ەكى كۇنگە سوزىلعان قىزىلوردا وبلىسىنىڭ اقتوبەدەگى كۇندەرى تابىستى ءوتتى.
وبلىستىڭ وڭىرارالىق كووپەراتسيا اياسىندا ەلىمىزدىڭ وڭتۇستىك ايماقتارىمەن ارىپتەستىك بايلانىستى نىعايتۋ قادامى ۋاقىت وتكەن سايىن قايتارىمدى بولا تۇسۋدە. بۇعان دەيىن وڭتۇستىك قازاقستان جانە قوستاناي وبلىستارىنىڭ تاۋار وندىرۋشىلەرى كەرۋەندەرى اتباسىن اقتوبەگە بۇرىپ, ازىق-ت ۇلىك جارمەڭكەلەرىن وتكىزگەن بولاتىن. ەندى اقتوبەدە قىزىلوردا وبلىسىنىڭ كۇندەرى ءوتتى. ماقسات اقتوبە مەن قىزىلوردا وبلىستارى اراسىندا ەكونوميكالىق-مادەني بايلانىستى نىعايتۋ, ءوزارا تاجىريبە الماسۋ, وزدەرىندە وندىرىلەتىن ونىمدەردى كورشىلەرىنە ۇسىنىپ, يمپورتتىڭ ۇلەسىن ءتومەندەتۋ بولىپ تابىلادى.
بۇل جولى ايماققا قىزىلوردا وبلىسىنان 200-گە تارتا دەلەگات كەلدى. ولاردىڭ اراسىندا «ارال تۇز», «سىر مارجانى» سەكىلدى بەلگىلى شارۋاشىلىقتاردىڭ وكىلدەرى بار. قىزىلوردالىق دەلەگاتتاردىڭ 120-سى ونەرپازدار. ولاردىڭ قاتارىندا قىزىلورداداعى تۇرماعانبەت ءىزتىلەۋوۆ اتىنداعى ۇلت اسپاپتار وركەسترى, كامەرالىق حور جانە «توميريس» بي ءانسامبلى ۇجىمدارى, جىراۋلار مەن انشىلەر بار.
قىزىلوردالىق دەلەگاتسيا وكىلدەرى سالا-سالاعا ءبولىنىپ, اۋماقتىڭ ەكونوميكالىق-الەۋمەتتىك جانە مادەني-سپورتتىق الەۋەتىمەن تانىستى. ونەركاسىپ سالاسىنىڭ وكىلدەرى قالاداعى بارلىق ينفراقۇرىلىمى جۇرگىزىلگەن يندۋستريالىق ايماقتا, «اقتوبە مۇناي قوندىرعىلارى جانە سورعىلار دايىنداۋ», «ەكوتونباتىس», «نازار ترەيلەر», «كاسپي پليۋس» جاۋاپكەرشىلىگى شەكتەۋلى سەرىكتەستىگى سياقتى ىرگەلى كاسىپورىنداردا بولدى. ال اۋىل شارۋاشىلىعى سالاسى ماماندارىن «اقتوبە جىلىجاي» جشس-ءنىڭ كوكونىس ءوندىرىسى مەن «اكتەپ»جشس-ءنىڭ مال بورداقىلاۋ الاڭى مەن ەت كومبيناتى قىزىقتىردى. سەرىكتەستىكتىڭ بىرىگەي ەت كومبيناتىندا جىلىنا 7,5 مىڭ توننا ەت قالدىقسىز وڭدەلەدى. بىلتىر ەلىمىز ەكسپورتقا شىعارعان 12 مىڭ توننا ەتتىڭ تەڭ جارتىسى اقتوبەنىڭ ۇلەسىنە تيەسىلى. بيىل ەلىمىز بويىنشا سىرتقا شىعارىلاتىن 20 مىڭ توننا ەتتىڭ 12 مىڭ تونناسىن اقتوبەلىكتەر وندىرەدى.
