەرىن مەم­لە­كەتتىك تىركەۋگە الاتىنى ەرەكشە اتالدى. مينيستر 2015 جىلى حالىقارالىق كەلىسىمدەر مەن نورماتيۆتىك-قۇقىق­تىق اكتىلەردىڭ 711 جوباسى ەنگىزىل­گەندىگىنە نازار اۋدارتتى. ونىڭ كەل­تىرگەن مالىمەتىنە قاراعاندا, قازاق­ستاندىق شارتتىق بازا 3683 حالىق­ارالىق كەلىسىمدەردى قامتىعان. سونداي-اق, جوعارى زاڭ شىعارۋشى ورگان را­تيفيكاتسيالاعان 1190 كەلىسىم ەرەك­شە باسىمدىققا يە. بىزگە زاڭ­گەرلىك ساراپتاماعا جىل سايىن 70 زاڭ جوباسى, 2 مىڭعا جۋىق پرەزيدەنت پەن ۇكىمەت اكتىلەرىنىڭ جوبالارى, سونداي-اق, 10 مىڭنان استام ورتالىق جانە جەرگىلىكتى ورگانداردىڭ نور­ما­تيۆتىك-قۇ­قىقتىق اكتىلەرى كەلىپ ءتۇ­سەدى, دەدى بەرىك ءماجيت ۇلى. ب.يماشەۆ, سونىمەن قاتار, ءوزى باسشىلىق جاسايتىن مينيسترلىك قۇزىرىنا 50-دەن استام مەملەكەتتىك قىزمەت بەكىتىلگەندىگىمەن دە ءبولىستى. ادىلەت مينيسترلىگىنە مەملەكەتتىك قىز­مەتتىڭ 53 ءتۇرى بەكىتىلگەن, ونىڭ ءىشىن­دە مينيسترلىك تاراپىنان تىكە­لەي 40 قىزمەت ءتۇرى كورسەتىلەدى, 9-ى جەرگىلىكتى اتقارۋ ورگاندارى  ءجا­نە 4 قىزمەت «ۇكىمەت ازاماتتار ءۇشىن» مەملەكەتتىك كورپوراتسيا­سى ارقىلى اتقارىلۋدا, دەدى ادىلەت ءمينيسترى. ونىڭ ايتۋىنشا, وتكەن جىلعى زاڭنامالىق وزگەرىستەر زاڭدى تۇل­عالاردى قاعازدان ەلەكتروندى ءپى­شىم­گە اۋىستىرۋ ارقىلى تىركەۋدى 1 سا­عاتقا قىسقارتۋعا مۇمكىندىك بەرگەن. بۇل ءوز كەزەگىندە كوممەرتسيالىق ۇيىم­­داردىڭ تىركەلۋىن 18 پايىزعا ۇل­عاي­تىپتى. ءمينيستردىڭ سوزىنەن بەلگى­لى بول­عانداي, 2014 جىلمەن سالىس­تىر­عاندا ەلەكتروندىق تىركەۋ 4 ەسەگە دەيىن وسكەن. جانە دە مينيسترلىكتى قۇرىلىمدىق جاعىنان 60 پايىزعا دەيىن وزگەرتۋ 41 ميلليون تەڭگەنىڭ ۇنەمدەلۋىنە مۇمكىندىك بەرگەن. اتاپ ايتقاندا, كوميتەتتەردىڭ 3 توراعاسى مەن 7 ورىنباسارىنىڭ قىزمەتى الىنىپ تاستالىپتى. بۇدان باسقا, سوت اكتىلەرىن ورىنداۋ دەپارتامەنتىنىڭ 16 باسشىسىنىڭ قىزمەتى, سول سياقتى استانا جانە الماتى قالالارى مەن وبلىستارداعى جىلجىمايتىن م ۇلىكتى تىركەۋ ورتالىقتارىنىڭ 16 ديرەكتورى قىسقارعان. ەۋرازيالىق ەكونوميكالىق وداق­قا قاتىستى سوزىندە ب.يماشەۆ حا­لىقارالىق كەلىسىمدەر مەن ەۋرازيا­لىق ەكونوميكالىق كوميسسيا تاراپىنان شەشىمدەر شىعارىلماس بۇرىن مينيسترلىك ولاردىڭ قازاقستان كونس­تيتۋتسياسى مەن ەاەو تۋرالى كەلىسىمگە سايكەستىگى تۋرالى زاڭدىق ساراپتامادان وتكىزىلەتىندىگىنە نازار اۋدارتتى. جالپى, ەاەو جۇمىس ىستەگەلى 2176 زاڭدىق جوبا ساراپتامادان وتكىزىلىپتى. قورىتا ايتقاندا, ستراتەگيالىق جوسپاردىڭ 2015 جىلى بەلگىلەنگەن بارلىق ماقسات-مىندەتتەرىنىڭ 90,8 پايىزى ورىندالعانى بەلگىلى بولدى. كەزدەسۋگە قاتىسۋشىلار اتقارۋشىلىق ءىس جۇرگىزۋ جانە قۇقىقتىق قىزمەت كورسەتۋ ماسەلەلەرىنە قىزىعۋشىلىق تانىتتى. جانە دە زالداعى عانا ەمەس, ەلىمىزدىڭ وزگە وڭىرلەرىنەن بايلا­نىسقا شىققاندار سۇراقتارىنا دا جان-جاقتى جاۋاپتار بەرىلدى. اسقار تۇراپباي ۇلى, «ەگەمەن قازاقستان»