قيعىلىق سالعان «قىزىل اتەش»

سوڭعى ۋاقىتتارى وڭتۇستىكتە بازار ورتەنۋ وقيعالارى جيىلەپ كەتتى. مامىر ايىنىڭ وزىندە «يساتاي», ءسال كەيىنىرەك كوتەرمە باعامەن جۇمىس جاسايتىن «اكبار» بازارىندا ءورت شىقتى. ءورت سوندىرۋشىلەر قۋاتتىڭ تۇيىقتالۋىنان دەگەنىمەن, كەيبىر بازاردىڭ يەلەرىمەن سويلەس­كەنىمىزدە, وزىمەن باسەكەلەس الدە­كىمدەردەن كورىپ, كىجىنىپ وتىرعانىن بايقاعانبىز. ءبىرىنشى سەبەپ راس بولا-اق قويسىن, بىراق نەسيە الىپ, ءوز ارباسىن ءوزى سۇيرەپ جۇرگەن قاراپايىم ادامدارعا وتە وبال. قازىرگىدەي ۋاقىتتا شەكەسى قىزىپ جۇرگەن ەشكىم جوق قوي. جاقىندا قالالىق اكىمدىكتە بازارداعى ءورت سەبەپتەرى جانە ونىڭ الدىن الۋعا بايلانىستى جيىن ءوتتى. اكىمدىكتەن بولەك, توتەنشە جا­عدايلار دەپارتامەنتى جانە كاسىپكەرلەر قاتىسقان جيىندا شىم­كەنتتەگى 33 بازاردىڭ 20-سى وتە قاۋىپتى جاعدايدا ەكەنى ايتىلدى. ما­مانداردىڭ زەردەلەۋى بويىنشا, بارلىق بازارلاردا رەكونسترۋكتسيا جۇرگىزىلىپ, ونسىز دا تار ساۋدا الاڭدارى اۋماعىندا نۇكتەلەردى كوبەيتكەن. بازار قوجايىنىنا قوسىمشا تابىس كوزى بولعانىمەن, تاۋ­ارلى ماتەريالدىق باعالى ءدۇ­نيەلەر شەكتەن تىس كوبەيىپ, ەسەسىنە ورتكە قارسى شارالاردى ىسكە اسىرۋعا مۇمكىندىكتەر مەيلىنشە ازايعان. ورتكە قارسى نورمالار بويىنشا بازارداعى قويمالار مەن ساۋدا نۇكتەلەرىنىڭ اراسىندا قالىڭ قابىرعا بولۋ كەرەك. الايدا, ءبىر جەردەن شىققان ءورتتىڭ ەكىنشى جاققا وتپەۋدىڭ الدىن الاتىن ورتكە قارسى قابىرعالار شىمكەنتتەگى بارلىق بازاردىڭ بىرىندە جوق. ماسەلەن, 2014 جىلى جەتى ءورت, 2015 جىلى ءتورت, ال سوڭعى بەس ايدا ءۇش ءورتتىڭ شىعۋ سەبەپتەرى وسىنداي قورقاۋلىق نيەتتە جاتىر. تالداۋ ماتەريالدارى كورسەت­كەندەي ءورتتىڭ شىعۋى نەگىزىنەن ەلەكتر توقتارىنىڭ تۇيىقتالۋىنان بولادى ەكەن. ءورت سالدارىنان بازار يەسى مەن كاسىپكەرلەر 1 ملرد. 885 ملن. تەڭگە شىعىن كورگەن. شىمكەنت قالاسى اكىمدىگىندە وتكەن جيىندا قالا اكىمى ع.ءابدى­راحىموۆ ءتيىستى ورىندارعا قالا بازارلارىنا تالداۋ جاساپ, ءورت شىعۋ قاۋىپسىزدىگىنىڭ الدىن الۋ شارالارىن كۇشەيتۋدى تاپسىردى. باقتيار تايجان, «ەگەمەن قازاقستان» وڭتۇستىك قازاقستان وبلىسى