پاريج جانكۇيەرلەردى قوقىسپەن قارسى الىپ جاتىر (فوتو)

فرانتسيادا فۋتبولدان ەۋروپا چەمپيوناتىنىڭ باستالۋىنا ءبىر تاۋلىكتەي عانا ۋاقىت قالعان شاقتا مۇنداعى الەۋمەتتىك تەكەتىرەس قارقىنى ءالى باسەڭدەمەي تۇر. ەلدەگى اسا ءىرى كاسىپشىلدەر وداعى – جالپى ەڭبەك كونفەرەنتسياسى زاباستوۆكا جاساۋىن جالعاستىرىپ جاتىر.

قازىر وسىنداي ستاچكالاردىڭ سالدارىنان ەلدەگى كوپتەگەن قالالاردا ايماقارالىق نەمەسە جۇيرىك پويىزدار توقتاپ تۇر. بەيسەنبى كۇنى مۇندا 11 ماۋسىمنان 14 ماۋسىمعا دەيىن «ەر فرانس» اۋە كومپانياسى پيلوتتارىنىڭ زاباستوۆكا جاريالاعانى بەلگىلى بولدى. كومپانيا باسشىلىعى مەن ۇشقىشتار اراسىنداعى كەلىسسوز ءوزىنىڭ ناتيجەسىن بەرمەدى. كولىك توراپتارى مەن مۇناي وڭدەۋشى زاۋىتتار توقتاپ قالعاننان كەيىن جانار-جاعار ماي ماسەلەسىندە ايتارلىقتاي قيىن جاعداي تۋىندادى. ال كوممۋنالدىق قىزمەت ورگاندارىنىڭ بەلسەندىلەرى قالادان كۇل-قوقىستى شىعارۋدان باس تارتتى. مۇنىڭ اسەرىنەن قالانىڭ ءىشى كادىمگىدەي ساسىپ كەتتى. «مەن جاڭا عانا وراسان زور تىشقاندار توبىنىڭ قارتتار ۇيىنە قاراي بارا جاتقانىن كورىپ قالدىم. بۇعان جول بەرۋگە بولمايدى عوي», دەدى پاريج قالاسىندا تۇراتىن ءبىر ايەل اشۋلانىپ.

فرانتسيادا بۇل زاباستوۆكالاردىڭ باستالعانىنا قازىر ءۇش اي تولدى. بەيسەنبى كۇنى ولار الەمدگى ەڭ ءىرى كوتەرمە ساۋدا رىنوگىنا باراتىن جولدى جاۋىپ تاستاۋعا ارەكەت ەتتى. قالاي دەگەندە دە, بۇل چەمپيوناتتىڭ ويداعىداي وتۋىنە كەدەرگى كەلتىرەتىن سياقتى. رۋسلان يگىلىك.