كرەمني ءوندىرىسى ورگە باسپاق

كەشە پرەزيدەنت جانىنداعى ورتالىق كوممۋنيكاتسيالار قىزمەتىندە «قاراعاندى وبلىسىنداعى مەتاللۋرگيالىق كرەمني ءوندىرىسى جونىندەگى زاۋىتتىڭ دايىندىق جۇمىستارى جانە ىسكە قوسۋ» تاقىرىبىندا بريفينگ ءوتتى. باق وكىلدەرىمەن كەزدەسۋ بارىسىندا بىرقاتار دەرەكتەردى العا تارتقان «Tau-Ken Temir» جشس باسقارما توراعاسى مۇرات جۇكەنوۆ «تاۋ-كەن سامۇرىق» ۇتك» اق «قاراعاندى وبلىسىنداعى مەتاللۋرگيالىق كرەمني ءوندىرىسى جونىندەگى زاۋىتتىڭ دايىندىق جۇمىستارى جانە ىسكە قوسۋ» اتتى ينۆەستيتسيالىق-ستراتەگيالىق جوبانى ىسكە اسىرۋ جونىندەگى وپەراتور بولىپ تاعايىندالعانىن مالىمدەدى. ونىڭ ايتۋى بويىنشا, جوبانى جانداندىرۋ ماقساتىندا «تاۋ-كەن سامۇرىق» ۇتك اق-تىڭ 100% ەنشىلەس ۇيىمى بولىپ تابىلاتىن «Tau-Ken Temir» جشس 2014 جىلى وندىرىستىك كەشەننىڭ تەحنيكالىق جاعدايىن باعالاپ, №1 پەشتى قايتا ىسكە قوستى. بۇگىنگى تاڭدا «Tau-Ken Temir» جشس قازاقستاندا جۇمىس ىستەپ تۇرعان بىردەن-ءبىر مەتاللۋرگيالىق كرەمني ءوندىرۋشى بولىپ تابىلادى. زاۋىتتىڭ وندىرىستىك كەشەنى ارقايسىسىنىڭ تولىق قۋاتى 30 مۆا ەكى كەندى تەرميالىق پەشتەن تۇرادى, سونداي-اق, زاماناۋي قوندىرعىلارمەن جابدىقتالعان. اتالعان كاسىپورىننىڭ شيكىزات بازاسى قاراعاندى وبلىسىنىڭ ۇلىتاۋ اۋدانىنداعى جەزقازعان قالاسىنىڭ سولتۇستىك-باتىسىندا 130 شاقىرىمدا ورنالاسقان «اقتاس» كەنىشى. بۇل كەنىشتىڭ كۆارتسى جوعارى تازالىعىمەن ەرەكشەلەنەدى. ەلميرا ماتىباەۆا, «ەگەمەن قازاقستان»