يراكتا تگيل سودىرلارىنىڭ قۇپيا جەراستى جولى تابىلدى

استانا. 30 مامىر. يراكتىڭ ال-فاللۋدجا قالاسىنا تاياۋ جەردەن ۇكىمەت اسكەرى لاڭكەستەردىڭ بىرنەشە قۇپيا جەراستى جولىن تاپتى. بۇل تۋرالى 24.kz-كە سىلتەمە جاساعان egemen.kz ءتىلشىسى حابارلادى. مالىمەتتەر بويىنشا, قاقتىعىس كەزىندە جەڭىلە باستاعان سودىرلار ءدال وسى جەرلەرگە جاسىرىنعان. ال ەڭ ۇزىن جەراستى جول كىرپىش زاۋىتىنىڭ ماڭايىنان قازىلعان. سونىمەن قاتار, وسىدان بىرنەشە كۇن بۇرىن ۇكىمەت اسكەرى تگيل لاڭكەستىك ۇيىمىنىڭ 80 مۇشەسىنىڭ كوزىن جويعان. اتالعان تەررورلىق توپ ال-فاللۋدجا قالاسىن 2014 جىلى باسىپ العان. وسىعان بايلانىستى قازىرگى تاڭدا قالانى ازات ەتۋ ءۇشىن ارنايى وپەراتسيا جۇمىستارى ءجۇرىپ جاتىر. اسكەريلەردىڭ بىرنەشە شابۋىلىنان كەيىن ءبىراز ادام قالادان شىعىپ ۇلگەرگەن. الايدا, مالىمەتتەر بويىنشا, ءالى 50 مىڭعا جۋىق ادام ال-فاللۋدجادان كەتە الماي وتىر. ايتا كەتەيىك, وتكەن جىلى بىرىككەن ۇلتتار ۇيىمى يراكتا ءبىر جىلدىڭ ىشىندە 15 مىڭعا جۋىق بەيبىت تۇرعىن سودىرلاردىڭ قولىنان قازا تاپقانىن مالىمدەدى. ايان ءابدۋالي. دەرەك, فوتو: 24.kz