رەسەي 2017 جىلدان پلاستيك ىدىسپەن سىرا ساتۋدى توقتاتادى

استانا. 22 مامىر. رەسەي فەدەراتسياسى ۇكىمەتىنە الكوگول اينالىمىن مەملەكەتتىك رەتتەۋ تۋرالى زاڭعا پوليمەر ماتەريالداردان جاسالعان تۇتىنۋ زاتتارى مەن قۇتىلارىن ءوندىرۋ جانە ولاردى بولشەك ساۋداعا شىعارۋعا كەزەڭ-كەزەڭىمەن تىيىم سالۋدى كوزدەيتىن وزگەرىستەر ەنگىزۋ ۇسىنىلدى. بۇل تۋرالى ريا «نوۆوستي» اقپارىنا سۇيەنگەن egemen.kz ءتىلشىسى حابارلادى. وسىعان بايلانىستى جاسالعان ۇسىنىستار مينيسترلەر كەڭەسىنىڭ سايتىندا جاريالاندى. رف قارجى مينيسترلىگى تالداپ جاساعان بۇل قۇجات 2017 جىلدىڭ 1 قاڭتارىنان باستاپ پلاستيكالىق ىدىستاردى وندىرۋگە جانە ولاردى الكوگولدى ىشىمدىكتەردىڭ ىدىسى رەتىندە پايدالانۋعا تىيىم سالۋعا الىپ بارادى. وندا «تولىق پوليەتيلەننەن, پوليسترولدان, پوليەتيلەنتەرەفتالات پەن باسقا دا پوليمەرلىك زاتتاردان جاسالعان, كولەمى 1,5 ليتردەن اسپايتىن تۇتىنۋ ىدىستارىمەن نەمەسە قۇتىسىمەن» الكوگولدى ونىمدەردى شىعارۋعا جانە (نەمەسە) اينالىمعا جىبەرۋگە (بولشەك ساۋدانىڭ بۇعان قاتىسى جوق) تىيىم سالۋ قاراستىرىلعان. ال كولەمى 1,5 ليتردەن اسپايتىن وسىنداي ىدىستارمەن بولشەك ساۋدادا سىرا ساتۋ 2017 جىلدىڭ 1 شىلدەسىنەن باستاپ توقتاتىلادى. تالعات رايىمبەك. دەرەك: ريا «نوۆوستي».