استانا. 22 مامىر. كەشە فۋتبولدان قازاقستان پرەمەر-ليگاسىنىڭ 12-تۋرى ويىندارى وينالدى. وسىلايشا, ەل چەمپيوناتىنىڭ ءبىرىنشى اينالىمى اياقتالدى. بۇل تۋرالى egemen.kz ءتىلشىسى حابارلادى.
تۋر بارىسىندا كوش باسىنداعى «استانا» ءوز الاڭىندا شىمكەنتتىڭ «ورداباسىن» 3:1 ەسەبىمەن جەڭىپ, تۋرنير كەستەسىندەگى ءبىرىنشى ورنىن ساقتاپ قالدى. ال ەلوردالىقتارمەن ۇزەڭگى قاعىستىرىپ كەلە جاتقان پاۆلوداردىڭ «ەرتىسى» ءوز الاڭىندا ليگا اۋتسايدەرلەرىنىڭ ءبىرى ورالدىڭ «اقجايىعىمەن» تەڭ ءتۇسىپ, ۇپاي جوعالتتى.
جالپى, بۇل تۋردا جانكۇيەرلەر ەرەكشە نازار اۋدارعان كەزدەسۋ الماتىدا ءوتتى. اتاپ ايتقاندا, جەرگىلىكتى «قايرات» كوكشەتاۋدىڭ «وقجەتپەسىمەن» سىنعا ءتۇسىپ, قارسىلاستارىنىڭ قاقپاسىنا جاۋاپسىز 6 گول سوقتى. ويىننىڭ 28-مينۋتىندا «قايرات» ساپىنداعى رەسەيلىك لەگيونەر اندرەي ارشاۆين ەسەپ اشىپ, كومانداسىن العا شىعاردى. بۇل ەسەپ ۇزىلىسكە دەيىن وزگەرگەن جوق.
ال ەكىنشى تايمدا الماتىلىقتار «وقجەتپەس» قورعانىسىنىڭ تاس-تالقانىن شىعاردى. الدىمەن 52-مينۋتتا ارشاۆين ءدۋبلدىڭ اۆتورى اتانسا, ويىن سوڭىنا دەيىن كوماندا كاپيتانى باۋىرجان يسلامحان مەن «قايراتتىڭ» ۇزدىك شابۋىلشىسى جەرار گوۋ دا ەكى رەتتەن مەرگەندىكتەرىمەن كوزگە ءتۇستى. ناتيجەسىندە ماۋسىمدى سۇرەڭسىز باستاپ, كوش سوڭىندا كەلە جاتقان «قايرات» ماڭىزدى جەڭىسكە قول جەتكىزىپ, تۋرنير كەستەسىندە ۇزدىك ۇشتىكتىڭ قاتارىنا قوسىلدى.
ايتا كەتەيىك, الماتىلىقتاردىڭ بۇل جەڭىسى ازىرگە وسى ماۋسىمداعى ەڭ ءىرى جەڭىس رەتىندە تىركەلدى. وسىلايشا, پرەمەر-ليگانىڭ ءبىرىنشى اينالىمى مارەسىنە جەتتى. ەندى كوماندالار 29 مامىردا ەكىنشى اينالىمدى باستايدى.
12-تۋر ويىندارىنىڭ ناتيجەلەرى:
«استانا» (استانا) – «ورداباسى» (شىمكەنت) 3:1
گولدار: مارين انيچيچ 7, روحەر كانياس 21, تاڭات نوسەرباەۆ 72 – الەكساندر سيمچەۆيچ 10.
«توبىل» (قوستاناي) – «اتىراۋ» (اتىراۋ) 1:2
گولدار: نۇربول جۇماسقاليەۆ 69 – الەكساندر دامچەۆسكي 9, الەكساندر ماكاس 83.
«جەتىسۋ» (تالدىقورعان) – «شاحتەر» (قاراعاندى) 2:0
گولدار: دۋشان ساۆيچ 57, يليا كالينين 64.
«ەرتىس» (پاۆلودار) – «اقجايىق» (ورال) 0:0
«قايرات» (الماتى) – «وقجەتپەس» (كوكشەتاۋ) 6:0
گولدار: اندرەي ارشاۆين 28, 52, باۋىرجان يسلامحان 54, 68 (پەنالتي), جەرار گوۋ 82, 85.
«اقتوبە» (اقتوبە) – «تاراز» (تاراز) 2:2
گولدار: سامات سماقوۆ 44 (پەنالتي), ديدار جالمۇقان 45 – ۆيتالي ەۆستيگنەەۆ 38, ماليك مانە 50.
12-تۋر ويىندارىنىڭ قورىتىندىسى بويىنشا تۋرنير كەستەسى
ۇزدىك مەرگەندەر:
- رومان مۇرتازاەۆ («ەرتىس») – 7 گول;
- جەرار گوۋ («قايرات») – 6 گول
- دۋشان ساۆيچ («جەتىسۋ») – 5 گول;
- سامات سماقوۆ («اقتوبە») – 5 گول.
13-تۋر ويىندارى 29 مامىر كۇنى وينالادى. اتالعان تۋرداعى قارسىلاستار رەتى تومەندەگىدەي:
«اقتوبە» – «استانا»
«اتىراۋ» – «ەرتىس»
«قايرات» – «اقجايىق»
«وقجەتپەس» – «تاراز»
«ورداباسى» – «جەتىسۋ»
«شاحتەر» – «توبىل».
ەلامان قوڭىر.
دەرەك: egemen.kz.
فوتو: vk.com.
