ماڭگىلىك ەل – ماڭگىلىك قۇندىلىقتار

الماتىدا «بوبەك» ۇلتتىق عىلىمي-پراكتيكالىق ءبىلىم بەرۋ جانە ساۋىقتىرۋ ورتالىعىندا ءبىلىم جانە عىلىم ءمينيسترى ەرلان ساعاديەۆتىڭ قاتىسۋىمەن ەلىمىزدە «ءوزىن-ءوزى تانۋ» رۋحاني-ادامگەرشىلىك ءبىلىم بەرۋ باعدارلاماسىنىڭ جۇزەگە اسىرىلۋى تۋرالى كەڭەيتىلگەن كەڭەس ءوتتى. كەڭەسكە «بوبەك» قورىنىڭ پرەزيدەنتى, «ءوزىن-ءوزى تانۋ» رۋحاني-ادامگەرشىلىك ءبىلىم بەرۋ باعدارلاماسىنىڭ اۆتورى سارا نازارباەۆا, ءبىلىم جانە عىلىم ءمينيسترىنىڭ كەڭەسشىسى باليا اكىمبەكوۆا, ن.نازارباەۆ ءبىلىم قورى ديرەكتورىنىڭ ءبىرىنشى ورىنباسارى سۆەتلانا مۇرزابەكوۆا, سونداي-اق «بوبەك» ۇلتتىق ورتالىعىنىڭ قىزمەتكەرلەرى قاتىستى. كەڭەيتىلگەن وتىرىس ەلىمىزدە عانا ەمەس, بۇكىل الەمدە ىزگى قۇن­دىلىقتاردىڭ, جاقسىلىق پەن ادىلەتتىلىك مۇراتتارىنىڭ ورىندالۋىنا ەلەۋلى ۇلەس قوسۋشى س.نازارباەۆانىڭ العى سوزىمەن اشىلدى. ءوز سوزىندە باعدارلاما اۆتورى وسكەلەڭ ۇر­پاقتى رۋ­حاني-ادامگەرشىلىك تۇر­عىدا دامىتۋعا ارنالعان «ءوزىن-ءوزى تانۋ» باعدارلاماسى – بۇل ءبىلىم بەرۋ ۇدەرىسىنىڭ ادامنىڭ رۋحاني تابيعاتىنا سايكەستىگىن قالپىنا كەل­تىرۋدى, سۇيىسپەنشىلىك پەن قامقورلىقتىڭ تۇتاس كەڭىستىگىن قامتاماسىز ەتۋدى, ءاربىر بالانىڭ ىشكى الەمىنىڭ ەرەكشەلىكتە­رىن, ونىڭ ەموتسيالىق-سەزىمدىك جانە مەنتالدىق تاجىريبەسىن ەسكەرۋدى كوزدەيتىن يننوۆاتسيالىق پەداگوگيكالىق جۇيە ەكەندىگىنە باستا نازار اۋداردى. ءوزىن-ءوزى تانۋ يدەياسى اۆتورىنىڭ پىكىرىنشە, باعدارلامانىڭ ءمانى بالانىڭ رۋحاني ءوسۋ جانە تۇلعالىق قا­لىپتاسۋ ۇدەرىسىندە وعان بارىنشا پەداگوگيكالىق قولداۋ كورسەتۋ بولىپ تابىلادى. سارا الپىسقىزى قازاقستاندىق قو­عامدا رۋحاني-ادامگەرشىلىك قۇندىلىقتاردى ناسيحاتتاۋدى ماقسات تۇتقان, قازاقستاننىڭ ءبىلىم بەرۋ جۇيەسىندە جۇزەگە اسىرىلىپ جاتقان, مەتاپاندىك جانە تاربيەلىك الەۋەتكە يە «ءوزىن-ءوزى تانۋ» باعدارلاماسىنىڭ ەرەكشە ءرولىن اتاپ ءوتتى. ءوز كەزەگىندە ەلىمىز­دىڭ باس مۇعالىمى الدىمەن ءۇستى­مىز­دەگى جىلى پرەزيدەنت ن.ءا.