ەۋروپا تورىندە – فۋتبول بايگەسى

كەشە تۇندە فرانتسيادا ەۋروپا چەمپيوناتى باستالدى ماۋسىمنىڭ 11-ىنە قاراعان ءتۇنى فرانتسيانىڭ سەن-دەني قالاسىنداعى «ستاد دە فرانس» ستاديونىندا فرانتسيا جانە رۋمىنيا قۇرامالارى اراسىنداعى ويىنمەن «ەۋرو-2016» ءتۋرنيرى ءوزىنىڭ كۇن تارتىبىندەگى ماسەلەسىنە كىرىسىپ كەتكەنىن ايداي الەمگە جاريا ەتتى. ماتچ استانا ۋاقىتىمەن ساعات 00:50-دە باستالدى. دالىرەگى, وسى مەزگىلدە چەمپيوناتتىڭ اشىلۋىنا ارنالعان سالتانات ساپ تۇزەدى دە, ارادا ون مينۋت وتكەننەن كەيىن كەزدەسۋگە كەزەك كەلدى. تاريحتا تۇڭعىش رەت قۇرلىقتىڭ 24 ۇزدىك كومانداسىنىڭ باسىن قوسىپ وتىرعان دوپ دوداسى تۋرا ءبىر اي مەرزىمگە سوزىلىپ, شىلدەنىڭ 10-ى كۇنى مارەگە جەتەدى. «ەۋرونىڭ» بۇرىنعى رەگلامەنتتەن ايتارلىقتاي مولشەردە ۇلعايا ءتۇسۋى يسلانديا, سولتۇستىك يرلانديا, سلوۆاكيا, ۋەلس جانە البانيا سەكىلدى بەس ەلدىڭ قۇرا­مالارىنا چەمپيوناتقا قاتىسۋ مۇمكىندىگىن الىپ بەردى. ەۋروپا چەمپيوناتى فينال­دىق كەزەڭىنە قاتىسۋشىلار قاتارىنىڭ ارتۋى ونىڭ ءوتۋ تارتىبىنە دە ءبىرشاما وزگەرىستەر ەنگىزدى. ەندى توپتان بۇرىنعىداي تەك العاشقى ەكى ورىندى جە­ڭىپ العان قۇرامالار عانا ەمەس, سونىمەن قاتار, ءۇشىنشى ورىن­داعى ارالارىنداعى ۇزدىك كور­سەتكىشتەرگە جەتكەندەرى دە وسى ساپتان تابىلادى. سونىڭ ارقاسىندا 1/8 فينالعا التى توپتىڭ تورتەۋىندە ءۇشىنشى بولعان تەرمە جاماعاتتار ىلەسىپ كەتە باراتىن بولادى. سول سياقتى قۇرلىق بىرىنشىلىگىندە 1/8 في­نالدىق كەزدەسۋلەر دەگەن دە ءبىرىنشى رەت قولدانىلعالى وتىر. بۇدان بۇرىن ەۋروپا چەمپيوناتىندا پلەي-وفف ويىندارى شيرەك فينالدان باستالاتىن ەدى. بەلگىلى فۋتبول ساراپشىلارى قازىر ءباستى كىمگە تىگەتىندەرىن بىلمەي وتىر. دەگەنمەن, گەرمانيا قۇراماسىنىڭ قازىر وتە جوعارى دايىندىق ساپىندا ەكەنىنە نازار اۋدارىپ وتىرعاندار دا از ەمەس. شىن مانىندە نەمىستەر كومانداسىنىڭ بارلىق شەبىندە دە الەمدىك دەڭگەيدەگى جۇلدىزدار شوعىرى وينايدى. ونىڭ كوشى الدىندا مانۋەل نويەر, ماتس حۋممەلس, توماس ميۋللەر, توني كروس سەكىلدى تارلاندارمەن قوسا, قۇرلىقتىڭ ۇزدىك كلۋبتارىندا جەتەكشى رولدەر الىپ وتىرعان جاس تولقىننىڭ كوپتەگەن وكىلدەرى ءجۇر. نەمىستەردى دودادا جەڭىسكە جەتۋگە جەتەلەپ وتىرعان جەلىكتىڭ ءبىرى, ءسوز جوق, يسپانيانىڭ 2010 جىلى الەم چەمپيوناتىن ۇتىپ العاننان كەيىن 2012 جىلى كونتينەنت سايىسىندا توپ جارعانى بولماق. برازيليادا وتكەن سوڭعى, 2014 جىلعى مۋنديالدا التىن جۇلدەگەر بولعان المانداردىڭ ەندى يسپاندار سياقتى ۇلكەن جۇلدەدەن كەيىن كىشىگىرىم بەلەستى دە باعىندىرىپ العىسى كەلەتىنى تۇسىنىكتى جايت. بۇعان ولاردىڭ مۇمكىندىكتەرى دە جەتكىلىكتى. توپتا ۋكراينا, پولشا جانە سولتۇستىك يرلانديا قۇرا­مالا­رىمەن كۇش سىناساتىن ونىڭ كەلەسى كەزەڭدەرگە ەشبىر قيىن­دىقسىز بارا الاتىنىنا كۇمان كەلتىرۋ قيىن. جۇرت قاتارىندا كريشتيانۋ رونالدۋ سەكىلدى دارا جۇلدىزى بار پورتۋگاليا قۇراماسىنىڭ دا تالاي جەردىڭ شاڭىن قاعا الاتىنىنا ءشۇبا كەلتىرە الماسا كەرەك. ءدال وسىنداي باعانى ماماندار زلاتان يبرا­گيموۆيچتىڭ جاساعى – شۆەتسيا قۇراماسىنا دا بەرىپ وتىر. ال انگليا كومانداسى وسى جولى ءوزىنىڭ تاريحىندا العاش رەت تۋرنيرگە ەڭ جاس كومانداسىن اكەلىپتى. ورتا جاسى 25 بولاتىن اعىلشىندار ۇجىمى الەمدىك دەڭگەيدەگى ءۇش-ءتورت جۇلدىزى قاتارىنا جاس بۋىننىڭ وتكىر وكىلدەرىن قوسقان. البەتتە, باستى ۇمىتكەرلەر تىزىمىنەن الاڭ يەسى – فرانتسيا قۇراماسىن ەشكىم شىعارىپ تاس­تاي المايدى. بۇعان دەيىن ەكى رەت قۇرلىق بىرىنشىلىگىندە توپ جارعان فرانتسۋزدار سونىڭ ەكەۋىن دە ءوز الاڭىندا ۇتقان. سوسىن بۇعان دەيىنگى ەكى ەۋرودا الدىنا جان سالماعان يسپانيا قۇراماسى سونىڭ سانىن ۇشەۋمەن تولتىرۋدى ارمانداعالى قاشان! مىنە, وسى سەبەپتەردىڭ ءبارى فرانتسۋز جەرىندەگى فۋتبول الامانىنىڭ تارتىستى دا قىزىقتى وتۋىنە سەبەپ بولۋعا ءتيىس. بۇگىن چەمپيوناتتا ءۇش ويىن وينالادى. ولار البانيا – شۆەيتساريا, ۋەلس – سلوۆاكيا جانە انگليا – رەسەي قۇرامالارى اراسىندا وتەدى. سەرىك ءپىرنازار, «ەگەمەن قازاقستان»