الەۋمەتتىك ماڭىزى زور جوبا اياقسىز قالماۋى ءتيىس

وسى زامانعى مەديتسينا مەن بيولوگيا عىلىمدارى بارىنشا دامىپ وتىرسا دا, قاتەرلى ىسىككە قارسى داۋا تابا الماۋدا. سونىڭ كەسىرىنەن دۇنيەجۇزىندە ميلليونداعان ادام تۋعان-تۋىستارىن قان جىلاتىپ, جىل سايىن ومىرمەن ەرتە قوشتاسادى. ءبىزدىڭ ەلىمىزدە دە سولاي. ونكولوگيالىق اۋرۋلاردى انىقتاۋ مەن ونىڭ الدىن الۋعا قانشاما ارەكەتتەر جاسالىپ جاتقانىمەن, ونىڭ سانى ازايار ەمەس. ءتىپتى, سوڭعى جىلدارى ونىڭ 9 پايىزعا ارتقاندىعى ءمالىم بولىپ وتىر. ءداستۇرلى تۇردە جاسالاتىن حيرۋر­گيا­لىق وتا, حيميالىق ساۋلەلەر ارقى­لى ىسىكتىڭ تامىرىن جويۋ ادىستەرى دە قالا­عان ناتيجەلەرىمىزگە قول جەتكىزبەۋدە. ال دامىعان شەتەلدەردە بۇل ناۋبەتكە قارسى كۇرەس ۇنەمى جەتىل­دىرىلىپ, ەمدەۋدىڭ جاڭا تاسىلدەرى اشىلىپ وتىرادى. يننوۆاتسيالىق تەحنولوگيالاردى ەنگىزۋدىڭ بىزدەگى سىلبىر دەڭگەيى الدىڭعى قاتارلى سونداي تاسىلدەردى مەڭگەرۋگە دە مۇمكىندىك بەرمەۋدە. الايدا, اۋىزدى قۋ شوپپەن سۇرتە بەرۋگە دە بولمايدى. «ونكولوگيا جانە ترانسپلانتولو­گيا­نىڭ ۇلتتىق ورتالىعى» اق 2012 جىلدان باستاپ, ونكولوگيالىق دەرت­تەردى ەمدەۋدىڭ جاڭا تاسىلدەرىن مەڭ­گەرۋدە. ول ونكودەرتتەردىڭ ءارى قاراي جايىلماي, دامۋىن تۇراقتاندى­رىپ, ىسىكتى رەگرەسسيالىق جولمەن ءبىرتىن­دەپ قۇرتۋعا باعىتتالعان. بۇل ەم شارا­لارىن اۋىرتپايتىن پرەپاراتتار­دى قولدانباي-اق جاساۋعا مۇمكىندىك بەرەدى جانە پاتسيەنتتەردىڭ ءومىرىن ۇزارتادى. وسى جوبانىڭ شەڭبەرىندە ميىندا پايدا بولعان قاتەرلى ىسىكتەن 95 ادام ەمدەلىپ شىقتى. جاڭا ءتاسىلدىڭ تيىمدىلىگى 65 پايىز ەكەندىگىنە كوزىمىز جەتىپ وتىر. قازاقستاندىق جوبانىڭ ءتيىم­دىلىگىنە شەتەلدىك ماماندار دا نازار اۋدارىپ, ورتالىقتا بىرنەشە حالىقارالىق سەمينارلار وتكىزىلدى. الەمنىڭ بەلگىلى نەيروحيرۋرگتەرى وعان وزدەرىنىڭ جوعارى باعالارىن بەردى. وسىنداي قول جەتكىزگەن تابىستىڭ كەيىنگى تاعدىرى ەندى نە بولىپ جاتىر دەيسىز عوي. داعدارىس تالاپتارىنا سايكەس جوبانى قارجىلاندىرۋ 2015 جىلدان باستاپ توقتاتىلدى. «التىن شىققان جەردى بەلدەن قاز» دەگەن بار ەمەس پە, ەلىمىز ءۇشىن عانا ەمەس, بۇكىل الەمدىك دەڭگەيدە ۇلكەن جەتىستىك بولىپ تابىلاتىن جوبانى جاپپايىق, كەرىسىنشە, ودان ءارى دامىتايىق دەپ قاراجات سۇراپ, دەنساۋلىق جانە الەۋمەتتىك دامۋ مينيسترلىگىنە بار­عان ءوتىنىشىمىز اياقسىز قالدى. وسى ماسەلەلەردىڭ ءبارىن ايتا وتى­رىپ, دەنساۋلىق جانە الەۋمەتتىك دامۋ ءمينيسترىنىڭ اتىنا تاعى دا دەپۋتاتتىق ساۋال جولدادىق. حالىقتىڭ الەۋمەتتىك دامۋى مەن دەنساۋلىعىنىڭ جاقسارۋىنا مۇمكىندىك جاساۋعا ءتيىستى ۆەدومستۆو ءتيىمدى جوبانى جالعاستىرۋعا قارجى تابار دەگەن ۇمىتتەمىز. قۇرالاي قاراكەن, ءماجىلىس دەپۋتاتى