كەشە مەملەكەتتىك حاتشى گۇلشارا ابدىقالىقوۆا تاۋەلسىزدىكتىڭ 25 جىلدىعى اياسىندا نازارباەۆ ۋنيۆەرسيتەتتە ۇيىمداستىرىلعان «زياتكەرلىك قازاقستان» تاقىرىبىندا وتكەن دوڭگەلەك ۇستەل جۇمىسىنا قاتىستى.
القالى جيىنعا مەملەكەتتىك ورگانداردىڭ وكىلدەرى, قازاقستاندىق جانە شەتەلدىك تانىمال عالىمدار, جوعارى وقۋ ورىندارى مەن عىلىمي ۇيىمداردىڭ باسشىلارى, عىلىم سالاسىنداعى قازاقستاندىق ساراپشىلار قاتىسىپ, ورامدى ويلارىن ورتاعا سالدى.
مەملەكەتتىك حاتشى ءوز سوزىندە ەل پرەزيدەنتى ن.ءا.نازارباەۆتىڭ وتاندىق عىلىمنىڭ الەۋەتىن وسىرۋگە ايرىقشا ءمان بەرەتىندىگىن اتاپ ءوتتى. «قازاقستان-2050» ستراتەگياسىندا بەلگىلەنگەن مىندەتتەر ەكونوميكانىڭ عىلىمدى قاجەت ەتەتىن سالالارىن قۇرۋمەن بايلانىستى ەكەنىنە باسا نازار اۋداردى. جانە دە, ول جاڭا تەحنولوگيالىق دەڭگەيگە شىعۋ ءۇشىن ەكونوميكانىڭ ءاربىر سالاسى يننوۆاتسيالىق قادامداردى قاجەت ەتەتىنىن جەتكىزدى.
سونداي-اق, مەملەكەتتىك حاتشى بۇكىل الەمدە جاھاندىق باسەكەلەستىكتى قۇرايتىن جوعارى بىلىكتى ماماندارعا جانە عىلىمي زەرتتەۋلەردىڭ ناتيجەلەرىنە, جاڭا تەحنولوگيالارعا دەگەن سۇرانىستىڭ بار ەكەنىنە توقتالىپ ءوتتى. ول 2010 جىلدان باستاپ قازاقستاننىڭ جاھاندىق باسەكەگە قابىلەتتىلىك يندەكسى بويىنشا ءوز پوزيتسياسىن جاقسارتىپ كەلە جاتقانىن جەتكىزدى. ايتالىق, 2015 جىلى «يننوۆاتسيالىق الەۋەت» كورسەتكىشى بويىنشا 31 پوزيتسياعا, عىلىمي-زەرتتەۋ ۇيىمدارىنىڭ ساپاسى مەن يننوۆاتسيا بويىنشا 29 پوزيتسياعا, عالىمدار مەن ينجەنەرلەرگە قولجەتىمدىلىك كورسەتكىشى بويىنشا 21 پوزيتسياعا كوتەرىلگەن بولاتىن.
دوڭگەلەك ۇستەل بارىسىندا ءۇش پانەلدىك سەسسيا ءوتتى. وندا وتاندىق عىلىمدى ودان ءارى دامىتۋدىڭ جانە قازاقستاندىق عالىمداردىڭ عىلىمي ىزدەنىستەرىن ىلگەرىلەتۋدىڭ وزەكتى ماسەلەلەرى جان-جاقتى تالقىلاندى.
جيىن بارىسىندا مەملەكەتتىك حاتشى زەرتتەۋدىڭ ىشكى رەسۋرستارىن دامىتۋدىڭ ماڭىزدىلىعىنا, شەتەلدىك عالىمداردى, سونىڭ ىشىندە, شەتەلدە عىلىمي جۇمىستارىمەن تانىمال قازاقستاندىق عالىمداردى بەلسەندى تارتۋ قاجەتتىگىنە ەرەكشە نازار اۋداردى.
بۇگىندە ەلىمىزدە عىلىمدى قاجەت ەتەتىن ەكونوميكانى قالىپتاستىرۋ ءۇشىن ەكى زياتكەرلىك-يننوۆاتسيالىق كلاستەر قۇرىلعان. ولار – نازارباەۆ ۋنيۆەرسيتەتتەگى «استانا بيزنەس كامپۋس» جانە الماتىداعى «الاتاۋ» تەحنوپاركى. ناقتى وندىرىستىك جوبالاردى ىسكە اسىرۋ ءۇشىن كلاستەرلەر بازاسىنا جوعارى تەحنولوگيالىق كومپانيالار, سونداي-اق, شەتەلدىك كومپانيالار دا تارتىلاتىن بولادى.
جيىن سوڭىندا گۇلشارا ءابدىقالىقوۆا مەملەكەتتىك ورگاندارعا قازاقستاندىق عىلىمدى ودان ءارى دامىتۋ بويىنشا بىرقاتار ناقتى تاپسىرمالار بەردى.
راۋان قايدار,
«ەگەمەن قازاقستان»