وتانىما ورالعانىما ەش وكىنبەيمىن

دەيدى «جاس قانات-2016» جەڭىمپازى پاراسات وتان سەمەيدە قازاقستاندىق جاس ورىنداۋشىلار اراسىندا جىل سايىن ءداستۇرلى تۇردە وتەتىن رەسپۋبليكالىق «جاس قانات» كونكۋرسىندا باس بايگەنى جەڭىپ العان انشىگە ارنالعان جەكە ءباسپاسوز ءماسليحاتى ءوتتى. 22 جاسار پاراسات وتان بۇل كۇندەرى امىرە قاشاۋباەۆ اتىنداعى مەملەكەتتىك فيلارمونيادا ەڭبەك ەتەدى. پاراسات قىتايدا تۋىپ-ءو­س­كەن. 2007 جىلى ول وتباسىمەن اتامەكەنىنە ورالعاندا قۋا­نىش­تارىندا شەك بولمادى. ولار شىعىس قازاقستان وبلىسى, ءۇرجار اۋدا­نىنداعى بلاگودارنوە اۋىلىنا قونىستانادى. ايتا كەتۋ كەرەك, ارعى اتالارى كەزىندە قى­تاي­عا وتكەنمەن, سول جاقتا تۇرسا دا, سالت-داستۇرلەرىنە بەرىك بولىپتى. ولاردىڭ وتباسىنىڭ ءبىر ەرەك­شەلىگى, ەر ادامدارىنىڭ ءان­شىلىك قابىلەتى. اكەلەرىنە تارتىپ, ءبارى دە ءان سالادى ەكەن. اكەسى – پارا­ساتقا قازاق اندەرىن ۇيرەتكەن ال­عاشقى تالىمگەرى. پاراسات اۋىل مەك­تەبىندە ءبىلىم الا ءجۇرىپ, ءان سالۋىن دا جالعاستىرا بەردى. وسى­دان بەس جىل بۇرىن شاكارىم اتىن­داعى مەملەكەتتىك ۋنيۆەرسيتەتكە ءتۇسىپ, كاسىبي مۋزىكانت بولۋدى ماقسات تۇتادى. ول مۋزى­كا كافەدراسىنداعى ۇستازى قر مادەنيەت قايراتكەرى, پروفەسسور ايتمۇحامبەت بەيسەمبەكوۆكە ەرەكشە ريزا, «اتامەكەنىمە ورال­عانىما ەش وكىنبەيمىن, وسىنداي ۇلاعاتتى جانداردىڭ ءتالىمىن كوردىم» دەدى ءباسپاسوز ءماسليحاتى بارىسىندا اعىنان جارىلىپ. ۇستازى ۇزاق جىلدار بويى پاراساتتىڭ داۋىسىن قويىپ, ءبىلىمىن تەرەڭدەتكەن. ناتيجەسى ويداعىداي, بۇل كۇندەرى ۆوكاليست پاراسات حالىق اندەرىمەن قوسا, قازىرگى زاماناۋي اندەردى, كلاسسيكانى قاتار الىپ جۇرەدى. «جاس قانات-2016» كونكۋرسىنا قاتىسۋ وڭاي ەمەس, سىنعا ءتۇس­كەندەر بارلىق تالاپ ۇدەسىنەن شىعا ءبىلۋ كەرەك. فيلارمونيانىڭ كوركەمدىك جەتەكشىسى قادىلبەك وماروۆتىڭ ايتۋىنشا, پاراسات ادىلقازىلار القاسىنىڭ نازا­رىنا ۇسىنىلاتىن اندەردى ءوزى ىرىكتەپ, تاڭداعان. «جورعا تاي» اتتى حالىق ءانىن ەستراداعا لايىق­تاپ ورىنداعاندىقتان, العاشقى انىمەن-اق تىڭداۋ­شىلاردىڭ كو­ڭىلىن باۋراپتى. ادىلقازىلاردىڭ بارلىعى, ءتىپتى, بۇكىل كورەرمەن بىردەن ورىندارىنان تۇرا قول شاپالاقتاپ, قوشەمەت كورسەتكەن. ەكىنشى تۋردا ول يسپان ءانىن ورىنداسا, فينالدا يتاليالىق «يزابەل» ءانىن ناقىشىنا كەلتىرە شىرقاعان. مىنە, وسىلايشا بيىك شىڭدى باعىندىرا بىلگەن جاس تالانت سەمەيگە ورالىپ, فيلارمونياداعى ەڭبەك جولىن جالعاستىرۋدا. دەگەنمەن, «اتتەگەن-اي» دەيتىن تۇس تا جوق ەمەس, ءباسپاسوز ءماس­ليحاتىنا قاتىسۋشى زينۋرا ابدولدينوۆانىڭ ايتۋىنشا, جاس وتباسىلى پاراساتتىڭ ازىرشە جەكە باسپاناعا قول جەتكىزۋى قيىن بولىپ تۇر. ول كەلىنشەگى جانە جاس سابيىمەن ستۋدەنتتىك جاتاقحانانىڭ اياداي بولمەسىندە تۇرىپ جاتسا كەرەك. راۋشان نۇعمانبەكوۆا سەمەي