جوعالعان بوبەكتىڭ ءمايىتى نۇرا وزەنىنىڭ ارناسىنان تابىلدى

كوكشەتاۋ. 21 مامىر. اقمولا وبلىسىندا بۇدان 11 كۇن بۇرىن اياق استىنان جوعالىپ كەتكەن 2 جاسار ەللينا كۋلدينانىڭ ءولى دەنەسى تابىلدى. بۇل تۋرالى وبلىستىق توتەنشە جاعدايلار دەپارتامەنتى ءباسپاسوز قىزمەتىنىڭ دەرەگىنە سۇيەنگەن egemen.kz ءتىلشىسى حابارلادى. دەپارتامەنتتىڭ كەزەكشىلىك ءبولىمىنىڭ مالىمەتىنە سايكەس, ءبۇلدىرشىن قىزدىڭ ءمايىتى بۇگىن كەشكى ساعات 20:55 شاماسىندا نۇرا وزەنىنىڭ ارناسىنان تابىلعان. ەسكە سالا كەتەيىك, بوبەكتىڭ ءۇشتى-كۇيلى جوعالىپ كەتۋ وقيعاسى بيىلعى 10 مامىر كۇنى وبلىستىڭ تسەلينوگراد اۋدانىنا قاراستى ر.قوشقارباەۆ اتىنداعى اۋىلىنىڭ ماڭىندا نۇرا وزەنىنىڭ جاعاسىندا ورىن العان بولاتىن. وسى جەرگە تازا اۋا اياسىندا دەمالۋعا كەلگەن ءۇش كىسىدەن تۇراتىن استانالىق وتباسى مۇشەلەرى, ياعني اكەسى مەن شەشەسى ورتالارىنداعى جالعىز بالا - 2 جاستاعى قىزدارىنان قاپەلىمدە كوز جازىپ قالعان. كەيىن اتا-انانىڭ ءوز بەتتەرىنشە جۇرگەن كەزدەرىندە ءبۇلدىرشىننىڭ وزەن جاعاسىنا قاراي كەتىپ قالعانى بەلگىلى بولدى. سۋ جاعاسىنان ونىڭ ويىنشىعى تابىلدى. وزەننىڭ وسى تۇستاعى جارىنىڭ بيىكتىگى 6 مەتر بولادى ەكەن. وسىدان كەيىن بالانى جاپپاي ىزدەستىرۋ باستالدى. وعان قىزدىڭ اتا-اناسى, تۋعان-تۋىستارى, پوليتسەيلەر مەن قۇتقارۋشىلار جانە ەرىكتىلەر قاتىستىرىلدى. ىزدەستىرۋ جۇمىستارىنىڭ بارىسىندا پوليتسەيلەردىڭ قىزدىڭ ىزىنە تۇسكەن ءيىسشىل قىزمەتتىك يتتەرى وزەننىڭ جاعاسىنا الىپ كەلدى. ىزدەستىرۋ جۇمىستارى بارىسىندا ۆولونتەرلەر ءتىپتى بەلگىسىز بىرەۋدىڭ بەيىتىن قازۋعا دەيىن باردى. سوڭعى كۇندەرى قىز بالانىڭ اتا-اناسىنىڭ ۇستىنەن قىلمىستىق كودەكستىڭ141-بابى بويىنشا قىلمىستىق ءىس قوزعالعان ەدى. ول اكە مەن شەشەگە «بالانىڭ دەنساۋلىعى مەن ءومىرىنىڭ قاۋىپسىزدىگىن قامتاماسىز ەتۋ مىندەتىن ءتيىستى دەڭگەيدە ورىنداماعاندارى» ءۇشىن ايىپ تاقتى. وندا كىشكەنتاي قىزدىڭ جوعالۋىنا اكە-شەشەسىنىڭ كىنالى ەكەنى دالەلدەنسە,  ولار 4,5 ميلليون تەڭگە ايىپپۇل تولەيتىنى نەمەسە 2 جىلعا  باس بوستاندىقتارىنان ايرىلاتىنى ايتىلعان. ال بالانىڭ ءولى دەنەسى تابىلعان جاعدايدا اتا-اناسى 5 جىلعا دەيىن سوتتالۋى مۇمكىن ەكەنى العا تارتىلعان ەدى.. باقبەرگەن امالبەك. دەرەك: اقمولا وبلىستىق توتەنشە جاعدايلار دەپارتامەنتىنىڭ ءباسپاسوز قىزمەتى.