استانا. 7 مامىر. بەلگىلى قازاقستاندىق كومپوزيتور, گيتاراشى, «ميۋزيكولا» توبىنىڭ ارانجيرلەۋشىسى, «ا’ستۋديو» توبىنىڭ بۇرىنعى مۇشەسى بولات سىزدىقوۆ قايتىس بولدى. بۇل تۋرالى tengrinews.kz-كە سىلتەمە جاساعان egemen.kz ءتىلشىسى حابارلادى.
«ول جايدارى مىنەزدى, مەيىرىمدى ادام بولاتىن. ەكەۋىمىز ۇزاق جىلداردان بەرى ارالاسىپ كەلدىك. مارقۇم باتىرحان شۇكەنوۆتىڭ قايتىس بولعانىنان كەيىن اراعا ءبىر جىل سالىپ, ومىردەن وتكەنى بىزگە اۋىر سوعىپ وتىر. وسىدان ءبىر اي بۇرىن عانا دەمالىسقا بارىپ كەلگەن ەدى. العا قويعان ماقساتتارى كوپ بولاتىن. كونتسەرت قويماق بولىپ جوسپارلاعان. شىنىمدى ايتسام, ونىڭ قازاسىنا ءالى دە سەنە الماي وتىرمىن. اتى اڭىزعا اينالعان ۇلى تۇلعالاردىڭ ءبىرى», – دەدى كۇيشى اسىلبەك ەڭسەپوۆ.
بولات سىزدىقوۆ 1956 جىلى 21 ماۋسىمدا قاراعاندى قالاسىندا تۋعان. تانىمال وقىتۋشى الەكساندر ماجەلياننىڭ دجاز گيتاراسى كۋرسىن بىتىرگەن. وسى قالادا 16 جاسىندا فيلارمونياعا جەكە ءان ورىنداۋشىسى بولىپ قابىلداندى. سونداي-اق, «گاككۋ» ءانسامبلىنىڭ قۇرامىمەن گاسترولدىك ساپارلاردا بولعان.
ول رەسپۋبليكالىق «گۇلدەر» جاستار ءانسامبلىنىڭ ارنايى شاقىرتۋىمەن الماتىعا كەلگەن. ءانشى روزا رىمباەۆا ونەر كورسەتكەن «اراي» توبىنىڭ گيتاريسى بولدى. بۇل توپ اتالعان انشىدەن بولىنگەننەن كەيىن «الما-اتا» اتاۋىمەن جاڭا توپ قۇرادى. ولاردىڭ اراسىندا بولات تا بولعان. اسىرەسە, ماسكەۋدە تانىمال بولعان توپتىڭ اتاۋى كەيىننەن «ا’ستۋديو» بولىپ وزگەردى.
كومپوزيتور 1992 جىلى ءوزىنىڭ جەكە مۋزىكالىق جوباسىن اشپاق بولدى. ءانشى كارينا ابدۋللينامەن تانىسىپ, «ميۋزيكولا» توبىن قۇردى. قازاقستان پرەزيدەنتىنىڭ جارلىعىمەن 2012 جىلدىڭ 5 جەلتوقسانىندا وعان ەڭبەك سىڭىرگەن ونەر قايراتكەرى اتاعى بەرىلدى.
ايان ءابدۋالي.
دەرەك: tengrinews.kz.
فوتو: comode.kz.