ءتۇرلى-ءتۇرلى تاتتىلەر

ورال ىرگەسىندەگى شارۋا قوجالىعىنىڭ كونديتەرلىك ونىمدەرى رەسەيلىكتەرگە ۇناۋدا ورال شاھارىنا جالعاساتىن جەلاەۆ وندىرىستىك اۋماعىنداعى «پوپ­كوۆ» شارۋا قوجالىعىنىڭ ەگىن ەگۋمەن قاتار, وندىرىسپەن اينا­لىس­قانىنا 20 جىلدىڭ ءجۇزى بولدى. باستاپقىدا ماكارون ءونىم­دەرىن شىعارۋمەن اينالىستى. بىراق نارىقتان ورىن تابۋ قيىنعا ءتۇستى. ال بۇگىندە كونديتەرلىك جانە نان, ۆافلي, توقاش ونىمدەرىن ءوندىرۋدىڭ شەبەرى اتاندى. ساپالى ونىمدەرىمەن كۇللى ەلىمىزگە عانا ەمەس, كورشىلەس رەسەي نارىعىنا دا تانىلعان. مۇندا كونديتەرلىك ونىمدەردىڭ 30-شاقتى ءتۇرى وندىرىلەدى. سونىمەن قاتار, كاسىپورىن نان ونىمدەرىمەن ورال قالاسىن تۇراقتى قامتىپ وتىر. – ونىمدەرىمىزگە رەسەيدىڭ چەليابى, نيجني نوۆگورود, سا­ما­را, ساراتوۆ, ورىنبور وبلىس­تارىنان سۇرانىس مول. ءپىران­دىك پەن ءۆافليىمىز ونداعى تۇتىنۋ­شى­لارىمىزعا ۇنايدى. قازىر ماسكەۋلىكتەرمەن كەلىسىمشارت جاساۋعا دايىندىققا كىرىستىك. وندىرىلگەن ءونىمنىڭ 50 پايىزى ەكسپورتقا رەسەيگە شىعارىلادى. ءونىم وتكىزۋ جونىندە ماڭعىستاۋ, اتىراۋ, اقتوبە, وڭتۇستىك قازاق­ستان, اقمولا, الماتى, شى­عىس قازاقستان وڭىرلەرىمەن دە كە­لىسىمشارتتار جاسالعان. داع­دارىستى سەزىنىپ وتىرعانىمىز جوق, جۇمىسىمىز ىرعاقتى, – دەدى «پوپكوۆ» شارۋا قوجالىعىنىڭ جەتەكشىسى الەكسەي پوپكوۆ. 2011 جىلى كاسىپورىن «بيز­نەس­تىڭ جول كارتاسى-2020» مەملە­كەتتىك باعدارلاماسى بويىنشا «تسەس­نابانك» اق-تان نەسيەلىك قاراجات الىپ, توقاش جانە ۆافلي ءون­دىرەتىن جاڭا جەلى ورناتتى. مەم­لەكەتتىڭ قولداۋىمەن «دامۋ» كا­سىپكەرلىكتى دامىتۋ قورى ارقىلى بانك نەسيەسىنىڭ 14 پايىزدىق مولشەرلەمەسىنىڭ 50 پايىزىن سۋبسيديالاۋعا قول جەتكىزدى. جاڭا ەكى جەلىنىڭ ىسكە قوسىلۋىمەن 30 ادامعا جۇمىس اشىلعان. بارلىق وندىرىستىك تسەحتاردى قوسا العاندا 100 ادام تۇراقتى جۇمىسپەن قامتىلعان. ءوندىرىس ورنىندا تاۋلىگىنە 8 توننا ءونىم وندىرىلەدى. ءونىم وندىرۋگە شيكىزاتتىڭ 50 پايىزى وزدەرىنەن, قالعان بولىگىن وزگەلەردەن ساتىپ الادى. – شارۋا قوجالىعىنا قاراس­تى تسەحتا جۇمىس ىستەگەنىمە 2 جىل بولدى. بىزدەر دايىن ءونىم­دى قوراپشالارعا سالامىز. جالا­قىمىز تۇراقتى, تۇنگى اۋىسىمعا ورالدان جۇمىس اۆتوبۋسىمەن تاسىمالدايدى, – دەدى جۇمىسشى سامال جانگەرەەۆا. شارۋا قوجالىعىنىڭ باسشىسى ا. پوپكوۆ الداعى جۇمىس جوس­پارىنىڭ كوپتىگىنە توقتالىپ جات­پاي, ازىرگە ەكونوميكالىق قيىن­شى­لىقتار كەزەڭىندە تۇراقتى جۇمىستىڭ ءوندىرىس ءۇشىن ءمان-ماڭىزى زور ەكەندىگىن سالماقتاپ بەردى. گۇلبارشىن اجىگەرەەۆا, جۋرناليست, تەمىر قۇسايىن, «ەگەمەن قازاقستان» باتىس قازاقستان وبلىسى