تاراز بەن ماسكەۋ اراسىندا ۇشاق باعىتتارى اشىلدى

تارازعا ماسكەۋدەن «S7» ۇشاعى العاش رەت كەلىپ قوندى. 2013 جىلى مەملەكەتتىك بيۋدجەتتەن 4,6 ميلليارد تەڭگە ءبولىنىپ, «اۋليە-اتا» حالىقارالىق اۋەجايى قايتا جاڭعىرتىلۋدان وتكەن بولاتىن. ناتيجەسىندە اۋەجايدىڭ جولاۋشىلار تەرمينالىنىڭ اۋماعى ەداۋىر ۇلعايىپ, جاڭارىپ, جوعارى مۇمكىندىكتەرگە يە بولعانى بەلگىلى. سول كەزدە الەمنىڭ بىرقاتار ەلدەرىنە ۇشاق باعىتتارىن اشۋ كوزدەلگەن ەدى. «S7» كومپانياسىنىڭ وكىلى ەۆگەني چەرنىشەۆ بۇل بايلانىس قازاقستان مەن رەسەي اراسىنا عانا ەمەس, ەۋروپانىڭ بىرنەشە ەلدەرىنە ۇشاقپەن جەتۋگە  جول اشاتىنىن ايتادى. سونداي-اق, ماسكەۋ ارقىلى رەسەيدىڭ قاي قالاسىنا بارىپ-قايتقىڭىز كەلسە, باراتىن جانە قايتاتىن بيلەتتى تارازدا تۇرىپ-اق الۋعا مۇمكىندىگىڭىز بار ەكەن. ماسكەۋ – تاراز اراسى شامامەن 3 مىڭ شاقىرىم بولسا, 50-55 مىڭ تەڭگە كولەمىندە قاراجات كەتەدى ەكەن. وسى كۇنى تارازدا ساعات 7.05-تە «اۋليە-اتا» اۋەجايىنان تۇڭعىش رەت تاراز-ماسكەۋ باعىتىن بەتكە العان ۇشاق 136 جولاۋشىمەن اۋەگە كوتەرىلدى. بۇل ۇشاق تاراز – ماسكەۋ اراسىن اپتا سايىن جالعايتىن بولادى. ورالحان ءداۋىت. دەرەك, فوتو: egemen.kz