گايتيدە تىرىسقاق ىندەتىنەن 175 ادام قايتىس بولدى

استانا. 30 مامىر. گايتيدە تىرىسقاق ىندەتى ءورشىپ تۇر. وسى جىلدىڭ باسىنان بەرى بۇل اۋرۋدان 175 ادام قايتىس بولدى. بۇل تۋرالى 24.kz-كە سىلتەمە جاساعان egemen.kz ءتىلشىسى حابارلادى. ەلدە قاۋىپتىلىكتىڭ ەڭ جوعارعى – قىزىل دەڭگەيى جاريالاندى. مالىمەتتەر بويىنشا, ىندەتتىڭ ورشۋىنە 2010 جىلدىڭ 12 قاڭتارىندا بولعان جويقىن جەر سىلكىنىسى سەبەپ بولىپ وتىر. تابيعات اپاتىنان ول كەزدە 220 مىڭنان استام ادام قازا تاپقان. ءزىلزالانىڭ سالدارىنان بۇگىنگە دەيىن مىڭداعان ادام انتيسانيتاريالىق جاعدايدا ءومىر ءسۇرىپ كەلەدى. سونىمەن قاتار, اۋىز سۋدىڭ تاپشىلىعى دا كەرى اسەرىن تيگىزىپ وتىر. بۇگىنگى تاڭدا تىرىسقاق اۋرۋىن 16 مىڭنان استام ادام جۇقتىرعان. «بىزگە كۇن سايىن 20-عا جۋىق ناۋقاس كەلەدى. بار-جوعى ەكى-ءۇش كۇننىڭ ىشىندە جازىلىپ كەتەتىندەر بار. ال كەيبىرى ءتىپتى, اۋرۋحانادا اپتالاپ جاتادى», – دەدى بۋرجينون ۋيلبەرگ ەسىمدى دارىگەر. وسىعان بايلانىستى, تىرىسقاق اۋرۋى ءورشىپ تۇرعان اۋدانداردا زالالسىزداندىرۋ شارالارى ءجۇرىپ جاتىر. قازىرگى تاڭدا تۇرعىندارعا ادام دەنەسىندەگى سۋ مولشەرىن ساقتاۋ ءۇشىن ارنايى ءدارى-دارمەك تاراتىلىپ جاتىر. سونىمەن قاتار, ءتۇسىندىرۋ, ساقتاندىرۋ جۇمىستارى ۇدايى جۇرگىزىلەدى. ايان ءابدۋالي. دەرەك, فوتو: 24.kz.