اقش-تا تولاسسىز جاۋىننىڭ سوڭى سۋ تاسقىنىنا ۇلاستى

استانا. 29 مامىر. اقش-تىڭ تەحاس شتاتىندا تولاسسىز جاۋعان جاڭبىردىڭ سوڭى سۋ تاسقىنىنا ۇلاستى. بۇل تۋرالى 24.kz-كە سىلتەمە جاساعان egemen.kz ءتىلشىسى حابارلادى. توسىن تابيعات اپاتىنان 2 ادام قازا تاپقان, سونداي-اق 3 تۇرعىن ءىز-ءتۇزسىز جوعالىپ كەتكەنى بەلگىلى بولدى. قازىر اپاتتى ايماقتا ارنايى توپ قۇرىلىپ, قۇتقارۋ جۇمىستارىن جۇرگىزىپ جاتىر. ال زارداپ شەككەندەر قاۋىپسىز جەرلەرگە كوشىرىلدى. اتالعان شتاتتىڭ تۇرعىندارىنا تەك سۋ تاسقىنى عانا ەمەس, جويقىن تورنادو دا زيانىن تيگىزۋدە. وسىنىڭ سالدارىنان 150 ءۇي قيراپ قالعان. قازىرگى تاڭدا باسپاناسىز قالعاندار ۋاقىتشا ۇيلەرگە ورنالاستىرىلدى, ال جاراقات العاندار اۋرۋحانالارعا جەتكىزىلدى. ايتا كەتەيىك, اقش-تا توسىن تابيعات اپاتى ءجيى بولىپ تۇرادى. مالىمەتتەر بويىنشا, 2015 جىلدىڭ 10 ساۋىرىندە سوڭعى 20 جىلدا بولماعان تورنادو سوعىپ, تەحاس, لۋيزيانا, اركانزاس, ميسسيسيپي, تەننەسسي, ميسسۋري, كەنتۋككي, ينديانا شتاتتارىندا ونداعان ءۇي قيراپ, بىرنەشە تۇرعىن ءتۇرلى دەڭگەيدە جاراقات العان. ايان ءابدۋالي. دەرەك, فوتو: 24.kz.