وقىرمان ولجاسى – ءۇش كىتاپ

رۋحانيات پەن ادەبيەتتىڭ جاناشىرلارى, وقىرماندارى باردا ول ەشقاشان ولمەيدى, ءار ۋاقىتتا جاساي بەرمەك. ەۋرازيا ۇلتتىق ۋنيۆەرسيتەتى قابىرعاسىندا وسى ءبىر ادەمى قاعيدانىڭ راستىعىنا تاعى ءبىر كوزىمىز جەتتى. كەلەر ۇرپاققا ميراس بولار, بۇگىنگى بۋىننىڭ ساناسىن جەتىلدىرەر ءۇش بىردەي تۋىندى قالىڭ قاۋىمعا جول تارتتى. فيلوسوف, پروفەسسور عاريفوللا ەسىمنىڭ «تانىم كوكجيەگى», بەلگىلى اقىن سەرىك اقسۇڭقار ۇلىنىڭ «كوكەيىمدە – كۇلتەگىننىڭ جازۋى», جاس اقىن دينارا مالىك­قىزىنىڭ «ءومىر دەگەنىڭ وسى ەكەن» كىتاپتارىنىڭ تۇساۋى كەسىلدى. مۇنداي يگى ىسكە ۇيىتقى بولعان ازامات – كوپشىلىك تانيتىن جازۋشى, ەكونوميكا عىلىمدارىنىڭ دوكتورى مىرزاگەلدى كەمەل. ءۇش اۆتوردىڭ دا ەڭبەكتەرىن جيناقتاپ, ەڭ قۇندى دەگەن شىعارمالارىن, تۇششىمدى ويلارىن كوز مايىن تاۋىسىپ تەرىپ الىپ, وڭدەپ باسپاعا بەرگەن ەكەن. جيىنعا كىتاپ اۆتورلارىمەن قاتار, ۋنيۆەرسيتەت پرورەكتورى ديحان قامزابەك ۇلى, وقۋ ورنىنىڭ ۇستازدارى مەن وقىرمان جاس­تار قاتىستى. العاشقى بولىپ ءسوز العان عاريفوللا ەسىم «جاقسىلىق دەگەنىمىز, شىن مانىندە, ەشقانداي اقىسىز, مىندەتتەۋسىز جاسالعان ماقساتتى ءىس. ءبىز ايتىپ جۇرگەن شاپاعات, جومارتتىق اتتى ۇعىمدار دا وسىنىڭ اياسىنا سىيا­دى. بۇگىن, مىنە, سوعان راسىندا كۋا بولىپ وتىرمىز. مۇنداي شارۋالار, رۋحانياتقا دەگەن ءىس جۇزىندەگى جاناشىرلىق وزگە ازاماتتارىمىزعا دا ۇلگى بولسا ەكەن», دەپ جوبا اۆتورىنا كىتاپ اۆتورلارىنىڭ اتىنان شىن جۇرەكتەن العىسىن جەتكىزدى. سەرىك اقسۇڭقار ۇلى مەن دينارا مالىكقىزى ارقالانا ولەڭ وقىدى. بەلگىلى اقىندار وڭايگۇل تۇرجان, جانات اسكەربەكقىزى, ادەبيەتتانۋشى ومار جالەل ۇلى جانە باسقا دا قوناقتار, ستۋدەنتتەر ءسوز الىپ, لەبىز ءبىلدىردى. تۇساۋكەسەردى جۇرگىزىپ وتىرعان ديحان قامزابەك ۇلى «بۇل كەش – كىتاپسۇيەر قاۋىمنىڭ, ادەبيەتتىڭ, ىزگىلىكتىڭ كەشى بولدى», دەپ قورىتىندىلادى. اباي سەيفۋللا ۇلى, ل.ن. گۋميلەۆ اتىنداعى ەۇۋ ستۋدەنتى استانا