قوستاناي. 8 ماۋسىم. قوستانايلىقتار تاتار-باشقۇرت حالىقتارىنىڭ جىل سايىنعى ءداستۇرلى سابانتوي مەرەكەسىن تويلادى. بۇل تۋرالى egemen.kz ءتىلشىسى حابارلادى.
سابانتوي مەرەكەسى جىل سايىن كوكتەمگى دالا جۇمىستارى اياقتالا بەرگەندە, ماۋسىم ايىندا تويلانادى. حالىقتىق مەرەكەگە اينالىپ كەتكەن وعان تەك تاتار-باشقۇرت ەتومادەني ورتالىعىنىڭ مۇشەلەرى, دياسپورا وكىلدەرى عانا ەمەس, بارشا قوستانايلىقتار جينالادى. توبىل جاعاسىنداعى «شاعالا» الاڭىنا بىرنەشە كيىز ۇيلەر تىگىلىپ, وندا تاتار, باشقۇرت حالىقتارىنىڭ ۇلتتىق تاعامدارى, ۇلتتىق بۇيىمدارى جايىلدى. سابانتويدىڭ ءسانىن تاتارلاردىڭ ءتۇرلى ءتاتتى تاعامدارى كەلتىرىپ, ءانشى, ءبيشى جانە بايانشىلارى, گارمونشىلارى قىزدىرادى. بۇل جولى دا باياننان توگىلگەن اندەر مەرەكەگە جينالعانداردىڭ دەلەبەسىن قوزدىرىپ, تاتارى, ورىسى, قازاعى, ازەربايجانى مەن وزبەگى – بارلىعى دا بيلەپ كەتتى.
مەرەكەگە تاتارستاننان ارنايى قوناقتار دا شاقىرىلدى. تاتارستاننىڭ حالىق ءارتىسى يسكاندەر بيكتاگيروۆ, ەڭبەك سىڭىرگەن ءارتىسى فاريد حاتىپوۆ بايانمەن تاتار حالقىنىڭ حالىق اندەرىن ناقىشىنا كەلتىرە ورىندادى. ولار تاتارستاننىڭ پرەزيدەنتى رۋستام ميننيحانوۆتىڭ سالەمىن جەتكىزدى.
سابانتوي مەرەكەسىنىڭ ءبىر ءسانى قاشان دا ۇلتتىق سپورت ويىندارى بولىپ سانالادى. ارمرەسلينگتەن, كۇرەستەن مەرەكەگە كەلگەن كەز كەلگەن جىگىت كۇشىن سىناپ كوردى. سابانتوي تەك تاتار, باشقۇرت حالقىنىڭ عانا ەمەس, قوستانايلىقتاردىڭ دەمالىس كۇنىن قىزىقتى ەتە ءتۇستى.
ءنازيرا جارىمبەتوۆا.
دەرەك: egemen.kz.
فوتو: ng.kz.
