سارىسۋدىڭ جەرى باي. وسىناۋ كەڭ دالانىڭ قويناۋى قازىناعا تولى. سودان بولار سوڭعى جىلدارى وسى ايماقتان كاسىپ اشىپ, شارۋاسىن دوڭگەلەتكىسى كەلگەندەردىڭ قاتارى كوبەيە تۇسۋدە. سونىڭ ءبىرى – «اسىل تۇز كومپانياسى» كاسىپورنى اس تۇزىن ءوندىرۋ زاۋىتىن سالۋدى قولعا الدى. بۇل ىسكە 422,1 ملن. تەڭگە ينۆەستيتسيالىق قارجى تارتىلىپ, 75 جاڭا جۇمىس ورنىن اشۋ كوزدەلىپ وتىر. كاسىپورىن جىلىنا 50,0 مىڭ توننا اس تۇزىن دايارلايتىن بولادى. ءدال قازىر زاۋىتتىڭ قۇرىلىسى قىزۋ ءجۇرىپ جاتىر.
– جالپى العاندا, ءبىزدىڭ اۋداندا ينۆەستورلاردىڭ جاڭادان كاسىپورىن اشۋىنا كوپ ءمۇمكىندىكتەر بار, – دەيدى سارىسۋ اۋدانىنىڭ اكىمى بەيبىت جايلىباەۆ. – جوعارىدا ايتىلعان ەكى جوبامەن شەكتەلىپ قالماي ينۆەستيتسيالىق جوبالاردى ىزدەستىرىپ, ونى وندىرىسكە ەنگىزۋ جۇمىستارى قىزۋ جالعاسۋدا. وسىنىڭ ناتيجەسىندە اۋدان اۋماعىنداعى تۇز كەندەرىندەگى اششى سۋلاردى پايدالانۋ نەگىزىندە حيميالىق قوسپاسى بار قۇبىر مەن ءۇي اسحاناسىندا قولداناتىن تازارتقىشتار شىعارۋدى جوسپارلاپ وتىرمىز. جوبانىڭ قۇنى 230,0 ملن. تەڭگەنى قۇرايدى. سونداي-اق, «قازاقسودا» جشس جىلىنا 400,0 مىڭ توننا كالتسي سوداسىن وندىرەتىن زاۋىت جوباسىنا كىرىستى. جوبانىڭ جالپى قۇنى 250 ملن. اقش دوللارىن قۇراپ, 250-300 ادامعا جۇمىس ورنى اشىلادى.
ارينە, وندىرىسكە ينۆەستيتسيالىق قارجى تارتۋ اۋدان ەكونوميكاسىن دامىتا تۇسەتىنى انىق. بيزنەس دەگەننىڭ اۋقىمى كەڭ عوي. بۇل جوبالارمەن بىرگە ازىق-ت ۇلىكپەن قامتۋ, جۇمىسشىلارعا ارنايى كيىم تىگۋ, كولىك جانە باسقا قىزمەت تۇرلەرى قارقىندى داميتىنى انىق. وتكەن جىلى سارىسۋ اۋدانىندا نەگىزگى كاپيتالعا سالىنعان ينۆەستيتسيالاردىڭ جالپى كولەمى 16,6 ملرد. تەڭگەنى قۇراپ, الدىڭعى جىلمەن سالىستىرعاندا 8,4 پايىزعا ارتىپتى.
ءونىم كولەمىنىڭ ۇلعايۋىنا سەپتىگىن تيگىزىپ, جۇمىس ىستەپ تۇرعان وندىرىستەردى جەتىلدىرۋ جانە قايتا جاڭعىرتۋ ماقساتىندا بيىل «تاراز كولىك جولى» جشس-ءنىڭ اسفالت-بەتون زاۋىتى وڭىرلىك يندۋستريالاندىرۋ كارتاسىنا ەنگىزىلىپ, 250,0 ملن. تەڭگە قارجى سالىنباق. بۇگىنگى كۇنى ءوندىرىستىك بازادا قۇرىلىس-مونتاج جۇمىستارى اياقتالعان, زاۋىت جۇمىس جاساۋعا دايىن. 50 ادامدى جۇمىسپەن قامتاماسىز ەتكەلى وتىرعان بۇل كاسىپورىنعا «بيزنەستىڭ جول كارتاسى-2020» باعدارلاماسى بويىنشا 37,0 ملن. تەڭگەگە ەلەكتر جەلىسى تارتىلدى. ەندى زاۋىت جىلىنا 600,0 ملن. تەڭگەنىڭ ءونىمىن ءوندىرۋدى جوسپارلاپ وتىر.
ورالحان ءداۋىت,
«ەگەمەن قازاقستان»
جامبىل وبلىسى