تالدىقورعاندا قاراقشىلىق جاساپ جۇرگەن ەكەۋ قولعا ءتۇستى

تالدىقورعان. 29 مامىر. الماتى وبلىسىنىڭ ورتالىعىندا ماگازيندەرگە دۇركىن-دۇركىن قاراقشىلىق شابۋىل جاساپ جۇرگەن دەگەن كۇدىكپەن ەكى ەر كىسى ۇستالدى. بۇل تۋرالى وبلىستىق ىشكى ىستەر دەپارتامەنتى ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى. 2016 جىلدىڭ قاڭتارىنان ءساۋىر ايىنا دەيىن تالدىقورعاندا بىرنەشە دۇكەنگە قاراقشىلىق شابۋىلدار جاسالىپ, ولاردىڭ ەگەلەرى پوليتسياعا رەسمي شاعىممەن كەلدى. ال تەكسەرۋ قورىتىندىسىندا جاسالعان قىلمىستاردىڭ ءبىر قولدان شىققانى بەلگىلى بولدى. «ءزابىر كورۋشىلەردىڭ سۋرەتتەۋلەرى بويىنشا, قاراقشىلىق جاساۋشىلاردىڭ سىرتقى كەسكىن-كەلبەتتەرى مەن ارەكەت ەتۋ تاسىلدەرى ءبىر-بىرلەرىنە ۇقساس بولىپ شىقتى. قىلمىسكەرلەردىڭ بىرەۋى ەسىكتى تارتىپ جاۋىپ تۇرسا, ەكىنشىسى بەتىن بەتپەردەمەن جاۋىپ كەلىپ, كاسسادان اقشا تالاپ ەتەتىن بولعان», - دەدى پوليتسياداعىلار. جەدەل-ىزدەستىرۋ قىزمەتكەرلەرى كوپ ۇزاماي وسى قىلمىستاردى جاسادى دەگەن كۇدىكپەن كورشى ەسكەلدى اۋدانىنىڭ 1994, 1995 جىلدارى تۋعان ەكى اۋىل تۇرعىنىن قولعا ءتۇسىردى. «قازىرگى تاڭدا ۇستالعانداردىڭ التى قاراقشىلىق شابۋىلعا قاتىستارى بار ەكەندەرى دالەلدەندى. قالالىق ىشكى ىستەر باسقارماسىنىڭ وندىرىسىندەگى فاكتىلەر بويىنشا تەرگەۋ جۇرگىزۋ جالعاسىپ جاتىر», - دەپ اتاپ ءوتتى وبلىستىق ىشكى ىستەر دەپارتامەنتىندەگىلەر. نۇربول الدىباەۆ. دەرەك: الماتى وبلىستىق ىشكى ىستەر دەپارتامەنتىنىڭ ءباسپاسوز قىزمەتى.