بالا ساتۋشىلار سوت الدىنا كەلدى

سوڭعى جىلدارى قوعام وتە قاتى­گەزدەنىپ كەتتى. ايتپەسە, ۇياتتىڭ ءبارىن جيىپ قويىپ, كولدەنەڭ ءجۇرىس ءجۇرىپ تاپقان بالاسىن كوكەك انا ويلانباستان شىرىلداتىپ اجەتحاناعا تاستار ما ەدى. اتا-اناسىنان قىمسىنباستان جول بويى­نا لاقتىرىپ كەتەتىندەر دە تابىلىپ جاتىر. «قازاننان قاقپاق كەتسە, يتتەن ۇيات كەتەدى» دەگەندەي, ەندى ولاردىڭ قاتا­رىنا اق حالاتتى ابزال جاندار دەپ ا­رداق­تاپ جۇرگەن اعايىندارىمىز دا قو­سىلىپ ءجۇر. ەسى دۇرىس اتا-انا باۋىر ەتى بالاسىنان بەزبەيدى. جوعارىدا ايتقانداي, كوكەك انالار «ەتى دە, سۇيەگى دە سەندەر­دىكى» دەپ تاستاپ كەتكەننەن كەيىن بەي­كۇنا ءسابي كەيبىر حارام نيەتتىلەر ءۇشىن جەكە باسىنىڭ داۋلەتىن ارتتىراتىن بايلىققا اي­نالعان. شىمكەنتتەگى مامان­دان­دىرىلعان اۋدانارالىق سوتتا №1 پەريناتالدىق ور­تالىقتاعى اتىشۋلى بالا ساتۋ وقي­عاسىنا بايلانىستى سوت وتىرىسى باستالدى. مەديتسينالىق ورتالىقتا جاسىرىن بالالار ساتىلىپ كەلگەندىگىن وبلىستىق پروكۋراتۋرا انىقتاعان بولاتىن. بۇگىن­دە قىلمىستى زەرتتەۋ ماتەريالدارى 46 تومعا جەتتى. ءدارى­گەرلەردىڭ سول مەر­­زىمگە دەيىن 21 شاقا­لاقتى ساۋداعا شىعارعاندىعى تولىق دالەلدەنگەن. سۋديا ءابينۇر قاراباەۆ قاراپ جاتقان سوت پروتسەسى جابىق ەسىك جاع­دايىندا وتۋدە. ويتكەنى, ول بالالاردى بۇگىندە اسىراپ العان اكە-شەشەسى بار. سوت الدىندا بالا ساتىپ العان اتا-انالار كۋالىك ەتۋدە. ولاردىڭ سانى قازىر توقسانعا جەتتى. بىرەۋ ارقا ەتى ارشا, بورباي ەتى بورشا بولىپ, ءبىر سابيگە زار بولىپ ءجۇر. ال تاستاندى بالالاردى مەملەكەت قامقورلىعىنا بەرۋدىڭ ورنىنا, كەي­بىر دارىگەرلەر دۇكەنىندەگى تاۋارىن ساۋدا­لاعانداي ساتۋعا ماماندانىپ العان. جاقسى وتباسىنا تۇسسە, قۇدايدىڭ قا­راسقانى, ال ءسابي مۇشەلەرىن دونور رەتىندە ساتاتىن قاسكويلەردىڭ قولىنا ءتۇس­سە نە بولماق؟! ويلاۋدىڭ ءوزى قورقىنىشتى. باسقا ەمەس, ادام جانىنىڭ اراشاسى دەپ اسپەتتەيتىن اق حالاتتىلاردىڭ ءوزى وسىن­داي قادامعا باراتىندىعى قور­قىنىشتى. باقتيار تايجان, «ەگەمەن قازاقستان» وڭتۇستىك قازاقستان وبلىسى