نازارباەۆتىڭ قازاقستاندا 2016-2019 جىلدارى ءبىلىم مەن عىلىمدى دامىتۋدىڭ مەم­لەكەتتىك باعدارلاماسىن قابىلداۋ تۋرالى جارلىققا قول قويعانىن, ەلىمىز ءۇشىن ماڭىزدى باعدارلامادا اتالمىش سالانىڭ الداعى ءتورت جىل ىشىندە دامۋ باعىتى مەن ءتيىستى وزگەرىستەرى ايقىن كورسەتىلگەنىن, وزگەرىستەر ءبىلىم سالاسىنىڭ بارلىق ساتىلارىن – مەكتەپكە دەيىنگى مەكەمەلەردەن باستاپ جوعارى وقۋ ورىندارىنا دەيىنگى ارالىقتى تولىق قامتيتىنىن العا تارتتى. سونداي-اق, مەملەكەتتىك باعدارلامانى جۇزەگە اسىرۋداعى ەڭ نەگىزگى قادام – ءبىلىم بەرۋ ءجۇ­­يەسىن جاڭعىرتۋ ەكەندىگىنە جەتە توقتالىپ, يننوۆاتسيالىق باعدارلامالاردىڭ مەملەكەتتىك دارەجەدە تياناقتى تۇردە كەڭىنەن ويلاستىرىلىپ, جۇزەگە اسىرىلۋى ەلىمىزدى ينتەللەكتىسى جوعارى, رۋحاني باي ۇلتقا اينالدىرۋدىڭ العىشارتى ەكەندىگى ەشبىر كۇمان تۋدىرمايتىنىن تىلگە تيەك ەتتى. «بوبەك» ۇلتتىق ورتالىعىنىڭ باس ديرەكتورى يرينا لوگينوۆا سارا الپىسقىزىنىڭ «ءوزىن-ءوزى تانۋ» رۋحاني-ادامگەرشىلىك ءبىلىم بەرۋ باعدارلاماسىنىڭ ۇلتىمىزدىڭ تىرشىلىك ءۇشىن كۇرەس جولىنداعى ماڭىزى ايرىقشا ەكەندىگىن, ادامگەرشىلىگى جوعارى, ەلىمىزدىڭ شىن مانىندەگى ازاماتىن, پاتريوتىن دايارلاۋ ماقساتىندا قۇرىلعانىن ايتا كەلىپ, ءبىلىم الۋشى جاستاردى رۋحاني-ادامگەرشىلىك تۇرعىسىنان تاربيەلەۋدىڭ بارلىق دەڭگەيلەرىنىڭ ۇزدىكسىزدىگىن جانە ساباقتاستىعىن قامتاماسىز ەتە­تىندىگىنە توقتالدى. سونداي-اق, كەڭەس وتىرىسىندا «ءوزىن-ءوزى تانۋ» رۋحاني-ادامگەرشىلىك ءبىلىم بەرۋ باعدارلاماسى ايا­سىن­داعى قاناتقاقتى ءبىلىم بەرۋ ۇيىمدارىنىڭ جەلىسىن كەڭەيتۋ, ونداعى قوسىمشا ءبىلىم بەرۋگە قاتىستى وقۋ جوسپارىنىڭ ينۆاريانتتى ءبولىمىنىڭ كولەمىن ۇلعايتۋ ءۇشىن قوسىمشا ساعاتتار ءبولۋ, «بوبەك» ورتالىعىندا ءبى­لىك­تىلىكتى ارتتىرۋدىڭ دەڭگەيلىك كۋرستارىنان وتكەن ءوزىن-ءوزى تانۋ ترەنەرلەرىنىڭ شتاتتىق بىرلىگىن ەنگىزۋ, ءوزىن-ءوزى تانۋ مۇعالىمدەرىن اتتەستاتسيالاۋ ەرەجەسىنە ءوز­گەر­تۋلەر ەنگىزۋ, ءبىلىم بەرۋ ۇيى­مىن­داعى ءاربىر ءپان مۇعالىمىنىڭ «ءوزىن-ءوزى تانۋ» باعدارلاماسى بويىنشا بىلىكتىلىكتى ارتتىرۋ كۋرستارىنان مىندەتتى تۇردە ءوتۋىن قاراستىرۋ, ءوزىن-ءوزى تانۋ يدەيا­لارىن قوعامدا ناسيحاتتاۋعا ارنالعان اقپاراتتىق الاڭداردى كەڭەيتۋ تۋرالى ماسە­لەلەر كەڭىنەن تالقىلانىپ, ءتيىستى ۇسىنىستار قابىلداندى. گۇلزەينەپ سادىرقىزى, «ەگەمەن قازاقستان» الماتى