ۇلانداردى ۇمىتپايدى

مەملەكەت باسشىسى نۇرسۇلتان نازارباەۆ اقتوبە قالاسىندا جاسالعان تەررورلىق اكتىنىڭ سالدارىنان ادامداردىڭ قۇربان بولۋىنا بايلانىستى ەل بويىنشا 9 ماۋسىمدى ۇلتتىق ازا تۇتۋ كۇنى رەتىندە جاريالادى, دەپ حابارلادى ۇلتتىق ۇلاننىڭ ءباسپاسوز قىزمەتى. قانىشەر قاسكويلەردىڭ اقتوبە قالاسىندا جاساعان شابۋىلى كەزىندە ولارعا ەرلىكپەن تويتارىس بەرۋ كەزىندە ۇلتتىق قاۋىپسىزدىك كوميتەتىنىڭ اسكەري قارسى بارلاۋ قىزمەتىنىڭ اسكەري قىزمەتشىسى مايور دانيال مايلىباەۆ, ۇلتتىق ۇلاننىڭ اقتوبە قالاسىنداعى 6655 اسكەري ءبولىمىنىڭ كەلىسىمشارت قىزمەتىنىڭ سەرجانتى بەرىكجان قاليەۆ جانە مەرزىمدى اسكەري قىزمەتتەگى قاتارداعى جاۋىنگەر دوسبول ساپار قازاعا ۇشىرادى. وسىعان وراي كەشە ۇلتتىق ۇلان باس قولباس­شى­لىعىندا بوزداقتاردى ازا تۇتۋ شاراسى ءوتتى. قارا­لى جيىنعا ۇلتتىق ۇلان باس قولباسشىلىعىنىڭ جەكە قۇرامى, ءىىم جانە ۇلتتىق ۇلان ارداگەرلەر كەڭە­سىنىڭ توراعاسى ميليتسيا گەنەرال-مايورى ومىرزاق بولسام­بەكوۆ, اسكەردىڭ ارداگەرلەر قاۋىمى جانە ۇلتتىق قاۋىپ­سىزدىك كوميتەتىنىڭ قىزمەتكەرلەرى قاتىستى. جينالعان قاۋىم قارۋلاستارىن ءبىر مينۋت ۇنسىزدىكپەن ەسكە الدى. ۇلتتىق ۇلان باس قولباسشىلىعى اتىنان ءسوز العان ۇلتتىق ۇلان باس قول­باس­شىسىنىڭ ورىنباسارى گەنەرال-مايور البەرت ماتكاريموۆ: «مەن انتتارىنا ادال بولىپ, وتان ءۇشىن, ەل ءۇشىن اجال قۇشقان باۋىرلارىمىزدىڭ وتباسى, تۋعان-تۋىستارىنا قايعىلارىنا ورتاقتاسىپ كوڭىل ايتامىن. ءبىزدىڭ, ۇلتتىق ۇلاننىڭ تاراپىنان الداعى ۋاقىتتارى قارا جامىلعان وتباسىلارعا قاجەتتى كومەكتىڭ بارلىعى دا كورسەتىلىپ, ۇدايى قامقورلىققا الىناتىن بولادى», – دەدى.