تاۋارى تەگىن دۇكەن

قاراعاندى وبلىسىنداعى وساكاروۆ اۋدانىنىڭ ورتالىعىندا «راحمەت» دەپ اتالاتىن دۇكەن تۇتىنۋ­شىلارعا ايقارا ەسىك اشتى. بۇل ساۋدا ورنىنىڭ باسقا دۇكەن­دەردەن ايىرماشىلىعى سول – مۇنداعى تاۋارلاردى تۇتىنۋشىلار تەگىن الادى. – دۇكەن اشىلعان العاشقى كۇننىڭ وزىندە 3 وتباسىن بالالارعا جانە ەرەسەكتەرگە ارنالعان كيىم-كەشەكتەرمەن قامتاماسىز ەتتىك, – دەيدى جوبانى ۇيىم­داستىرۋشىلاردىڭ ءبىرى, «اتامەكەن» ۇلتتىق كاسىپكەرلەر پالاتاسى جانىنداعى دەنساۋلىق جانە قايىرىمدىلىق كوميتەتىنىڭ قاراعاندى وبلىسى بويىن­شا جەتەكشىسى سامال ماتەنوۆا. دۇكەننىڭ جۇمىس ىستەۋ جۇيەسى سونشالىقتى كۇردەلى ەمەس. قايىرىمى مول تۇرعىندار وزدەرىنە كەرەكسىز بولىپ قالعان, بىراق قولدانىسقا ابدەن جارامدى كيىم-كەشەك پەن تۇرمىستىق زاتتاردى, ءۇي جيھازدارىن وسىندا اكەلىپ وتكىزەدى. ازىرگە وساكاروۆتاعى دۇكەننىڭ سورەلەرى تاۋاردان قايىسىپ تۇر دەپ ايتۋ قيىن. سول سەبەپتى, جوبانى ۇيىمداستىرۋشىلار مۇندا قاراعاندىداعى دۇكەننەن دە ءبىراز دۇنيەلەردى جەتكىزگەن. ايتا كەتەيىك, «راحمەت» دەپ اتالاتىن مۇنداي دۇكەن العاش قاراعاندى قالاسىندا اشىلعان بولاتىن. جوبا جۇمىس ىستەگەن از عانا ۋاقىت ىشىندە 170-تەن استام وتباسى ناندى تەگىن الىپ, كيىم-كەشەك پەن باسقا دا زاتتارعا كوك تيىن دا جۇمساماي قول جەتكىزدى. قايرات ءابىلدينوۆ, «ەگەمەن قازاقستان» قاراعاندى وبلىسى, وساكاروۆ اۋدانى