ۇلت جوسپارى مىندەتتەرىن تالقىلاعان وتىرىس

الماتى قالاسىندا پارلامەنت ءماجىلىسىنىڭ زاڭناما جانە سوت-قۇقىقتىق رەفورما كوميتەتى مۇشەلەرىنىڭ قاتىسۋىمەن «100 ناقتى قادام» ۇلت جوسپارىنىڭ 27-قادامىنىڭ شەڭبەرىندە «جەكە سوت ورىنداۋشىلىق ينستيتۋتى جانە ونى دامىتۋ» تاقىرىبىندا كوشپەلى وتىرىس بولىپ ءوتتى. وتىرىستا جەكە سوت ورىنداۋشىلار ينستيتۋتىن جەتىلدىرۋ ماسەلەسى تالقىلانىپ, بۇگىنگى تاڭدا سوت ورىنداۋشىلار قىزمەتى اياسىندا كەز­دەسەتىن ءتۇرلى ماسەلەلەر قوزعالدى. ەكى ءبو­لىمنەن تۇراتىن دوڭگەلەك ۇستەل وتىرىسىنا پارلامەنت دەپۋتاتتارىمەن قاتار, «نۇر وتان» پارتياسى جانىنداعى قۇقىقتىق كەڭەس مۇشەلەرى, ادىلەت, قۇقىق قورعاۋ ورگاندارىنىڭ وكىلدەرى, جەكە سوت ورىن­­داۋشىلاردىڭ رەسپۋبليكالىق پالاتاسىنىڭ جا­ۋاپتى ادامدارى مەن ساراپشى ماماندار قا­تىستى. كوشپەلى وتىرىستى اشقان پارلامەنت ءماجى­لىسىنىڭ زاڭناما جانە سوت-قۇقىقتىق رەفورما كوميتەتىنىڭ توراعاسى, «نۇر وتان» پارتياسى جا­نىنداعى قۇقىقتىق كەڭەستىڭ توراعاسى نۇرلان ءابدىروۆ مەملەكەت باسشىسى نۇرسۇلتان نازارباەۆ مىندەتتەگەن «100 ناقتى قادام» ۇلت جوسپارىنىڭ 27-قادامىندا قامتىلعان جەكە سوت ورىنداۋشىلار ينستيتۋتىنىڭ قىزمەت ەتۋ اياسىندا اتقارىلار شارالار مەن وزەكتى ماسەلەلەردى وڭتايلاندىرۋ, ەلىمىزدەگى جەكە سوت ورىنداۋشى­لار قىزمەتىن جەتىلدىرۋ ىسىندە ەس­كەرىلۋى ءتيىس ماڭىزدى تۇستارعا ەرەكشە نازار اۋدارۋ قاجەتتىگىنە توقتالىپ ءوتتى. العاشقى بايانداما جاساۋ مارتەبەسىنە يە بولعان قازاقستان رەسپۋبليكاسى ادىلەت ءمينيسترىنىڭ ورىنباسارى جانات ەشماعانبەتوۆ جەكە سوت ورىنداۋشىلىق نەگىزدەرى تاقىرىبىن تەرەڭ قاۋزاپ, قۇقىقتىق قىزمەتتىڭ بۇل سالاسىندا كەزدەسەتىن ماڭىزدى ماسەلەلەر بارىسىن ءسوز ەتتى. بۇدان وزگە, كوشپەلى وتىرىستىڭ باس­قوسۋ جيىنىنا ارنايى قاتىسقان جەكە سوت ورىنداۋشىلاردىڭ رەسپۋبليكالىق پالاتاسىنىڭ توراعاسى سەرگەي لي, پارلامەنت ءماجىلىسى زاڭناما جانە سوت-قۇقىقتىق رەفورما كوميتەتىنىڭ دەپۋتاتتارى بەرىك دۇيسەنبينوۆ, مۇحتار تىنىكەەۆ, قانات مۋسين, بالايىم كەسەباەۆا, ماگەررام ماگەرراموۆ, نارينە ميكاەليان, سنەجانا يماشەۆا, سۆەتلانا بىچكوۆا ەلىمىزدەگى زاڭ اياسىندا وسى ۋاقىت ارالىعىندا جەكە سوت ورىنداۋشىلاردىڭ اتقارعان ەڭبەكتەرى مەن ونىڭ ەل دامۋىنا قوسقان ۇلەسىن, شيرەك عاسىر اۋقىمىندا سوت ورىنداۋشىلىق قىزمەتتىڭ قول جەتكىزگەن جەتىستىكتەرى مەن كەلەشەك دامۋ ۇدەرىسى جونىندە ءوز وي-پىكىرلەرى مەن ۇستانىمدارىن كوپشىلىك تالقىسىنا سالدى. شاراعا قاتىسقان قالالىق پروكۋراتۋرا, سوت جانە ىشكى ىستەر ورگاندارى قىزمەتىنىڭ وكىل­دەرى, قارجىگەرلەر قاۋىمداستىعى مەن الماتى قالالىق ادىلەت باسقارماسى, الماتى جانە استانا قالالارى مەن بارلىق وبلىستاردىڭ وڭىرلىك جەكە سوت ورىنداۋشىلارى, الماتى وبلىستىق ادىلەت باسقارمالارىنىڭ جەتەكشىلەرى دوڭگەلەك ۇستەل قوناقتارى مەن قاتىسۋشىلارىنا ءوز ساۋالدارىن جولداپ, تاقىرىپتىق پىكىر الماسۋ شەڭبەرىندە وتكەن كوشپەلى وتىرىس جۇمىسى جەمىستى بولدى. قانات ەسكەندىر, «ەگەمەن قازاقستان» الماتى