استانا. 8 ماۋسىم. بۇگىن استانادا قازاقستان بوكس فەدەراتسياسى كۋبوگى جارىسىنىڭ جەرەبەسى تارتىلدى. بۇل تۋرالى egemen.kz ءتىلشىسى حابارلادى.
جەرەبەنى تارتۋ راسىمىندە استانا مەن الماتى قالالارىنىڭ جانە 14 وبلىستىڭ كوماندالارى ءتورت توپقا ءبولىندى.
ا توبىنا الماتى, شىعىس قازاقستان, سولتۇستىك قازاقستان وبلىستارى مەن الماتى قالاسىنىڭ كومانداسى ءتۇستى. ۆ توبىندا ماڭعىستاۋ, جامبىل, پاۆلودار مەن اقتوبە وبلىستارىنىڭ بوكسشىلارى كۇش سىناسسا, س توبىنداعى جەكپە-جەكتەرگە قاراعاندى, قىزىلوردا, قوستاناي وبلىستارى مەن استانا قالاسىنىڭ كومانداسى قاتىسادى. D توبىندا وڭتۇستىك قازاقستان, اقمولا, اتىراۋ مەن باتىس قازاقستان وبلىستارىنىڭ بىلعارى قولعاپ شەبەرلەرى ونەر كورسەتەدى.
ا توبىنىڭ كەزدەسۋلەرى تالدىقورعاندا, ۆ توبىنىڭ جەكپە-جەكتەرى اقتاۋدا وتسە, س توبىنىڭ كوماندالارى قىزىلوردادا, D توبىنا تۇسكەن وبلىستاردىڭ جاساقتارى كوكشەتاۋدا شارشى الاڭعا شىعادى.
8-11 قىركۇيەك كۇندەرى ا جانە س, ۆ جانە D توبىندا جەڭگەن كوماندالار شيرەك فينالدا كەزدەسەدى.
جارىستىڭ ەرەجەسى بويىنشا ءاربىر كوماندادا 20 بوكسشى بولۋى ءتيىس. ونىڭ ىشىندە 10 بوكسشى نەگىزگى قۇرامدا, 10 بىلعارى قولعاپ يەسى قوسالقى قۇرامدا بولادى. كوماندالار كەزدەسكەندە بوكسشىلار 10 جەكپە-جەك وتكىزەدى. ەگەر كەزدەسۋ 5:5 ەسەبىمەن تەڭ اياقتالسا, قوسىمشا جەكپە-جەك وتەدى. ونىڭ قاي سالماقتا بولاتىنى جەرەبەدە شەشىلەدى. سول كەزدە ا توبىنىڭ كومانداسى 64 كيلوعا دەيىنگى سالماقتاعى بوكسشىسىن, ۆ توبىنىڭ جاساعى 56 كيلو, س توبىنىڭ قۇراماسى 81 كيلوعا دەيىنگى, D توبىنىڭ كومانداسى 69 كيلوعا دەيىنگى سالماقتاعى وكىلىن دايىنداپ قويۋى ءتيىس.
جارىستىڭ جارتىلاي فينالى مەن فينالى 14-15 جەلتوقسان كۇندەرى وتەدى. فينالدىڭ قاي قالادا بولاتىنى ازىرشە بەلگىسىز. ونى كەيىنىرەك قازاقستان بوكس فەدەراتسياسى ايتادى.
بيىلعى كۋبوكتىڭ يەگەرى بىلتىرعىداي 25 ميلليون تەڭگە الادى. قازاقستان بوكس فەدەراتسياسى كۋبوگىنىڭ جارىسى 2010 جىلدان بەرى وتكىزىلىپ كەلەدى. سول جىلى استانا قالاسىنىڭ كومانداسى كۋبوكتىڭ يەگەرى اتانعان. 2011 جىلى قاراعاندى وبلىسى, 2012 جىلى ماڭعىستاۋ وبلىسىنىڭ بوكسشىلارى جارىستىڭ جەڭىمپازى بولسا, 2013 جىلى استانا كومانداسى تاعى دا كۋبوكتى باسىنان اسىرعان. 2014 جىلى جامبىل وبلىسى, ال بىلتىر وڭتۇستىك قازاقستان وبلىسىنىڭ جاساعى العاش رەت كۋبوكتىڭ يەگەرى اتاندى.
داستان كەنجالين.
دەرەك, فوتو: قازاقستان بوكس فەدەراتسياسى.