وسى زامانعا مەديتسينالىق قوندىرعىلارمەن جابدىقتالعان «دارۋ» وڭالتۋ ورتالىعىن, وبلىستىق ەرەسەكتەر اۋرۋحاناسىن جانە قۇرىلىسى باستالعان وفتالمولوگيالىق اۋرۋحانا جۇمىسىمەن تانىسقان قىزىلوردالىقتار ءوڭىردە مەديتسينالىق كلاستەر جانە مەديتسينالىق تۋريزم قۇرۋ جوباسىنىڭ نەگىزسىز ەمەس ەكەنىنە كوز جەتكىزدى. ەلىمىزدىڭ باتىس وڭىرىنە عانا ەمەس, كورشىلەس وبلىستارعا دا مامان دارىگەرلەر دايارلايتىن م.وسپانوۆ اتىنداعى باتىس قازاقستان مەملەكەتتىك مەديتسينا ۋنيۆەرسيتەتى دە كادرلارمەن قامتاماسىز ەتەدى. قوناقتار قالا قۇرىلىسى, سپورت, ساۋدا جانە تۋريزم سالالارى بويىنشا تاجىريبە الماسىپ, ءوزارا بايلانىستى نىعايتۋعا, ىنتىماقتاسا جۇمىس ىستەۋگە بولاتىنىنا سەنىمدىلىك ءبىلدىردى.
قىزىلوردا وبلىسىنىڭ اقتوبەدەگى كۇندەرى اياسىندا «نۇر وتان» پارتياسى وبلىستىق فيليالىندا ءوڭىر باسشىسى بەردىبەك ساپارباەۆتىڭ قاتىسۋىمەن دوڭگەلەك ۇستەل ۇيىمداستىرىلدى. وعان قالا جانە اۋدانداردىڭ اكىمدەرى مەن ولاردىڭ ورىنباسارلارى, مەملەكەتتىك ورگاندار مەن كاسىپورىن جەتەكشىلەرى, وبلىستىق ءماسليحات دەپۋتاتتارى مەن اۋىلشارۋاشىلىق تاۋارلارىن وندىرۋشىلەر, سونىمەن بىرگە, قىزىلوردا وبلىسى اكىمىنىڭ ورىنباسارى سەرىك قوجانيازوۆ باستاعان دەلەگاتسيا قاتىستى.
دوڭگەلەك ۇستەل بارىسىندا وبلىستاردىڭ اكىمدىكتەرى اراسىندا ءوزارا ىنتىماقتاستىق جانە ايماقارالىق بايلانىستاردى نىعايتۋ جونىندەگى مەموراندۋمعا قول قويىلدى.
مەملەكەت باسشىسى نۇرسۇلتان نازارباەۆتىڭ ايماقارالىق كووپەراتسيانى دامىتۋ تۋرالى تاپسىرماسىنا سايكەس بيىل وبلىستا ەلىمىزدىڭ وڭتۇستىگىنەن جانە قوستاناي وبلىستارىمەن كوكونىس پەن وزگە دە ازىق-ت ۇلىك تۇرلەرىن تىكەلەي جەتكىزۋ جونىندە جۇمىستار جولعا قويىلدى.
دوڭگەلەك ۇستەل بارىسىندا قىزىلوردا وبلىسى اكىمىنىڭ ورىنباسارى سەرىك قوجانيازوۆ پەن اقتوبە وبلىسى اكىمىنىڭ ورىنباسارى مۇحتار جۇماعازيەۆ ەكى ءوڭىردىڭ ەكونوميكالىق-الەۋمەتتىك دامۋ باعىتتارىنا توقتالىپ, الداعى ۋاقىتتا قانداي جوبالاردى بىرلەسىپ جۇزەگە اسىرۋعا بولاتىنى تۋرالى ويلارىن ورتاعا سالدى. قول قويىلعان مەموراندۋمعا سايكەس كورشىلەس وبلىستاردىڭ اراسىنداعى ايماقارالىق كووپەراتسيانىڭ نەگىزگى تۇجىرىمدامالارى مەن باعىتتارى كورسەتىلگەن.
ءوز كەزەگىندە, كورشىلەس ەكى وبلىستىڭ ءبىلىم باسقارمالارى ءبىرلەسە وتىرىپ, عىلىم, تەحنيكالىق جانە كاسىپتىك ءبىلىم بەرۋ, ستۋدەنتتەر مەن وقىتۋشىلار ايىرباستاۋ بويىنشا جوبالاردى جۇزەگە اسىرۋ جونىندە كەلىسىمگە قول جەتكىزدى. قازىردىڭ وزىندە وسىنداعى جوعارى وقۋ ورىندارىندا 1500, كوللەدجدەر مەن ليتسەيلەردە 2 مىڭ قىزىلوردالىق جاس ءبىلىم الۋدا. بۇل بايلانىس الدا دا جالعاسىن تاباتىن بولادى.
ساتىبالدى ءساۋىرباي,
«ەگەمەن قازاقستان»
اقتوبە وبلىسى