ەلدىگىمىزدىڭ بەلگىسى

كەشە استاناداعى ۇلتتىق اكادەميالىق كىتاپحانادا قازاقستان رەسپۋبليكاسىنىڭ مەملەكەتتىك رامىزدەر كۇنىنە ارنالعان دوڭگەلەك ۇستەل ءوتتى. جيىندى مادەنيەت جانە سپورت مينيسترلىگى تىلدەردى دامىتۋ جانە قوعامدىق-سايا­سي جۇمىس كوميتەتى مەن ينۆەس­تيتسيالار جانە دامۋ مينيسترلىگى تەحنيكالىق رەتتەۋ جانە مەترولوگيا كوميتەتى ۇيىمداستىردى. دوڭگەلەك ۇستەلگە تىلدەردى دامىتۋ جانە قوعامدىق-ساياسي جۇمىس كوميتەتىنىڭ توراعاسى قۋانىش اسىلوۆ, تەحنيكالىق رەتتەۋ جانە مەترولوگيا كوميتەتى توراعاسىنىڭ ورىنباسارى عالىم دوعالوۆ, ەلتاڭبا اۆتورى جانداربەك مالىبەك ۇلى, «ايقىن» گازەتىنىڭ باس رەداكتورى نۇرتورە ءجۇسىپ, «نۇر وتان» پارتياسى «بىرلىك» فيليالى توراعاسىنىڭ ءبىرىنشى ورىنباسارى ءاليا قايشاروۆا, ۇكىمەتتىك ەمەس ۇيىمداردىڭ وكىلدەرى جانە باسقا دا ارنايى شاقىرىلعان قوناقتار قاتىستى. وتىرىستى اشقان قۋانىش اسىلوۆ ءبىرىنشى كەزەكتە قاتى­سۋ­شىلاردى 4 ماۋسىم – مەم­لەكەتتىك رامىزدەر كۇنىمەن قۇتتىقتادى. «ءبىز ەلىمىز ءۇشىن وتە ماڭىزدى رامىزدەر كۇنى مەرەكەسىن وسىمەن 9-شى رەت اتاپ وتكەلى وتىرمىز. مەملەكەتتىك رامىزدەر پات­ريوتتىق سەزىمنىڭ نەگىزىن قالاي­تىن اتريبۋتتار. ءرامىز­دەرىمىزدى قۇرمەتتەپ, ونى ەل ىشىنە ناسيحاتتاۋدىڭ ماڭىزى زور. حالقىمىز مەملەكەتتىك رامىزدەرىمىزدىڭ مەرەكەسىن اتاپ ءوتۋ قارساڭىندا تۇر. رامىزدەر كۇنى ەلىمىز بويىنشا ءبىر مەزەتتە ءانۇرانىمىز شىرقالادى. سونداي-اق, پاتريوتتىق تاربيە بەرۋ باعىتىنداعى ءتۇرلى ءىس-شارالار وتكىزىلەدى ءارى وسىناۋ مەرەكە بارىسىندا لايىقتى ازاماتتاردى ماراپاتتاۋ بولادى. ولارعا مەدالدار, العىس حاتتار, ماقتاۋ قاعازدارى تاپسىرىلادى», – دەدى ق.اسىلوۆ. ودان ءارى ول «100 ناقتى قادام» ۇلت جوسپارى اياسىندا پاتريوتتىق تاربيە بەرۋ ءىسى جانە مەملەكەتتىك رامىزدەرىمىزدى دارىپتەۋ جاڭاشا سيپاتتا قارقىن الىپ وتىرعانىن ءسوز ەتە كەلىپ, اۋماقتىق رامىزدەر مەن مەملەكەتتىك رامىزدەر سالاسىندا زاڭنامالاردىڭ جەتىلدىرىلگەنى جانە ونى قولدانۋ تاجىريبەسى تۋرالى ايتىپ ءوتتى. ءاليا قايشاروۆا ءوز كەزە­گىندە مەملەكەتتىك رامىزدەر ەلدى­گىمىزدىڭ بەلگىسى ەكەنىن ءسوز ەتە كەلىپ, قازاقستاننىڭ تۋى الەم­نىڭ كوپتەگەن ەلدەرىندە جەل­بىرەپ, ءانۇرانىمىز جاھاندىق اۋقىمدى شارالاردا شىرقالىپ جۇرگەنى ءاربىر وتانداسىمىزدىڭ ماقتانىش سەزىمىن وياتاتىنىن جەتكىزدى. ونىڭ ايتۋىنشا, ۇرپاق تاربيەسىندە رامىزدەرىمىزدىڭ ورنى ەرەكشە. ال شاراعا قۇرمەتتى قوناق رەتىندە شاقىرىلعان مەملە­كەتتىك ەلتاڭبا اۆتورى جانداربەك مالىبەكوۆ ەلتاڭبانىڭ جاسالۋ تاريحى تۋرالى اڭگىمەلەي كەلىپ, وعان الداعى ۋاقىتتا ەنگىزىلۋى ىقتيمال وزگەرىستەر, ستاندارتتاۋ قاعيدالارىنىڭ جاڭاشىلدىقتارى تۋرالى ايتىپ بەردى. ونىڭ ايتۋىنشا, الداعى ۋاقىتتا ەلتاڭبا التىن تۇستەس بولۋى مۇمكىن. سونداي-اق, ەلتاڭباداعى 40-تان استام بەلگىلەرگە ناقتى اتاۋلارىن كورسەتۋ كوزدەلۋدە. بۇدان كەيىن ءسوز العان عا­لىم دوعالوۆ ءوز كەزەگىندە مەملە­كەتتىك رامىزدەردىڭ ماڭىز­دى­لىعىن, ونىڭ ەل ومىرىندەگى ايرىقشا ورنىن ءسوز ەتە كەلىپ, ونى ستاندارتتاۋ تۇرعىسىنداعى ماسەلەلەرگە نازار اۋداردى. جيىن بارىسىندا قاتى­سۋ­شىلار ءوزارا پىكىر الىسىپ, وزدەرىنىڭ ويلارىندا ءجۇر­گەن سۇراقتارىن قويدى. ءوز كەزەك­تەرىندە اتالعان كوميتەت وكىلدەرى قويىلعان ساۋالدارعا ناقتى جاۋاپ بەردى. ايتا كەتەيىك, مەملەكەتتىك رامىزدەرىمىز ەلىمىزدىڭ جاڭا تاريحىمەن تىعىز بايلانىستى. رامىزدەر كۇنىنىڭ نەگىزگى يدەياسى قازاقستاندىق پاتريوتيزم مەن ۇلت بىرلىگىن, حالقىمىزدىڭ بىرلىگى مەن جەتىستىكتەرىن نى­عايتا ءتۇسۋ بولىپ تابىلادى. جولدىباي بازار, «ەگەمەن قازاقستان»