اقتوبەدە قازا تاپقانداردى ەسكە الۋعا ارنالعان ميتينگ ءوتتى

مەملەكەت باسشىسى نۇرسۇلتان نازارباەۆتىڭ وكىمىمەن 9 ماۋسىم قازاقستاندا لاڭكەستىك اكتىنىڭ قۇرباندارىن ۇلتتىق ازا تۇتۋ كۇنى بولىپ جاريالاندى.  بۇگىن ساعات 9-دان باستاپ وڭىردە تۋلار ءتۇسىرىلىپ, مادەني-كوپشىلىك, سپورتتىق جانە ويىن-ساۋىق شارالارى كەيىنگە شەگەرىلدى, جەرگىلىكتى ارنالاردا ويىن-ساۋىق تەلە-راديو باعدارلامالارى توقتاتىلدى. ۇلتتىق ازا تۇتۋ كۇنىندە اقتوبەلىكتەر مەن قالا قوناقتارى قايعىلى وقيعا بولعان ورىندارعا گۇل شوقتارىن قويىپ, لاڭكەستىك ارەكەت كەزىندە قازا تاپقانداردىڭ رۋحىنا قۇرمەت كورسەتتى. №6655 اسكەري بولىمىندە ازا تۇتۋ ميتينگى ءوتىپ, «پانتەرا» دۇكەنىنە گۇل شوقتارى قويىلدى. «نۇر عاسىر» مەشىتىندە قازا تاپقانداردىڭ رۋحىنا قۇران باعىشتالدى. 5 ماۋسىم كۇنى بەلگىسىز توپ اقتوبەدەگى ەكى قارۋ-جاراق دۇكەنى مەن اسكەري بولىمگە قارۋلى شابۋىل جاسادى. ءىىم-ءنىڭ مالىمەتىنشە شابۋىلعا قاتىسۋشىلاردىڭ دەنى ۇستالعان, 6 ادام ىزدەستىرىلۋدە. وكىنىشكە وراي, شابۋىل سالدارىنان 7 اسكەري جانە ازاماتتىق تۇلعا كوز جۇمدى. مەملەكەت باسشىسىنىڭ تاپسىرماسىمەن جەرگىلىكتى بيلىك لاڭكەستىكتەن زارداپ شەككەن جانە قايتىس بولعانداردىڭ وتباسىلارىنا جان-جاقتى كومەك كورسەتۋدە. ساتىبالدى ءساۋىرباي. دەرەك, فوتو: egemen.kz