شاتتىق سىيلاعان شارا

قازاقستان رەسپۋبليكاسى تۇڭعىش پرەزيدەنتى – ەلباسى قورى حالىقارالىق بالالاردى قورعاۋ كۇنى قارساڭىندا اقمولا وبلىسى جانە استانا قالاسى بالالار ءۇيىنىڭ تاربيەلەنۋشىلەرىنە جانە مۇمكىندىگى شەكتەۋلى بالالارعا ارنالعان مەرەكەلىك كونتسەرت وتكىزدى. «نازارباەۆ ورتالىعى» عيما­راتىنىڭ اۋماعىندا «شەبەرلەر قا­لاسى» ورنالاسىپ, وندا بۇلدىرشىندەر حالىق شىعارماشىلىعىمەن كەڭىنەن تانىستى جانە ءبىر ۋاقىت وزدەرىن قىش-قۇمىرا شەبەرى, مايدا مونشاق­پەن كەستە تىگۋشى, سونداي-اق باسقا دا كوپتەگەن قولونەر مامانى بولىپ سەزىنۋگە مۇمكىندىك الدى. مەرەكەلىك شارانىڭ مەيمانى بولىپ كەلگەن جاس قوناقتارعا استانالىق بي ۇجىمدارى, انشىلەر قاۋىمى ءوز ونەرلەرىن كور­سەتىپ, كوتەرىڭكى كوڭىل كۇي سىيلادى. سونىمەن قاتار, ءارتۇرلى سۇراقتار قويىلىپ, قىزىقتى ويىندار ويناتىلدى. «جىلدار جىلجىپ, ايلار اۋىس­قان سايىن ادامداردىڭ سانى دا, ساناسى دا بىرگە ءوسىپ-جەتىلەدى. كە­شە عانا تۇساۋىن كەسكەن ءسابيدىڭ ەرجەتىپ, ۇلكەن ازامات بولىپ ءجۇر­گەنىن كورەمىز. بۇل ۋاقىتتىڭ ءبىر ورىندا تۇرمايتىندىعىن ءبىل­دىرسە كەرەك. دەگەنمەن, ادام بالاسى قانشا جاسقا كەلسە دە, ونىڭ بالالىق شاعى بارىنەن ىستىق بولىپ تۇرادى. قايتا ورالعىسى كەلەدى, بۇرىنعىداي ەش نارسەگە الاڭداماي, اسىر سالىپ ويناعىسى كەلەدى. بىراق, ۋاقىتتىڭ ارناسى كەرى بۇرىلعان ەمەس, بۇرىلمايدى دا. ءبىزدىڭ بۇگىنگى شارانى وتكىزۋدەگى باستى ماقساتىمىز – بالالاردىڭ بالالىق شاعى وسىنداي قىزىقتى كۇندەرمەن, ساۋلەلى ساتتەرمەن ساناسىندا قالعانىن قالايمىز. ولاردىڭ جانارىنا جابىسقان مۇڭنىڭ ورنىن قۋانىشپەن تولتىرساق دەيمىز. سوندىقتان دا بۇگىنگى شاراعا جان-جاق­تى دايىندالدىق»,– دەيدى قور­دىڭ اتقارۋشى ديرەكتورى ساعىندىق تاۋپىق ۇلى. ءيا, كەز كەلگەن ءسابي باقىتتى بولۋ ءۇشىن جارالعان دەيمىز. ال ولاردىڭ باقىتتى بولاشاعىن قوعامنىڭ ءوزى تۇرعىزارىن ەستەن شىعارماۋىمىز كەرەك. ەل ىشىندەگى وسىنداي يگى شارالار ارقىلى بالالارعا باقىت سىيلاي الساق, ولار دا وزدەرىن قوعامنىڭ ءبىر مۇشەسى ەكەنىن سەزىنەدى. تىرەگى مەن قامقورشىسى بارىن ۇعىنادى. سونداي-اق, كەش اياسىندا ءبۇل­دىر­­شىندەرگە ارنالعان «تاتتىلەر فەستيۆالى» وتكىزىلدى. وندا بالالار مۋلتيپليكاتسيالىق كەيىپكەرلەر كەيپىندەگى ءتۇرلى تاتتىلەردىڭ ءدامىن تاتتى. شارا سوڭىندا ۇيىم­داس­تى­رۋشىلار قوناق بولىپ كەلگەن بالالارعا قوردىڭ اتىنان ارنايى سىي­لىقتار تابىس ەتىپ, ولاردىڭ بولاشاق ومىرلەرىندە قۋانىش­تى كۇندەردىڭ كوپ بولۋىن تىلەدى. راۋان قايدار, «ەگەمەن قازاقستان»