قايىرىمدىلىق شاراسىنىڭ شاپاعاتى

كەشە ۇلتتىق مۇراجاي ۇجىمىنىڭ ۇيىمداستىرۋىمەن بالالاردى قورعاۋدىڭ حالىقارالىق كۇنىنە وراي «PERSONA plus» ارت-ورتالىعىنىڭ «اشىق الاقان» قايىرىمدىلىق كورمەسى اشىلدى. «كورمەگە ارت-ورتالىق ستۋ­دەنتتەرىنىڭ ەڭ ۇزدىك كوركەم تۋىندىلارى قويىلىپ, ولاردى مۇراجايعا كەلۋشىلەردىڭ ساتىپ الۋىنا مۇمكىندىك بەرىلدى. بارلىق تۇسكەن قارجى «بالام-اي» قق مۇمكىندىگى شەكتەۋلى بالالار مەن جاستاردى الەۋمەتتىك قولداۋ ورتالىعىنا جىبەرىلەدى. جاس سۋرەتشىلەردىڭ شىعارماشىلىعى كومەككە مۇقتاج بالالارعا مەيىرىم مەن قامقورلىق جاساۋعا باعىتتالعان», دەيدى شاراپاتتى شارانى ۇيىمداستىرۋشىلار. «PERSONA plus» ارت-ورتالىعى 2008 جىلى تامىز ايىندا استانا قالاسىندا ونەردىڭ داڭعىل جولىنا ءتۇسىپ, شىعارماشىلىق مۇمكىندىكتەرىن ءارى قاراي دامىتۋدى كوزدەيتىن سۋرەتشىلەردى ءوز ستۋدياسىنا بىرىكتىرۋ ماقساتىمەن اشىلعان. ورتالىقتاعى ۇيرەتۋ باعدارلاماسى اكادەميالىق بەينەلەۋ ونەرى مەكتەبىنىڭ جانە وقىتۋشىلاردىڭ اۆتورلىق جوسپارلارىنىڭ نەگىزىندە قۇرىلعان. سونىمەن قاتار, «PERSONA plus» بالالار شىعارماشىلىعىن دارىپتەۋگە باعىتتالعان جوبالارعا قاتىسىپ, ءارتۇرلى كورمەلەر ۇيىمداستىرادى. بەينەلەۋ جانە ساندىك قولدانبالى ونەر, ديزاين بويىنشا شەبەرلىك-سىنىپتارىن وتكىزەدى. ارت-ورتالىقتىڭ ستۋدەنتتەرى «بالالار بەيبىتشىلىكتى سالادى» (قازاقستان, 2009, 2010), «ءوز جەرىڭدە» (مينسك, 2012), «كوستا براۆا سۇلۋلىعى» (يسپانيا, 2010), «بۇل – مەنىڭ ءومىرىم» (جاپونيا, 2011), «پلانەتا بالالارى دوس» (بەلارۋس, 2013), «بالالار بەيبىتشىلىكتى سالادى» (ورتالىق ازيا, 2013-2014), «نەۆا بوياۋلارى» (سانكت-پەتەربۋرگ, 2015) سەكىلدى بالالار شىعارماشىلىعىنىڭ حالىقارالىق جانە رەسپۋبليكالىق بايقاۋلارىنا قاتىسىپ, ەلىمىزدىڭ ابىرويىن اسىرىپ جۇرگەنىن ماقتانىشپەن ايتۋعا بولادى. قايىرىمدى قوعامدى قالىپ­تاستىرۋدا مۇنداي شارالاردىڭ ماڭىزى زور. سوندىقتان دا, جۇرت بولىپ جۇمىلىپ, ءبىر ادامداي بىرىگىپ, قايىرىمدىلىق شاراسىنان قالىس قالماي, ءاربىر ادام ءوز ۇلەسىن قوسسا, ارقاداعى جۇكتىڭ اۋىرلىعى سەزىلمەيتىنى ءسوزسىز. كورمەنىڭ اشىلۋ سالتاناتىندا وسىنداي يگى باستامانى جۇزەگە اسىرۋعا قولۇشىن بەرگەن اتا-انالار مەن دەمەۋشىلەرگە مۇراجاي اتىنان العىس حاتتار تابىس ەتىلدى. راۋان قايدار, «ەگەمەن قازاقستان»