قاراعاندىدا بالالار اۋەجايعا ساياحات جاسادى

قاراعاندى. 1 ماۋسىم. «سارىارقا» حالىقارالىق اۋەجايى قاراعاندىداعى بالالار ءۇيىنىڭ تاربيەلەنۋشىلەرىنە ارقا توسىندەگى اۋە ايلاعىنا ساياحات ۇيىمداستىردى. بالالاردى قورعاۋ كۇنى قارساڭىندا بۇل وسكەلەڭ ۇرپاق ءۇشىن تاماشا تارتۋ بولدى. بۇل تۋرالى egemen.kz ءتىلشىسى حابارلادى. قاراعاندى اۋەجايى كۇن سايىن ادەتتە ون شاقتى ۇشاق ۇشىرىپ, سونشاسىن قابىلداپ الادى. بىراق جاز ايلارىندا ولاردىڭ سانى ارتا تۇسەدى. بالالارعا جولاۋشىلار ۇشاققا وتىرعانعا دەيىن جۇرگىزىلەتىن بارلىق شارالار تانىستىرىلىپ, ولار ۇشۋ الاڭىندا تۇرعان تۋ-154 ۇشاعىنا دەيىن ساياحاتتادى. وسى جەردە بالالاردىڭ ءبىرازى وسكەندە ۇشقىش, الدە ستيۋاردەسسا بولۋ تۋرالى ارماندارىن ايتىپ قالدى. قاراعاندى اۋەجايىنىڭ جۇمىسىن كۇن سايىن جيىرمادان استام قىزمەت تۇرلەرى قامتاماسىز ەتەدى. بالالار ۇشاقتار مەن ارنايى تەحنيكالار جوندەلەتىن انگارلاردى دا ءوز كوزىمەن كورىپ, جۇمىس بارىسىمەن تانىستى. «سارىارقا» اۋەجايى حالىقارالىق اۋەجاي مارتەبەسىنە سوناۋ 1992 جىلى يە بولعان. قازىر بۇل جوعارى تەحنيكالىق مۇمكىندىكتەرگە يە زاماناۋي كەشەن. ساياحات سوڭىندا اۋەجاي ۇجىمى بالالارعا ەستەلىك سىيلىقتار سىيلادى. قايرات ءابىلدينوۆ. دەرەك: egemen.kz. فوتو: autotourist.kz.